2 Cr 33
33
'Ochnc Manasés reyal
(2 R 21.1-18)
1Slajchwil ab'il sq'uinl Manasés yic schan 'el yich ya'n reyal, 55 ab'il 'ix yac' reyl 'a Jerusalén. 2Palta caw maysch'olnil x'el sb'on 'a sat Jehová, yujto 'ix sb'eylb'ej stu b'eyb'alil jun tzo'n̈ nacion̈ yijnac 'el Jehová yic mantzac c'och eb' israel 'a lu'um. 3'Ix sb'o chan̈ jun tzo'n̈ macsej 'a jolmctac witz jun 'ejm xo, atn jun tzo'n̈ satb'il 'el yuj Ezequías, atn smam; sb'on pax chan̈ yet'l xajmb'al yic comn dios tzcuch Baal, yet' jun tzo'n̈ yechl comn dios tzcuch Aserá; xyaln pax sb'a 'a jun tzo'n̈ c'anal, 'a 'uj yet' 'a c'u. 4An̈jtona', sb'on pax chan̈ jun tzo'n̈ yet'l xajmb'al yic jun tzo'n̈ comn dios 'a yamq'uil yatut Jehová, atn jun n̈a yaljnac Jehová yu'uj, to ata 'oj b'inaxc sb'i 'a smasnil tiempo 'a Jerusalén. 5'Ix sb'on chan̈ jun tzo'n̈ xo yet'l xajmb'al 'a chab' yamq'uil yatut Jehová, yic tz'och win 'emmquilal 'a jun tzo'n̈ c'anal, 'a 'uj, yet' 'a c'u.
6'Ix ya'n pax tz'a yunnal xajmb'al-l 'a lum pan̈n 'a'lic yic Ben-hinom, scuyn sb'a 'a jun tzo'n̈ xo b'eyb'al tic: atn wayjlil, 'ajchumal, b'almil, yet' c'umj spixn eb' chamnac. Caw wal maysch'olnil tas 'ix sb'o 'a sat Jehová, 'ix tzuntzj cot yowl sc'ojl Dios 'a yib'an̈. 7An̈jtona', sb'on pax 'och jun tzo'n̈ yechl sdiosal chi 'a yol yatut Dios, atn jun n̈a yaljnac Dios yuj 'ixtc 'a David yet' 'a Salomón atn yunnal: A 'a jun n̈a xin si'cn 'el 'a scal smasnil eb' yin̈tl Israel 'a Jerusalén tic, ata 'oj in can cajn 'a jun 'ejmn̈ej. 8Man̈x 'oj ex wi'l 'a sat lum lum 'ix wac' 'a eb' e mam eyicham, toto tzeyiclj e b'on smasnil tas 'ix wac' e b'o', atn smasnil in ley, in cuynb'il yet' in checnb'il 'ix wac' yal Moisés 'ayex, xchi Dios.
9Palta ax Manasés cha, a 'ix jucb'tzan eb' 'aj Judá, yet' eb' 'aj Jerusalén 'a maysch'olnil. Yel xo 'ec'b'al stul eb' 'a yib'n̈ stu b'eyb'al jun tzo'n̈ nacion̈ 'ix satl Jehová 'a 'aj 'ayc' eb' cha.
10Tenb'il 'och wan Manasés yuj Jehová yet' eb' schon̈ab', palta ma'ix schaj eb' yab'i'. 11Yuj wal cha, xya'n cot Jehová eb' syajlil eb' soldado yic sreyl Asiria, 'ix yamchj Manasés yuj eb', xya'n 'och eb' q'uen gancho 'a sn̈i', sjaln eb' yet' cadena to nab'a bronce, xyi'n 'at eb' 'a chon̈b' Babilonia.
12Palta ax yic xyab'n wal syal cha, 'ix leslwi 'a Jehová sDiosal, xyi'n 'ejm sb'a si'mb'il 'a yojltac sDiosal yet' eb' smam yicham. 13Ax yic xleslwi cha, 'ix yab'n Dios slesal, 'ix ya'n meltzjc pax 'a Jerusalén yet' 'a yopiso. Yuj cha, xyojcan 'el Manasés to a Jehová Dios toni.
14Xlajw xoj cha, 'ix sb'on chan̈ smuroal spatquil Schon̈b' David 'a stojlal 'aj tz'em c'u 'a Guihón, tz'ec' jun muro chi 'a pan̈n 'a'lic, masnto tzc'och 'a puerta yic no chay, sb'on pax smuroal Ofel. Caw wal niwquil x'aj ste'il. An̈jtona', xya'n 'och eb' capitan̈ 'a smasnil chon̈b' 'aych smuroal 'a yol yic Judá. 15Xyi'n pax 'el sdiosal eb' chuc chon̈b'al, yet' yechl xya'ch 'a yol yatut Jehová, yet' jun tzo'n̈ yet'l xajmb'al sb'ojnac chan̈ 'a jun tzaln yic yatut Jehová, yet' jun tzo'n̈ xo 'a yol chon̈b' Jerusalén. 'Ix sjuln 'el jun tzo'n̈ chi 'a sti 'el chon̈ab'. 16'Ix laj snipnc yet'l xajmb'al yic Jehová, 'ix ya'n q'ue xajmb'al yic junc'ojlal 'a yib'an̈, yet' yic alj yuj diosal. 'Ix ya'n alxc 'a eb' 'aj Judá to tzyac' eb' 'emmquilal 'a Jehová sDiosal. 17Palta b'i'an, a eb' chon̈b' cha, an̈ja ya'n eb' xajmb'al 'a jun tzo'n̈ macsej 'a jolmctac witz, wach'xam a 'a Jehová sDiosal eb' tzyac' yalni.
A schaml Manasés
(2 R 21.17-18)
18Ax jantcto yab'xil tas 'ix 'el sb'on Manasés, yet' slesl 'a Dios, yet' tas 'ix yal eb' schecb' Dios 'a sb'i Jehová sDiosal 'a 'a, ata tz'ib'b'il can smasnil 'a ch'an̈ libro yic yab'xil eb' sreyl Israel. 19Tz'ib'b'il pax slesal, yet' tas x'aj yo'ch sc'ojl Dios 'a yuj slesl cha. An̈jtona', tz'ib'b'il smasnil smul yet' stenmtaquil, yet' jun tzo'n̈ macsej sb'o chan̈ 'a jolmctac witz yet' 'a 'aj sb'o 'ejm yechl comn dios tzcuch Aserá yet' jun tzo'n̈ xo yechl comn dios, yic mantzac yij 'ejm sb'a 'a Dios. A jun tzo'n̈ cha, ata tz'ib'b'il can 'a ch'an̈ libro yic yab'xil eb' schecb' Dios. 20A yic xchami, ata xmucx 'a yamq'uil sdespacho, ax jun yunnal tzcuch Amón, a x'ochcn reyl sjeloc.
'Ochnc Amón reyal
(2 R 21.19-26)
21A Amón cha, 22 ab'il sq'uinal yic schan 'el yich ya'n reyal, chab' ab'il xyac' reyl 'a Jerusalén. 22Caw maysch'olnil x'el sb'on 'a sat Jehová, 'icha sb'ojnac Manasés atn smam. Yujto xyac' xajmb'al, 'ix ya'n 'emmquilal 'a smasnil jun tzo'n̈ yechl sb'ojnac smam cha. 23Palta may xon 'aj 'ix yij 'ejm sb'a 'a yojltac Jehová jun 'ejmoc, 'icha yutjnac yi'n 'ejm sb'a smam.
24A eb' 'aych yajlil yet'oc, 'ix meltzj 'och eb' 'ajc'ojlal 'a 'a, smiln cham eb' 'a yol sdespacho. 25Palta ax eb' 'anma 'ay 'a yol chon̈b' cha, a eb' xmiln cham smasnil eb' xmiln cham rey Amón, ax jun yunnal tzcuch Josías, a xya'cn 'och eb' reyl sjeloc.
Currently Selected:
2 Cr 33: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
