2 Cr 17
17
'Ochnc Josafat reyal
1Ax Josafat, yunnal Asa cha, a x'ochcn reyl sjeloc, caw te'n 'ix yutj scoln sb'a 'a chon̈b' Israel. 2'Ix ya'n 'och soldado 'a smasnil chon̈b' 'aych smuroal 'a yol yic Judá, 'ix ya'n pax 'och soldado tzcan tan̈wnoc smasnil chon̈b' 'ay 'a yol yic Judá cha, yet' 'a jun tzo'n̈ chon̈b' 'a yol yic Efraín, atn jun tzo'n̈ chi 'ix yijcn 'ec' smam, atn Asa.
3Ax Jehová x'och yet' Josafat, yujto 'ix sb'eylb'ej sb'eyb'al David 'a yic b'ab'el, atn smam 'icham. Man̈oc sb'eyb'al jun tzo'n̈ tz'a'n servil yechl Baal 'ix sb'eylb'ej, 4palta a sDiosal yet' smam 'icham, a 'ix yac' servil. 'Ix syiclni schecnb'il, man̈oc sb'eyb'al eb' 'aj chon̈b' Israel 'ix sb'eylb'ej. 5Yuj cha, a Jehová 'ix wach' 'a'n yic' yip 'a yopiso. Smasnil eb' 'aj Judá cha, 'ix yac' eb' siylab' 'a Josafat, yuj cha, caw 'ix niwtj sricoal, caw niwn yel'ch x'aji. 6'Ix ya'n 'och wal 'a sc'ojl sb'eylb'an sb'eyb'al Jehová, xyi'n 'el smacsej eb' 'anma 'a jolmctac witz, yet' smasnil jun tzo'n̈ yechl comn dios Aserá 'a yol yic Judá.
7Yoxl ab'il xo yoch reyal, schecn 'at jun tzo'n̈ eb' niwc yajl yaji: Atn Ben-hail, Abdías, Zacarías, Natanael, yet' Micaías, yic tz'at cuyxc eb' 'anma 'a yol yic Judá cha. 8'Ix 'at pax jun tzo'n̈ eb' levita yet' eb': Atn Semaías, Netanías, Zebadías, Asael, Semiramot, Jonatán, Adonías, Tobías yet' Tobadonías. Ajun pax eb' ya'mal 'och sti eb' 'anma 'a Dios yet' eb', atn Elisama, yet' Joram. 9'Ix checx 'at eb' tic yet' ch'an̈ libro yic sley Jehová, yic tz'at cuyxc eb' 'anma 'a smasnil chon̈b' 'a yol yic Judá cha.
10Yuj cha, a smasnil jun tzo'n̈ chon̈b' 'ay 'a sla'nil Judá, caw 'ix xiw eb' 'a Jehová, man̈xtoc x'och eb' 'a owl yet' Josafat. 11Locn pax eb' filisteo 'ix yij cot siylab' 'a Josafat, atn q'uen plata, 'icha to xyac' eb' q'uen stojlb'alc 'a Josafat. An̈jtona pax eb' árabe, 'ix yij cot eb' 7,700 no mam calnelu, 'ixta pax sb'isl no chiwo 'ix yij cot eb' 'a 'a.
12A Josafat, caw 'ix yij yip si'mb'il 'a yopiso. 'Ix sb'on chan̈ jun tzo'n̈ chon̈b' yet' smuroal 'a yol yic Judá, yet' jun tzo'n̈ 'aj tzmolx tas tzc'uxxi. 13Til wal tas tzc'uxx molb'il yuj 'a jun tzo'n̈ chon̈b' 'a yol yic Judá cha. 'Ay pax soldado caw jeln 'ayc' yuj 'a Jerusalén. 14Atn sb'isl eb' soldado tic 'a junjn 'in̈tal. A Adnas, a comandante yaj 'a scal eb' soldado yin̈tl Judá, 'oxe ciente mil soldado to caw jelan. 15Ax Johanán a yajl yaj 'a yib'n̈ 280 mil soldado, 16ax Amasías, yunnal Zicri, a win tic, 'ix 'el 'a sc'ojl ya'n 'och sb'a yac' servil Jehová yet' chab' ciente mil soldado caw wal jelan.
17Ax Eliada, a yajl yaj 'a yib'n̈ eb' soldado yic yin̈tl Benjamín, caw jeln ya'n owl yet' chab' ciente mil soldado, yet' eb' sjul-lab', yet' eb' smacl sat jul-lab'. 18An̈jtona', a Jozabad, a yajl yaj 'a yib'n̈ 180 mil soldado caw lista yaj s'at 'a owal.
19A smasnil jun tzo'n̈ eb' tic, ya'mal servil win rey yaj eb', ax eb' 'ayc' 'a jun tzo'n̈ chon̈b' 'aych smuroal 'a smasnil yol yic Judá, man̈ 'ayc 'och eb' stz'acb'oc eb'.
Currently Selected:
2 Cr 17: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
