2 Cr 12
12
'Emnc chon̈b' Judá yuj win Sisac
(1 R 14.21-31)
1A yic 'ix yi'n Roboam yip 'a yopiso, caw te'n xo xyab'i, yuj cha, 'ix yactn syiclni sley Jehová, 'ixta pax 'ix yutj sb'a smasnil eb' yit israelal yet'oc. 2Yuj wal to caw tenmtac 'ix yutj sb'a eb' 'a Jehová, yuj cha, a yic o'e xo ab'il yoch Roboam reyal, 'ix jaw Sisac sreyl Egipto yac' owl yet' 'a Jerusalén. 3'Ix jaw yet' mil 200 caruaje yic owal, 60 mil soldado 'ay q'ue 'a yib'n̈ chej, yet' nan̈l xo soldado to man̈xtzac stac' sb'isxi, atn eb' xcot yet' 'a Egipto, 'a Libia, 'a Suka, yet' pax 'a Etiopía. 4'Ix 'ajx ganar jun tzo'n̈ chon̈b' to 'aych smuroal 'a yol yic Judá yu'uj, masnto xc'och eb' 'a Jerusalén.
5Xlajw cha, 'ix c'och Semaías win schecb' Dios 'a yojltac Roboam, yet' 'a eb' yajl yaj 'a yib'n̈ eb' 'aj Judá, atn eb' syam sb'a 'a Jerusalén, eb' to 'el-lal yaj 'a win Sisac, 'ix yaln 'a eb' 'ixtic:
'Ixtc 'ix yutj Jehová yalni: Yujto xin eyactjcani, yuj cha, ex wactn can pax 'a yol sc'ab' win rey Sisac, xchi Dios, xchi Semaías.
6Yuj cha, a eb' yajl yaj 'a yib'n̈ eb' yit israelal, yet' win rey, caw 'emmquilal xyutj eb' yojcan 'el stenmtaquil, xyaln eb' 'ixtic:
—Caw smoj 'ixtc tzon̈ yutjec Jehová, xchi eb'.
7Ax yic 'ix yiln Jehová to caw 'emmquilal 'ix yutj sb'a eb', 'ix yaln pax 'a Semaías chi 'ixtic: Yujto caw 'emmquilal 'ix yutj eb' snan sb'a, yuj cha, ma'oj in satl eb'. Jab'xoj tiempo ax in coln eb'. Man̈x 'oj in c'anlb'oc Sisac yic tzwa'n cot smasnil yowl in c'ojl 'a yib'n̈ chon̈b' Jerusalén. 8Palta b'i'an, 'oj can eb' schecb'oc winac, sec wach' 'oj nachjc 'el yuj eb', chajtlto chuc wal yel wajx servil an tic, chuc pax yel yajx servil eb' sreyl jun tzo'n̈ xo nacion̈, xchi Dios.
9A Sisac sreyl Egipto cha, 'ix yac' owl yet' Jerusalén, xyi'n 'at smasnil q'uen tumn yic yatut Jehová, yet' q'uen 'ay 'a sdespacho win rey. 'Ix yi'n pax 'at jun tzo'n̈ smacl sat jul-lab' to nab'a oro b'ob'il can yuj Salomón. 10Ax yet' q'uen bronce, 'ix sb'o Roboam jun tzo'n̈ smacl sat jul-lab' sjelc jun tzo'n̈ cha, 'ix ya'n can stan̈wc eb' tztan̈wni 'aj tzon̈ 'och 'a sdespacho win rey. 11A yic tz'at win rey 'a yatut Jehová tzyi'n 'at eb' tztan̈wni chi jun tzo'n̈ smacnb'il sat jul-lab' cha, tzlajw cha, tzyi'n pax cot eb' 'a yet'l 'a 'aj tztan̈wj eb' cha. 12Yujto 'ix yij 'ejm sb'a Roboam, yuj cha, 'ix 'och wan yowl sc'ojl Jehová 'a yib'an̈, ma'ix yac' lajwc smasnil schon̈ab'. Yuj cha wach' 'ix 'el'ch eb' 'aj Judá. 'Ix yij pax Roboam yip 'a yopiso 'a Jerusalén.
13A yic schan 'el yich ya'n reyal, 41 ab'il sq'uinal. Uclajn̈e ab'il 'ix yac' reyl 'a Jerusalén, atn jun chon̈b' sic'b'il 'el yuj Jehová 'a yol smacb'en Israel, yic tz'och eb' 'anma 'emmquilal 'a 'a. A snun Roboam cha, tzcuch Naama, amonita 'ix. 14Palta an̈j 'ijnoc tu sb'eyb'al Roboam, yujto ma'ix ya'ch wal 'a sc'ojl syiclni tas xyal Jehová.
15Ax jantcto yab'xil Roboam yictax 'ix 'el yich masnto 'a slajub', ata tz'ib'b'il can 'a ch'an̈ libro yic yab'xil eb' sreyl Judá yuj eb' schecb' Dios, atn Semaías yet' Iddo. Xya'n̈j Roboam owl yet' Jeroboam.
16Ax yic xcham Roboam cha, ata 'ix mucx 'aj mucn eb' smam yicham, 'a Schon̈b' David. Xlajw cha, ax jun yunnal tzcuch Abiam, a 'ix 'ochcn reyl sjeloc.
Currently Selected:
2 Cr 12: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
