1 Ti 4
4
'Ay eb' 'oj meltzjoc pax 'a spatic
1A Yespíritu Dios tojln̈ej yalni, chajtlto a yic wan xo sjaw jun slajb' tiempoal, 'ay eb' creyente 'oj meltzjoc pax 'a spatic. Ax wal 'a jun tzo'n̈ cuynb'il caw 'es 'aj 'oj ya'ch eb' snab'en. A jun tzo'n̈ cuynb'il cha, a 'a ewin demonio tzcoti. 2'Oj ya'ch eb' schicn 'a jun tzo'n̈ 'anma tzyac' 'es. A eb' 'anma cha, caw chab'sat eb'. Toxn caw juwnac 'el snab'en eb' 'a jun 'ejmn̈ej. 3'Oj cob' yal eb' 'ixtic: Caw 'ay yowlal, toto tz'och quistzil. 'Ay pax jun tzo'n̈ tas tzc'uxx to 'ay yowlal qui c'uxni, 'oj schic cob' eb'. Palta a Dios tzb'on smasnil jun tzo'n̈ cha, sec a tzqui c'uxc an̈ creyente on̈c tic, tzca'nec yuj diosal 'a Dios yu'uj, yujto cojquec xo jun cuynb'il caw yel. 4Smasnil tas b'ob'il yuj Dios, caw wach'. Yuj cha, matz tac' calni to maysch'olnil 'a sat Dios. Tzta'n̈j qui c'uxn smasnil, tzca'n yuj diosal 'a Dios yu'uj. 5Toto tzon̈ leslwi, tzca'n yuj diosal yuj tas tzqui c'uxu, may yowlal jun tzo'n̈ tas tzqui c'ux cha, yujto 'ixta tzyal spaxti Dios.
A eb' tz'a'n servil Jesucristo
6Toto 'oj ac' scuy eb' creyente jun tzo'n̈ cuynb'il tic ta', wach' 'oj otc a'n servil Jesucristo. 'Oj wach' 'och a te'nal, yic tza cuyn a b'a 'a jun tzo'n̈ spaxti 'aj tzca'ch qui c'ojol, yet' 'a jun tzo'n̈ xo cuynb'il caw wach' 'aj 'aych qui nab'en.
7Palta caw man̈ a'ch a nab'en 'a jun tzo'n̈ comn 'ab'x may yel'chi. Smasnil tiempo, caw tza'ch a nab'en 'a Dios. 8Toto tzqui pacb'tzej qui niwnal sec 'ay quip, wach' toni. Palta a wal junx tic, yel xo wach', to tzca'ch qui nab'en 'a Dios. Toto 'ixta tzcutj qui b'a, 'oj qui cha swach'l 'a yolyib'n̈q'uinl tic, yet' pax 'a satcha'an̈. 9A jun cuynb'il tic, caw yel. Smoj tzqui chaj cab' yet' smasnil qui c'ojol. 10Yuj wal jun tic, caw 'ip tzon̈ munlj 'a yic Dios, tzcab'n pax syal yu'uj. Yujto a Dios pitzan, a tzca'ch yipc qui c'ojol. A Dios, sColmal smasnil 'anma yaji. A wal eb' tzya'ch sc'ojl 'a 'a, 'oj colchjoc eb' yu'uj.
11A jun tzo'n̈ tzwalb't 'aych tic, tzcham wal aln 'a eb' creyente ta', tza cuyn eb' 'a 'a. 12Caw wach' tzotj a b'a, sec may eb' 'oj alnc o'oj, to 'unnach to. Yel xo wach' tza ch'ox jun wach' b'eyb'al 'a eb' creyente smasnil. Wach' tzotj a paxtin 'a eb'. Wach' tzotj a b'a yil eb'. Caw wach' tzotj a chamc'ojlan eb' ta'. Wach' tzotj a nab'en yil eb'. An̈j 'a Cajlil tza'ch a c'ojol. Tojln̈ej tzotj a nab'en yil eb'. 'Ixtc tzotj a ch'oxn jun wach' b'eyb'al 'a eb' ta'. 13A yic mantzac in c'och ta', caw tzac' 'ip awtn spaxti Dios 'a scal eb'. Tzac' 'ip a'n snab'enoc eb', tza cuyn pax eb'. 14A yic ya'n 'at eb' anciano sc'ab' 'a a jolom, ata ya'jnac Dios opiso, sec tznachj 'el o'oj, tas tzotj a'n servil 'a 'a. A 'a'jnac nachjc 'el yuj eb', to 'ixta 'oj ach yutoc. Yuj cha, caw man̈ actc can jun opiso cha.
15Caw tza'ch a nab'en 'a jun tzo'n̈ tzwalb't 'aych tic, sec wach' 'oj yil eb' smasnil ta', to 'ipn yoch a te'nal 'a junjn c'u. 16Caw tzac' cuenta a b'a yuj a b'eyb'al ta'. An̈jtona', tzac' cuenta a b'a yuj jun tzo'n̈ cuynb'il tzac' scuy eb'. Te'n tzotj a b'a 'a smasnil tiempo, sec 'oj a colcn 'el a b'a, yet' eb' tz'ab'n tas tzala, 'oj colchjoc pax 'el eb'.
Currently Selected:
1 Ti 4: CSS
Highlight
Share
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
