1 S 24
24
Ya'jnac David niwnc'ojlal 'a Saúl
1A yic 'ix lajw ya'n Saúl owl yet' eb' filisteo, 'ix alx 'a 'a chajtlto a David, ata 'ayc' 'a lum cusltac lum 'a En-gadi. 2Yuj cha, 'ix si'n 'el Saúl 'oxe mil eb' soldado caw jeln 'a scal smasnil eb' yit chon̈ab', yic tz'at saynoc eb' David yet' eb' winc ajun yet'oc. 'Ix 'at saync 'ec' eb' 'a sat q'uen niwc tenm 'aj 'ay no calte'al chiwo. 3A yic 'ix c'och Saúl yet' eb' soldado 'a jun lugar cha, ata 'ay jun scol-l no calnelu 'a sti b'e, ata 'ay pax jun q'uen n̈aq'uen 'a sla'nil cha. 'Ix 'och Saúl chuljoc 'a yojl q'uen n̈aq'uen cha, man̈ yojcoc toto ata chotn 'ec' David 'a yich 'ochch q'uen yet' eb' winc ajun yet'oc. 4Ax ewin ajun yet' David cha, 'ix yaln eb' 'ixtic:
—A ticnec x'el'ch wal tas 'ix yal Jehová, to 'oj ya'ch jun 'ajc'ojl yajch 'aych 'a yol a c'ab'. B'o tas tza nib'j 'a 'a, xchi eb'.
Xlajw cha, 'ix q'ue wan David, c'ojnc'ojnil xcoti, xwul spolnc 'el sti sjucn pichl Saúl. 5Palta caw 'ix cus sc'ojl yuj tas 'ix sb'o cha, 6'ix yaln 'ixtc 'a eb' winc ajun yet' cha:
—¡A cab' Jehová matz chan in b'o tas tu 'a win rey tic, yujto a 'a'jnac 'och win reyal! xchi.
7'Ixtnta xyutj David stenn 'och wan eb' winc ajun yet' cha, ma'ix yac' spermiso eb' smiln cham Saúl. 'Ix 'el paxt win 'a yojl q'uen n̈aq'uen cha, 'ix 'atxi. 8An̈jtona', 'ix 'elt David 'a yojl q'uen n̈aq'uen cha, 'ix 'at 'a spatquil Saúl, 'ix 'awj 'at 'ixtc 'a 'a:
—Mamin rey, xchi 'a Saúl.
A yic 'ix meltzj 'at q'ueln Saúl 'a spatic, 'ix 'em n̈ojn David 'a sat lu'um, yuj sch'oxn 'eli to niwn yel'ch Saúl 'a sat. 9'Ix yaln David chi 'ixtic:
—Mamin rey, ¿tas yuj tza chaj ab' 'a eb' 'anma tzalni to maysch'olnil tas tzwij cot 'a eb'an̈? 10¡'Ilto, na a b'a! A Jehová ach 'a'n 'och 'a yol in c'ab' 'a yojl q'uen n̈aq'ue'en. 'Ix yal eb' winc ajun wet'oc, to ata tzach in mil chamoc, palta ma'ix yal in c'ojol. 'Ix wac' niwnc'ojlal 'a eb'an̈. 'Ix in na coti to rey ach, yujto a Jehová si'jnacch 'och reyal.
11Mamin rey, 'ilt nab'n sti a jucn pichl 'ayc' 'a yol in c'ab' tic. Q'uinloc to xyal in c'ojol caw wal may syaloc ach in miln chamoc. A yet' jun tic tzojquej 'eli chajtlto may junc maysch'olnil tzin na 'a a patquil. May 'aj x'och in mul, may 'aj xwij chan̈ in b'a 'ayach, palta ach tic tzin 'a sayq'ui yic tzin 'a'n milxoc. 12A cab' Jehová 'oj qui b'eyc'ojlan q'ui chawn̈il. A 'oj 'a'nc spac 'aych yuj tas tzin otej. An xo pax tic, may b'a'n̈ 'oj ach in mil chamoc. 13'Ay jun paxti tzyal eb' 'anma pecti 'ixtic: A maysch'olnil, ata tzcot 'a eb' maysch'olnil, xchi. Yuj cha, may xon b'a'n̈ 'oj wi' chan̈ in c'ab' 'aych mamin rey. 14An̈jtona', mamin rey, ¿tom niwn wel'chi yuj cha, tzin a pechn b'eyc'oc? An tic may jac wel'chi, lajn in 'icha no chamnc tz'i', mto no c'ac. 15Yuj cha, a cab' Jehová 'oj qui b'eyc'ojlan qui chawn̈il; a cab' tzin b'eyc'ojlani, tzin scoln 'el 'a yol a c'ab', xchi David.
16A yic xlajw spaxtin David, 'ix yaln Saúl 'ixtic:
—¿Tom ach David ach? ¿tom ach tzach paxtin wet'oc? ¡'Icha wal to wunnal ach! xchi. Xlajw cha, 'ix 'oc' cha'an̈. 17'Ix yaln 'ixtc 'a David:
—Ach tic caw wal tojl a nab'en 'a wib'an̈, caw 'ay a niwnc'ojlal, yuj cha, ma'in a mil chamoc, caw wach' xotj 'a pactzan in tu nab'enal 'ayach. 18A ticnec 'ix a ch'oxli, to wach' a nab'en 'ayin. In ya'ch wal Jehová 'a yol a c'ab', palta ma'in 'a mil chamoc. 19Wal yel may junc mach, to a yic tz'ilchj junc 'ajc'ojl yu'uj, tzlajw cha, tzya'n 'el 'a libre. Yuj cha, ¡a cab' Jehová 'oj 'a'nc spac 'aych yuj jun a wach'c'ojlal 'ayn tic! 20A ticnec 'ix nachj 'el wu'uj, to ach 'oj och reyal. A opiso 'a yib'n̈ qui chon̈ab' may mach 'oj stac' yi'n 'ec' 'a yol a c'ab'. 21'A'cn a ti 'ayn ticnec 'a yojltac Jehová, chajtlto ma'oj a satl eb' win̈til, ma'oj yactc sb'inax in b'i 'a scal eb' wican, xchi Saúl 'a David.
22Xlajw ya'n can David sti 'a Saúl, 'ix meltzj can yet' ewin ajun yet' chi 'a 'aj tzcol sb'a, ax Saúl 'ix paxx can 'a sdespacho.
Currently Selected:
1 S 24: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
