1 S 20
20
Xcolwj Jonatán 'a David
1'Ix 'elx David 'a Naiot 'a yol yic Ramá, axta xc'och 'a 'aj 'ayc' Jonatán. 'Ix yaln 'a 'ixtic:
—¿Tas wal tu 'ix in b'o'o? ¿Tas wal in paltail, mto tas wal in mul 'ix 'och 'a a mam, yuj wal cha, tzin sayn 'eq'ui, yic tzin ya'n milxoc? xchi David. 2'Ix ta'w Jonatán 'ixtic:
—A jun cha caw man̈ yeloc, ma'oj a chami. Na wal si'mb'il chajtlto a 'in mam c'uxn tzyaln̈j 'ayin tas tzb'o'o, wach'xam niwn yel'chi, wach'xam may wal yel'chi. Q'uinloc 'ixta', 'ix yal in mam 'ayin. Caw man̈ a na 'ixta', xchi.
3'Ix yaln David 'ixtc 'a Jonatán:
Caw wal yojc a mam cha, chajtlto caw wach' waj et'oc, yuj cha, matz yal ab'i', sec matz ach cus wu'uj. Palta tzyil Jehová chajtlto jab'xoj sjaw chaml 'a wib'an̈, xchi.
4'Ix yaln Jonatán 'a 'ixtic:
—Toto 'ay junc tas 'aj wach' tzach in col-l tza na'a, al 'ayin, 'oj in b'o', xchi. 5'Ix ta'w David 'ixtic:
—A q'uic'an 'oj naxoc sq'uin̈l yic tzpa'x 'uj, an xo tic, yowlal 'oj wem wocn in wa yet' win rey 'a 'icha qui b'eyb'alec. Palta comnoc tz'el 'a a c'ojol, to tzin c'ub'j can 'el in b'a 'a scalte 'a sti 'elt chon̈b' tic, masnto 'a yemc'ul chab'ej. 6Toto tzin sc'anb'j a mam chi 'ayach, tzal 'a 'ixtic: Caw wal xtew 'och David 'ayin, sc'ann 'at sb'a yic tz'at 'a schon̈b' 'a Belén, yujto a smasnil eb' yican, 'oj yac' eb' xajmb'al yic junjn ab'il ta', xchi 'ayin, xa chi. 7Toto tzyal 'ixtic: 'Ixta cab'i', toto xchi, wach' wic tzyal cha. Palta toto tzcot yowal, tzyal 'el'chi, to nab'iln̈ej yu'uj yic tzin smiln chamoc. 8Yuj cha, 'o'ch cab' wal a c'ojl 'ayn an a checb' in tic, ya' sb'a tox 'ix cac' qui ti qui chawn̈il 'a yojltac Jehová. Palta toto 'ay in mul jun, tztac' ach tzin a mil cham xon ticnec, man̈x yowlalc tzin ej 'at 'a yojltac a mam cha, xchi David.
9—Caw man̈ a na 'ixta'. Toto 'ix wab' in b'a, chajtlto a 'in mam tznib'j tzach smil chamoc, toto 'ixta', tox am xwal 'ayach, xchi Jonatán.
10Yuj cha, xyaln pax David 'ixtic:
—¿Mach 'oj alnc wab'i', toto tu 'oj yutc ta'wc sb'a a mam chi 'ayach? xchi. 11—Con̈ wet'oc, 'elcon̈ b'eyc'oc 'a sti 'el chon̈b' tic, xchi Jonatán cha.
Yuj cha, x'elt eb' b'eyc'oc schawn̈il. 12Axta xyal Jonatán 'ixtc 'a 'a:
—Caw tzwac' in ti 'aych 'a yojltac Jehová qui Diosalec an̈ israel on̈c tic, yab'n 'icha hora tic q'uic'an mto chab'ej 'oj in c'anb'c wab' 'a in mam chi o'oj, toto wach' tas tzna 'a eb'an̈, 'oj wal cot ab'i'. 13Palta toto a 'in mam cha, tu tas tzna 'a eb'an̈, a cab' Jehová tz'a'n 'och junc niwquil yailal 'a wib'an̈ toto matz wal ab'i', yic tza coln a b'a. A cab' Jehová tz'och et'oc 'icha wal x'aj yoch yet' in mam. 14Toto pitzn in to yic tzach 'och reyal, tz'o'ch cab' wal a c'ojl 'ayin, 'icha tz'aj yo'ch sc'ojl Jehová 'ayach. Matz in ac' cab' milxoc. 15Toto tox xin cham jun, tzin c'an 'ayach, to tza na cot eb' win̈tl 'a smasnil tiempo. A yic 'oj satxoc 'el eb' 'ajc'ojl yuj Jehová, matz satl cab' in b'inab'ilal 'a yol a macb'en, xchi Jonatán. 16'Ixta 'ix yutj sb'on can strato yet' David, to 'oj b'eyn̈j 'a scal yin̈tl David cha. 'Ix yaln pax 'ixtic: A cab' Jehová 'oj pactzanc 'a eb' 'ajc'ojl yajch 'ayach, xchi. 17'Ix ya'n sti jun 'ejm xo 'a 'a, yujto caw wal chamc'ojlb'il yu'uj, 'icha wal tzyutj schamc'ojlan sb'a. 18Yajn̈ej xyaln Jonatán chi 'ixtic:
—Q'uic'an tznax sq'uin̈l yic tzpa'x 'uj, 'oj checljoc 'eli, yujto ma'oj em wocn 'a te xila 'aj puch xon em wocan. 19Palta a chab'ej, tz'at a c'ub'c 'el a b'a 'a 'ajtil xit' a c'ub'c 'el a b'a 'a jun 'el, tzach c'och 'a stz'ey q'uen tzcuch Ezel. 20An xo tic, 'oj in julb't in jul-lab' 'a 'aj 'aych 'ec' cha, 'icha 'a yic to 'ay junc tas tzin julu. 21'Oj lajwc cha, ax in checn 'at junc in checab', ax waln 'a 'ixtic: 'Ixc 'at sayc' jun tzo'n̈ in jul-lab' cha, 'oj in chic 'a 'a. Toto 'oj wal 'a 'ixtic: Yaj jun tzo'n̈ jul-lab' chi 'a ojltac coti, 'ij cot eb', toto 'oj in chic 'a 'a, toto 'ixta', tztac' a cot 'a junc'ojlal, yujto may tas 'oj e'ni. Wal 'a sb'i Jehová tzwa'n can in ti 'ayach. 22Palta toto 'oj wal 'a 'ixtic: A jun tzo'n̈ jul-lab' cha, caw najt yajb't eb' 'a ojltac 'ati, toto 'oj in chic 'a 'a, to 'ixta', tzach 'at 'eloc, yujto a Jehová tzach checn 'ati. 23Ax pax 'a jun qui trato 'ix qui b'ocn qui chawn̈il tic, a Jehová testigo tz'ajcn 'ayn̈ yuj 'a jun 'ejmn̈ej, xchi Jonatán.
24Xlajw cha, sc'ub'n 'el sb'a David 'a calte 'a sti 'el chon̈ab', ax yic xnax sq'uin̈l yic xpac' 'uj cha, 'ix 'och wocn win rey 'a smexa wa'oc. 25'Ix 'em wocn win rey chi 'a xila, 'icha xon sb'eyb'al, ata x'em wocn 'a yich n̈a. Ax Jonatán 'ix 'em wocn 'a yojltac coti, ax Abner 'ix 'em wocn 'a yichn̈ 'ec' Saúl cha. Ax te xila David, 'ix can te sch'ocoj, may mach x'em wocn 'a yojl te'. 26A 'a b'ab'l c'u cha, may jac tas xyal Saúl, yujto sna 'ixtic: Tecn 'ay junc tas tu x'el-l 'a 'a, tecn to man̈ wach'c yaj sacb'tzan sb'a, xchi. 27Palta ax 'a yic schab'l xo c'u syamn 'och q'uin̈ cha, an̈j 'ijnoc coln te xila winac. Yuj cha, sc'anb'n Saúl 'a Jonatán 'ixtic.
—¿Tas yuj ma'ix jaw win yunnal Isaí wac 'ewi, an̈jtona pax ticnec? xchi.
28—A David cha, caw ji'lti xyutj sc'ann spermiso 'ayn 'ewi, yic tz'at 'a Belén. 29'Ix yal sb'a wal 'ayn si'mb'il, yujto a eb' yican to sb'a yet'oc, 'oj yac' eb' jun xajmb'al 'a schon̈b' ab' cha, yuj cha, 'ix 'awtx 'at yuj jun yu'tac, xyaln 'ayin: Toto wach'n 'a a sat, chaj in 'at ticnec 'at in c'umc eb' wu'tac, xchi. Yuj cha, matz jaw wac quet' 'a te mexa tic, xchi Jonatán.
30Yuj cha, caw xcot yowl Saúl 'a 'a, xyaln 'ixtic:
—Yune ach 'ix maysch'olnil 'ix. ¿Tom man̈ wojcoc am a nani, chajtlto a wach'c'ojl a b'a si'mb'il yet' jun win yunnal win Isaí cha, yuj yi'nb'ilc 'el a q'uixwel yet' a nun? 31Yujto ya' sb'a pitzn win yunnal Isaí cha, ma'oj och reyl ach tic. Yuj cha, a ticnec 'a't saymal, tzlajw cha, tze'n cot 'ayin, yujto smoj 'oj chamoc, xchi.
32—¿Tas yuj 'oj chamoc? ¿Tas smul x'ochi? xchi Jonatán cha.
33Yuj cha, 'ix sjuln 'och Saúl slanza 'a Jonatán, yic tzya'n lajwc snani. 'Ixta xyutj Jonatán chi yojcan 'eli, chajtlto 'aych 'a snab'en smam chi ya'n milxoc David cha. 34Yuj cha, xcot yowl Jonatán, 'ix q'ue lin̈njoc 'a sti te mexa cha. Xlajw cha, 'ix 'elta. Man̈x 'ic wa 'a yic schab'l c'ul xo q'uin̈ cha, yujto caw 'ix 'och pitz'n cusc'ojlal 'a yuj David, yujto caw tu tas xyal smam cha. 35Ax 'a yic sacb'el 'a junx c'u, 'ix 'elt b'eyc'oc 'a calte 'a sti 'elt chon̈ab', 'a 'icha yorail yaj strato yet' David, tza'n 'och jun quelm 'unn yu'uj. 36'Ix yaln Jonatán chi 'a win quelm chi 'ixtic:
—Carela a 'ati, 'at si' cot jun tzo'n̈ in jul-lab' 'oj in jul't tic, xchi 'a 'a.
Ax yic carela s'at win quelm cha, 'ix sjuln 'at Jonatán chi jun sjul-lab' chi 'a najat, sec najtto tz'em 'a yojltac win quelm cha. 37Ax yic xc'och win quelm chi 'a stz'ey 'aj x'ejm jun sjul-lab' cha, caw 'ip 'ix 'awj 'at Jonatán chi 'a spatc winac, xyaln 'ixtic:
—A jun jul-lab' cha, ata x'ejm 'a ojltac 'ati, xchi.
38'Ix 'awj 'at pax Jonatán chi 'a spatc win quelm chi jun 'ejm xo:
—Caw carela a 'ati, man̈ ach 'och wa'an, xchi.
Xlajw cha, xyi'n cot win quelm chi jun jul-lab' cha, 'ix ya'n 'a Jonatán. 39Palta ma'ix nachj 'el xon jac jun chi yuj win quelm cha, cojn Jonatán yet' David a eb' 'ojtnac tas yaj strato. 40Xlajw cha, xya'n win Jonatán chi jun tzo'n̈ syamc'ab' yic owl 'a win quelm cha, xyaln 'a 'a chajtlto tzyij 'at 'a yol chon̈ab'.
41Cojnn̈ej x'atcn win quelm cha, 'ix 'elt David chi 'a yen̈l q'uen q'uen cha. 'A yic x'elt cha, 'ix 'em n̈ojnjoc 'a yojltac Jonatán 'ox'ejem, masnto x'emch snan̈l sat 'a sat lu'um. Xlajw cha, stz'ub'lan 'elt eb' sti', 'ix 'oc' eb' schawn̈il, ax David caw 'ix 'oc' si'mb'il. 42Xlajw cha, xyaln Jonatán 'a David chi 'ixtic:
—'Ixc 'a junc'ojlal, yujto a qui ti xcac' 'ayn̈ qui chawn̈il, 'a yojltac Jehová 'ix cala. 'Ix qui c'an 'a 'a, chajtlto 'ayc'n̈ej cab' 'a qui cal qui chawn̈il, yet' 'a scal eb' en̈til yet' eb' win̈tl 'a jun 'ejmn̈ej, xchi Jonatán.
Xlajw cha, 'ix 'atcn David, ax Jonatán 'ix meltzj can pax 'a yol chon̈ab'.
Currently Selected:
1 S 20: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
