1 S 15

Xlajw 'el eb' amalecita yuj owal

1'Ay jun 'ejm xyal Samuel 'a Saúl 'ixtic:

—A Jehová in checn coti, yic xwul ach wa'nc 'och reyl 'a yol schon̈ab', atn Israel. A ticnec chaj ab' tas tzyal 'ayach. 2'Ixtc wal yaln Jehová tztac' yuj smasnil: 'Oj in satl eb' amalecita yujto xmacx eb' in chon̈b' yuj eb' 'a yol b'e yic yelt eb' 'a Egipto. 3Yuj cha, 'ixic, 'ij 'at eb' soldado et'oc, tz'at eya'n owl yet' eb' amalecita cha. Tze satl smasnil tas 'ay 'a eb'. Man̈ 'o'ch e c'ojl 'a eb'. Tze milcn cham eb' winac, eb' 'ix 'ix, eb' 'unin, eb' tz'ulc 'unn tzat 'alji, no wacax, no calnelu, no cameyo yet' pax no b'uru, xchi Samuel.

4'Ix ya'n Saúl syam sb'a smasnil eb' chon̈ab'. Ata x'ilx 'och eb' yuj 'a Telaim. Chab' ciente mil eb' tzb'ey 'a yoc, lajn̈e mil eb' 'aj Judá. 5Xlajw cha, 'ix 'at Saúl yet' eb' soldado, xc'och eb' 'a chon̈b' Amalec, axta sc'ub'j 'el sb'a eb' 'a jun niwn ch'olan. 6'Ix ya'n Saúl alxoc 'ixtc 'a eb' ceneo: 'Eln̈ec 'a scal eb' amalecita, sec ma'oj ex qui satl yet' eb' on̈, yujto ax tic, 'o'nc 'och e c'ojl 'a eb' quit chon̈b' on̈ yic sjaw eb' 'a tic yic yelt eb' 'a lum Egipto, xchi.

Yuj cha, xyi'n 'el sb'a eb' ceneo 'a scal eb' amalecita. 7'Ix c'och Saúl yet' eb' soldado yac' owl yet' eb' amalecita chi 'a Havila masnto 'a Shur, jun 'ay 'a stojlal 'aj tzq'uel c'u 'a Egipto, ata x'em eb' yu'uj. 8'Ix syamn cot eb' win Agag sreyl Amalec xyi'n can 'at eb'; ax smasnil eb' 'anma cajn 'a jun chon̈b' cha, 'ix tzu'x can cham eb'. 9Palta ax Saúl yet' eb' soldado ajun yet'oc, 'ix yac' eb' niwnc'ojlal 'a Agag, ma'ix smil cham eb'. Ma'ix satl eb' no calnelu, no wacax, yet' jun tzo'n̈ xo no noc' to caw wal b'aq'uech, no quelmtac calnelu, yet' pax smasnil tas wach'. Ax smasnil jun tzo'n̈ tas may wal yel'chi, 'ix satl eb' smasnil.

Ma'ix syiclj Saúl tas xyal Jehová

10'Ix yaln Jehová 'a Samuel 'ixtic:

11Comnoc ma'ix wa'ch Saúl tic reyal. Caw wal tzwab' syal yu'uj, yujto xin spatquilj can 'eli, ma'ix syiclj tas xwala, xchi.

Ax Samuel caw xcus sc'ojol, yuj cha, 'ix leslwi 'a Jehová 'a smasnil 'ac'wl cha. 12Ax wal 'a yic caw sq'uin̈b'il to, 'ix 'at say yil win Saúl, palta 'ix alx 'a 'a chajtlto x'at win 'a Carmel. Ata sb'o jun munamento yuj sb'inaxi, axta xmeltzji, 'ix c'ochx can 'a Gilgal. 13Yuj cha, 'ix 'at Samuel 'a 'aj 'ayc' Saúl cha, ax yic xc'ochi, 'ix yaln Saúl 'a 'ixtic:

—Ya' cab' Jehová syaxil 'a eb'an̈; 'ix in yiclj tas xyala, xchi.

14—¿Tas yaj jun tzo'n̈ no calnelu, yet' jun tzo'n̈ no wacx tzlaj 'el yaw cha? xchi Samuel cha.

15—A 'a Amalec ata xcot no', yujto a eb' chon̈b' tic, 'ix yac' eb' niwnc'ojlal 'a no calnelu, yet' 'a no wacx to caw wal b'aq'uech, yic tzya'n eb' no xajmb'al-l 'a Jehová qui Diosal. Palta ax jun tzo'n̈ xo eb', 'ix qui satl eb' smasnil, xchi Saúl cha.

16Yuj cha, xyaln Samuel 'a Saúl chi 'ixtic:

—Sictac aji, 'oj wal 'ayach tas xyal Jehová 'ayn 'a 'ac'wl q'uiq'ui, xchi.

—Al 'an, xchi Saúl:

17—A 'a yic yaln̈taxi may el'ch tza na'a, palta ach 'och yajlil 'a yib'n̈ eb' quit chon̈ab'. A Jehová ach 'a'n 'och reyl 'a qui chon̈b' tic. 18A pax ach checn 'ati, xyaln 'aych 'ixtic:

—'Ixic, 'at satl jun tzo'n̈ 'anma maysch'olnil sb'eyb'al chi 'a Amalec, 'at 'ac' owl yet' eb', masnto tza satl eb' smasnil, xchi. 19Toto 'ixta', ¿tas yuj ma'ix a chaj ab' tas xyal Jehová 'ayach? ¿tas yuj 'ix ej 'ec' tas 'ay 'a eb' 'ajc'ojl cha? Caw tu 'ix a b'o 'a sat, xchi Samuel.

20—An tic 'ix in yiclj tas xyal Jehová, in xitc' 'aj in schecb'ti, 'ix wij cot win Agag sreyl Amalec, ax eb' amalecita cha, 'ix in satl eb' smasnil. 21Palta ax eb' soldado ajun wet' tic, a eb' 'ix 'i'n cot no calnelu to caw b'aq'uech, yet' no wacx to caw wal wach' 'a scal no to yowlal tzsatx 'el cha, yic tzya'n eb' no xajmb'al-l 'a Jehová qui Diosalec 'a Gilgal tic, xchi Saúl.

22Yuj cha, xyaln Samuel 'ixtic:

Yel xo wal tzalj Jehová toto tzyiclx tas tzyala, 'a yib'n̈ to tz'ajx tz'a no xajmb'al 'a 'a. Yel xo wach' toto tzchax 'ab'xoc tas tzyala, 'a yib'n̈ to tz'ajx tz'a xepual no calnelu xajmb'al-l 'a 'a.

23A tenmtaquil, lajn smul-l yet' eb' tztac' snan 'el junc paxti'; ax pital, lajn wal smul-l 'icha eb' tz'em n̈ojn 'a junc yechel.

Yujto xa patquilj can 'el tas xyal Jehová, yuj cha, ach spatquilncan 'eli, ach yi'n 'el 'a reyal, xchi Samuel.

24—Yel toni 'ix 'och in mul, ma'ix in yiclj tas xyal Jehová, atn tas xyal 'ayin yujto in xiw 'a eb' soldado ajun wet' tic, 'ix in yiclni tas xyal eb'. 25A ticnec jun, tzin c'an 'ayach, to tzin ac' niwnc'ojlal yuj in mul x'och cha. Meltzjan̈ wet'oc, 'at cac' 'emmquilal 'a Jehová, xchi Saúl.

26—Ma'oj in meltzj et'oc yujto xa patquilj can 'el tas xyal Jehová, yuj cha tox ach spatquilj 'eli, ach yij 'el reyl 'a qui chon̈b' tic, xchi.

27Ax yic xmeltzj Samuel, 'ix can to'n Saúl 'a sti spotil, ax x'aji, 'ix jat te yu'uj. 28Yuj cha, xyaln Samuel 'ixtc 'a winac:

—'Icha wal 'ix otj a jatn 'el sti in potl tic, 'ixta 'oj yutc Jehová ach yi'n 'el reyl 'a qui chon̈ab'. Ax ya'n can pax opiso chi 'a yol sc'ab' junc xo et chon̈ab', junc yel xo wach' 'a eb'an̈. 29Na coti to a Jehová a tz'i'n chan̈ qui chon̈b' tic, caw may 'aj tzyac' 'es, may 'aj tzjel snab'en, yujto man̈ lajnoc yet' 'anma', xchi Samuel.

30—Caw x'och in mul, palta tzin tew 'ayach, to 'ay cab' wel'ch 'a a sat 'a yojltac eb' 'ichmtac winac yet' 'a yojltac cab' smasnil eb' quit chon̈ab'. Meltzjan̈ wet'oc, yic tz'at ca'nc 'emmquilal 'a yojltac Jehová qui Diosal, xchi Saúl.

31Yuj cha, 'ix 'och tza'n Samuel yuj Saúl, 'ix 'at ya'nc eb' 'emmquilal 'a Jehová. 32Xlajw cha, xyaln Samuel chi 'ixtic:

—'Ijec cot win Agag sreyl can eb' amalecita, xchi. Ax yic xjaw lin̈n win 'a yojltac Samuel, caw tzcob' tzaljoc yic xjawi, am wal snani tox 'ix 'ec' chaml 'a yib'an̈. 33'Ix yaln Samuel 'ixtc 'a winac:

—Yuj q'uen espada, yuj cha, til wal 'ix 'ix cann̈c 'a to man̈x 'a yune'. 'Icha wal 'ajnc can eb' 'ix chi o'oj, 'ixta wal 'oj 'ajcn a nun 'a scal eb' 'ix yit 'ixal, xchi.

Yajn̈j cha, 'ix scotc tzu'n 'at Samuel chi win Agag 'a yojltac Jehová 'a chon̈b' Gilgal. 34Xlajw cha, 'ix meltzj can Samuel 'a Ramá, ax Saúl 'ix pax q'ue 'a Gabaa. 35A yic 'ayt 'ec' Samuel, man̈x 'a 'aj 'ix sayx 'ec' Saúl yu'uj, palta caw 'ochnc scusc'ojlal yu'uj. An̈jtona Jehová caw xcus sc'ojol, yujto 'ix ya'ch Saúl reyl 'a chon̈b' Israel.

Currently Selected:

1 S 15: CSS

Highlight

Compare

Copy