1 S 10

Ya'jnac q'ue Samuel aceite 'a sjolm Saúl

1Xlajw cha, xyi'n cot Samuel jun yet'l aceite, 'ix secn q'ue aceite#1 S 10.1 A yic tz'ajx q'ue aceite 'a sjolm junc mach, a tzch'oxn 'eli to a Dios tzsi'n can 'och jun chi 'a junc 'opiso niwn yel'chi. chi 'a sjolm Saúl, 'ix stz'ub'n 'elt sti', xyaln 'a 'ixtic:

A Jehová a tzach 'a'n 'och syajlilc qui chon̈ab'. 2A ticnec a yic 'oj qui pojn can qui b'a et' tic, 'oj 'ilchjoc chawn̈ winc e yuj 'a stz'ey 'aj mucb'il 'ix Raquel 'a chon̈b' Selsah 'a yol yic Benjamín. A eb' 'oj alnc 'ayex, chajtlto tox 'ix 'ilchj e no b'uru tze sayc' cha. A 'a mam man̈x 'ayc 'och 'a somc'ojlal yuj e no', palta to 'aych 'a somc'ojlal oj ach tic, tzyaln 'ixtic: ¿Tas 'oj 'aj yilchj win wunnal chi wu'uj? xchi. 3'Oj lajwc cha, ax a b'eyx 'at 'a ojltac, ax yic 'oj e c'och 'a 'aj 'ay te mach' 'a Tabor, 'oj e cha e b'a yet' 'oxwn̈ winac, tz'at eb' 'at yac' 'emmquilal 'a Dios 'a Betel. A win b'ab'el, yet' win 'oxwn̈ no chiwo, win schab'il, yet' win 'oxe 'ixm pan, win yoxil yet' win jun tz'u'um, 'a 'aj 'ay 'ejm te yal uva. 4Ax ya'n ewin stzatzl a c'ojol, 'oj yac' eb' chab'oc 'ixm pan chi 'ayach. Tza chaj 'ixm 'a eb'. 5'Oj lajwc cha, ax e c'och 'a Gabaa 'aj tzyal sb'a eb' 'anma 'a Dios. Ata 'ay yet'l junc'aj eb' soldado filisteo ta'. Ax yic 'oj eyoch 'a yol chon̈b' cha, 'oj 'ilchjoc jun tzo'n̈ eb' schecb' Dios eyu'uj, xoj sb'itn eb', wan spax 'emt eb' 'a 'aj tz'och 'emmquilal 'a Dios. B'ab'l eb' tzyucn salterio, pandero, amay yet' arpa. 6'Oj lajwc cha, ax yoch Yespíritu Jehová 'ayach, ax a yamn 'och aln 'el spaxti Dios yet' eb'. Caw 'oj jelmjoc a nab'en. 7A yic 'oj elnc jun tzo'n̈ tic, tza b'on tas 'oj yac' Dios a b'o', yujto a 'oj colwjoc et'oc. 8Tzlajw cha, tzach b'ab'l c'och 'ayn 'a Gilgal, tza'n xoj 'oj in c'och o'oj, ax wa'n tz'a no xajmb'al ta', yet' pax no xajmb'al yic junc'ojlal. Tzin a tan̈wj ta uque'oc c'u masnto 'oj in c'och 'ayach, ax waln 'ayach tas 'oj a b'o', xchi Samuel.

9Cojn xlajw yaln can sb'a Saúl 'a Samuel, 'ix paxi, ax Dios 'ix jeln snab'en cha. A wal yic jun c'u cha, 'ix 'el'ch smasnil tas 'ix yal Samuel 'a 'a. 10A yic xc'och yet' jun schecb' chi 'a Gabaa, 'ix 'elt jun tzo'n̈ schecb' Dios wul scha sc'ochi. Yajn̈j wal cha, 'ix 'och Yespíritu Dios yet' spoder 'a 'a, yuj cha, 'ix syamn 'och yaln 'el spaxti Dios yet' eb'. 11Palta ax smasnil eb' 'ojtnac Saúl chi 'a yic yaln̈taxi, a yic xyiln eb' syamn 'och yaln 'el spaxti Dios chi yet' eb' schecb' Dios cha, 'ix yaln junjn eb' 'ixtc 'a 'a: ¿Tas laj 'ix 'i'n win yunnal win Cis tic? ¿Tom locn Saúl tic yet' eb' schecb' Dios tic? xchi eb'.

12Palta 'ay jun winc 'ayc' ta', 'ix ta'w 'ixtic: ¿Mach cob' smam jun tzo'n̈ eb' tic jun? xchi. Ata 'elnc yich jun paxti tzalx 'ixtic: ¿Tom locn Saúl tic yet' eb' schecb' Dios tic? xchi. 13Ax yic xlajw yaln can 'el spaxti Dios cha, 'ix c'ochx Saúl 'a 'aj tz'och 'emmquilal, xlajw cha 'ix c'och 'a yatut. 14Ata 'ay jun yu'tac smam xc'anb'n 'ixtc 'a 'a, yet' 'a jun schecb' cha:

—¿'Ajtil ex xit'q'ui? xchi 'a eb'.

—On̈ xitc' qui say quil e no b'uru on̈, palta a yic xquilni to may e no x'ilchj cuj on̈, yuj cha, on̈ 'at 'a win Samuel on̈, xchi Saúl.

15'Ix yaln win yu'tac smam Saúl chi 'a 'ixtic:

—¿Tas 'ix yal Samuel chi 'ayex? Alc wal wab' jab'oc, xchi.

16—Caw wach' xyutj yaln 'ayn̈ on̈, chajtlto tox 'ix 'ilchj e no b'uru chi eyu'uj, xchi.

Palta may jac tas 'ix yal 'a winac to 'ix yal Samuel to 'oj 'och reyal.

Sic'b'il 'el Saúl yic tz'och reyal

17Xlajw cha, 'ix yawtn cot Samuel smasnil eb' yit israelal 'a yojltac Jehová 'a Mizpa. 18Ata 'ix yal 'a eb' 'ixtic:

—A Jehová qui Diosalec, a 'ix aln 'ayn 'ixtc eyu'uj: An ex wij 'elt 'a Egipto ax israel ex tic, ex in col 'elt 'a yol sc'ab' eb' 'aj Egipto cha, yet' 'a smasnil eb' rey x'a'n 'och yailal 'a eyib'an̈, xchi. 19Palta ax ticnec, 'ix e patquilj can 'el qui Diosalec, atn jun on̈ 'i'n 'elt 'a scal yailal, yet' 'a scal cusc'ojlal, yic xe c'ann jun qui reyl tzyac' yajlil 'a quib'n̈ec. Yuj cha, a ticnec 'ochn̈ec 'a yojltac Jehová, junjn 'in̈tal yet' junjn macn̈il tzex 'aj 'eyochi, xchi.

20Xlajw cha, 'ix ya'n Samuel snitz cot sb'a junjn 'in̈tal eb' yit chon̈ab', ax 'a yib'n̈ eb' yin̈tl Benjamín 'ix 'em jun suerte cha. 21'Ix yalni chajtlto tzwach' nitzj cot sb'a eb' yin̈tl Benjamín cha, ax 'a yib'n̈ eb' yin̈tl Matrí 'ix 'em jun suerte cha. 'Ix 'ejm pax 'a yib'n̈ Saúl yunnal Cis. Yuj cha, 'ix sayn 'ec' eb', palta ma'ix 'ilchj yuj eb'. 22Yuj cha, 'ix sc'anb'n eb' jun 'ejm xo 'a Jehová, toto mantzac c'och Saúl chi 'aj 'ayc' eb' cha. Palta 'ix yaln Jehová chajtlto 'ayx 'ec' win ta', cojnto 'ix sc'ub'j 'el sb'a 'a scal jun tzo'n̈ maleta. 23Yuj cha, caw carela 'ix 'at eb' 'at yi' cot 'ajtil 'ix sc'ub'j cob' 'el sb'a cha. Ax yic sch'oxn sb'a Saúl chi 'a scal eb' chon̈ab', 'ix yiln eb' chajtlto may junc mach tza'wni stel 'a 'a, cojn wal 'a squelab' ata tzq'ue'ch stel eb' yit israelal chi smasnil. 24'Ix yaln Samuel 'a smasnil eb' chon̈b' chi 'ixtic:

—¡'Iltec wal jun si'ch Jehová tic qui reyloc! ¡May wal junc 'a qui cal tztac' slajb'tzan sb'a yet' winac! xchi. Yuj cha, 'ix yaln eb' chon̈b' yet' stzaljc'ojlal 'ixtic:

¡Viva win rey! xchi eb'.

25Xlajw cha, 'ix syamn 'och Samuel yaln sleyl yic reyal, syamn 'och stz'ib'n can jun tzo'n̈ ley chi 'a ch'an̈ u'un̈, 'ix ya'n can 'och 'a yol scajnub' Jehová. Xlajw cha, xyaln can sb'a Samuel 'a eb' chon̈ab'. 'Ix yalni chajtlto tzpaxx can junjn eb' 'a yatut. 26'Ixta pax Saúl, 'ix paxx can 'a yatut 'a Gabaa. Ax Dios 'ix 'a'n jawc 'a snab'en jun tzo'n̈ winc caw jeln ya'n owal, yuj cha, 'ix 'at eb' yet' Saúl 'a yatut. 27Palta 'ay jun tzo'n̈ 'anma tu snab'en 'ix yal eb' 'ixtic: ¿Tas wal 'oj yutc jun winc tic on̈ scolni? xchi eb'. Caw wal 'ix 'ijx 'ejm Saúl chi yuj eb', may tas siyj eb' 'a 'a, ax Saúl cha, may tas 'ix yala.

Currently Selected:

1 S 10: CSS

Highlight

Compare

Copy