1 R 5
5
Strato Salomón yet' rey Hiram
(2 Cr 2.1-18)
1A yic 'ix yab'n win Hiram sreyl Tiro, chajtlto a Salomón 'ix 'och reyl sjelc smam, 'ix schecn cot schecb' 'a 'a, yujto swach'c'ojl sb'a win yet' David. 2Xlajw cha, 'ix ya'n Salomón alxc 'ixtc 'a Hiram: 3Ach tic caw ojtac to a 'in mam, ma'ix stac' sb'on chan̈ junc yatut Jehová qui sDiosal on̈, yujto niwn tiempo cojn owl 'ix yila, masnto 'ix ya'ch Jehová eb' 'ajc'ojl a yol sc'ab'. 4Ax ticnec, a Jehová in Diosal, a 'ix 'a'n junc'ojlal 'a smasnil lugar, yuj cha, man̈x 'a junc 'ajc'ojol, may junc maysch'olnil 'aj tzon̈ xiw on̈. 5An tic tox xin na'a, to 'oj wac' b'o chan̈ junc yatut Jehová in Diosal, 'icha yutjnac yaln 'a in mam yic yaln 'ixtic: A jun onnal 'oj wa'ch a jelc 'a a despacho, a 'oj b'onc junc watut, xchi. 6Yuj cha, ticnec 'ac' polxoc ste'al, atn te c'ute 'a lum Líbano. A eb' in checab', 'oj colwjoc eb' yet' eb' ec cha, 'oj wac' stojl sc'u eb' a checb' cha, a tzyal jantc 'oj a c'ana'. 'In ojtac, may junc mach tztac' spoln te a qui cal tic on̈, 'icha ex 'aj Sidón ex cha, xchi Salomón.
7A yic 'ix yab'n Hiram jun tzo'n̈ paxti 'ix yalb't Salomón cha, caw 'ix tzalj wal si'mb'il, 'ix yaln 'ixtic: Alx cab' wach' paxti 'a Jehová ticnec, yujto 'ix yac' jun yunnal David, caw wal jeln snab'en, a 'oj yac' reyl 'a yib'n̈ jun niwquil chon̈b' cha, xchi.
8'Ix ya'n Hiram alxc 'a Salomón 'ixtic: Tox 'ix wab' a checnb'il 'ix wul ac' alxc 'ayin. 'Oj in b'o tas tza nib'j cha, 'icha yuj te c'ute', yet' te c'u'taj. 9'Oj yic' 'emt eb' in checb' te 'a lum jolm witz Líbano, ax yem'ch te 'a sti a mar. Ax ya'n 'och eb' te 'a yib'n̈ a', 'ixta 'oj 'aj te sc'och 'a 'aj 'ix al 'ayin. Ata 'oj a cha sc'och te', ach xo 'oj 'e't te ta', ax tas 'oj a b'o', cojn to tzac' cot tas tzin c'ux yet' eb' 'ayc' 'a watut tic, xchi Hiram.
10'Ixta 'ix yutj ya'n Hiram te te cha, te c'ute', yet' te c'u'taj. 11'Ix ya'n Salomón tas 'ay tz'och yuj Hiram 'a junjn ab'il: 75 mil quintal 'ixm trigo, 115 mil galón aceite yic olivo. 12A Jehová 'ix yac' sjelnal Salomón, 'icha 'ix yutj yalni. 'Ix sb'ocn jun strato yet' Hiram, yuj cha, caw 'ay junc'ojlal 'a scal eb' schawn̈il.
13A rey Salomón 'ix yac' alxoc 'a smasnil chon̈b' Israel, chajtlto 30 mil winc yowlal tz'at 'a munljel, 14lajn̈e mil eb' xchecx 'at munljoc 'a lum Líbano 'a junjn 'uj, jun 'uj tzxit'c eb' munljoc ta', chab' 'uj tzcan eb' 'a yatut. Ax Adoniram 'ajcuenta yiln eb' tzmunlj cha. 15'Ay 70 mil winc tzcuchw 'icatz, ax 80 mil eb' tzma'n poj q'uen q'uen 'a lum jolmctac witz, 16chuc pax ewin 3,300 'aych 'a yib'n̈ yiln munljel, a ewin tzjucb'tzan eb' munljum cha. 17'Ix ya'n win rey ma'xoc 'elt q'uen niwc q'ue'en, caw tzya'ilx yelta, yet' q'uen pachpmb'a yaj stzeyxi, sec wach' to a q'uen tz'em yipnub'alc yich yatut Dios. 18Ax ewin smunljum Salomón yet' ewin yic Hiram, yet' ewin cajn 'a Gebal, a ewin 'ix poln te te', stzeyn pax ewin q'uen q'uen 'ix 'och 'a yatut Dios cha.
Currently Selected:
1 R 5: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
