1 R 16
16
1Yuj cha, 'ix paxtin Jehová 'a win Jehú, win yunnal Hanani, yic tzyaln jun tzo'n̈ paxti 'a yib'n̈ win Baasa 'ixtic: 2An ach in si' chan̈ 'a scal eb' 'anma may yel'chi, ach wa'n 'och yajlilc 'a in chon̈b' Israel. Palta ax x'aji, a sb'eyb'al win Jeroboam xa b'eylb'ej, 'ix a jucb'tzan eb' et israelal 'a scal maysch'olnil. Yuj a mul cha, xa tzuntzn cot yowl in c'ojol. 3Yuj cha, ach Baasa, ach tic 'oj ach in satl yet' smasnil en̈til, 'icha xwutj in satn 'el eb' yin̈tl Jeroboam, win yunnal Nabat. 4Tzann̈j junc ecan 'oj cham 'a yol chon̈ab', a no tz'i 'oj chinc schib'jal. Ax eb' 'oj cham 'a scalte', a no 'usj 'oj chinc schib'jal eb', xchi Jehová.
5A jancto yab'xil Baasa yet' tas xlaj sb'o yet' sjelnal, ata tz'ib'b'il can 'a ch'an̈ libro yic yab'xil eb' sreyl Israel. 6Ax yic xcham win Baasa cha, ata xmucx win 'a chon̈b' Tirsa. Ax jun yunnal tzcuch Ela, a 'ix 'ochx can reyl sjeloc.
7'Ix yaln Jehová 'a win Jehú cha, atn jun schecab', yuj yailal 'oj jawc 'a yib'n̈ win Baasa yet' eb' yin̈til, yujto maysch'olnil tas xlaj sb'o win 'a sat Jehová, 'ix stzuntzj cot yowl sc'ojol, 'icha sb'ojnac Jeroboam. 'Ix jaw pax yailal 'a yib'an̈, yujto satl win eb' yin̈tl Jeroboam.
'Ochnc win Ela yet' win Zimri reyal
8A 'a yic 26 ab'il yoch win Asa reyl 'a Judá, ata x'och win Ela sreyloc eb' israel 'a chon̈b' Tirsa, atn win yunnal Baasa. Chab' ab'il 'ix yac' win reyal. 9Palta 'ay jun win syajlil nan̈l eb' soldado tz'ec' yet' te caruaje yic owal, Zimri sb'i winac. 'Ix sc'ultac naj win 'a spatc win Ela. 'Ay jun c'u 'ix c'och win Ela 'a yatut win Arsa 'a Tirsa cha, smayltoma win rey yaj winac, ax x'aji, 'ix yu'n win rey 'an̈ yet' winac, caw xq'ue te 'an̈ chi 'a sjolom. 10Yajn̈j wal cha, xc'och win Zimri 'a winac, 'ix milx win rey chi yuj winac, ax win x'ochx can reyl sjelc win Ela cha. A jun tic, 'ix uj 'a yic 27 ab'il xo yoch win Asa reyl 'a Judá.
11Cojn wal xq'ue'ch win Zimri chi reyal, 'ix syamn 'och win smiln cham eb' yunnal Baasa yet' eb' yican. C'uxn xcham eb' smasnil, man̈x 'a xon junc winc chi xcani, mto junc swach'c'ojl tztac' spacn sb'a 'a 'a. 12'Ixta wal x'aj eb' yin̈tl Baasa satl yuj win Zimri, x'el'ch 'icha yutjnac Jehová yaln 'a win Jehú yuj win Baasa. 13Yuj wal smasnil smul Baasa yet' yic win Ela, 'ix 'och smul eb' sjucb'tzan eb' yit israelal 'a maysch'olnil, x'at yi'nc 'ejm sb'a eb' 'a jun tzo'n̈ comn dios, caw 'ix yij cot eb' yowl sc'ojl Jehová 'a yib'an̈, yuj cha, 'ix satl eb'.
14A jancto yab'xil win Ela yet' smasnil tas xlaj sb'o'o, ata tz'ib'b'il can 'a ch'an̈ libro yic yab'xil eb' sreyl Israel.
15A yic 27 ab'il xo yoch win Asa reyl 'a Judá, ata 'ix c'och eb' soldado israel yac' owl 'a chon̈b' Gibetón, 'a yol yic eb' filisteo, axn 'ayc' eb' ta', 'ix 'och win Zimri reyl 'a chon̈b' Tirsa. Cojn wal uque c'u 'ix yac' win reyal, 16yujto xyab' sb'a eb' soldado 'a scamplamento cha, to a win 'ix miln cham win rey, yuj cha, wal 'a yajn̈ej 'ix ya'n 'och eb' win Omri sreyloc. A win cha, yajl yaj win 'a eb' soldado 'aych 'a owal cha. 17Yuj cha, 'ix yactn eb' soldado israel chi ya'n owl 'a chon̈b' Gibetón yuj win Omri, ax 'a chon̈b' Tirsa 'ix c'ochx eb' yac' owal.
18Palta ax xyiln sb'a win Zimri, to oyn xo 'och eb' soldado chi 'a jun chon̈b' cha, 'ix 'och 'a yol sdespacho win rey cha, 'ix ya'n 'och sc'a'l jun n̈a chi 'a yib'an̈, 'ixta 'ix 'aj schami. 19'Ixta 'ix 'aji, yujto maysch'olnil tas sb'o 'a sat Jehová, a sb'eyb'al win Jeroboam 'ix sb'eylb'ej, atn win 'ix jucb'tzan eb' yit israelal 'a maysch'olnil.
20A jancto yab'xil win Zimri yet' tas snajnac chan̈ 'a spatquil win rey, ata tz'ib'b'il 'a ch'an̈ libro yic yab'xil eb' sreyl Israel.
'Ochnc win Omri reyl 'a Israel
21Ax x'aji, 'ix spojn sb'a eb' chon̈b' cha, chab' xyutj 'el sb'a eb'. A jun c'aj eb', a win Tibni yunnal Ginat, a xya'ch eb' sreyloc, ax junc'aj xo eb' cha, a yet' win Omri xcan eb'. 22Palta ax x'aji, caw wal jeln eb' xcan yet' win Omri chi 'a yib'n̈ pax eb' xcan yet' win Tibni. Ma'ix techj yuj win Tibni, 'ix cham winac, ax win Omri 'ix 'ochcn reyal.
23A yic 31 ab'il yoch win Asa reyl 'a Judá, ata 'ix 'och win Omri sreyloc chon̈b' Israel. Lajchwe ab'il xyac' win reyal, waque ab'il xyac' win reyl 'a chon̈b' Tirsa. 24Xlajw cha, 'ix smann win jun lum tzaln 'a win Semer sb'i. 136 libra q'uen plata xyac' win stojloc lu'um, ax 'a lum tzaln cha, ata 'ix yac' win b'o jun chon̈ab', ata 'ix yac' reyl junx waque ab'il. 'Ix ya'n sb'ic Samaria, yujto Semer sb'i win 'ay yic lum 'a yic mantzac chon̈x lu'um.
25A win Omri cha, yel xo wal maysch'olnil tas sb'o win 'a sat Jehová, 'ec'b'al xo wal sayn win smulc 'a yib'n̈ ewin rey 'e'nc 'a yaln̈tax cha. 26'Ix sb'eylb'ej win sb'eyb'al win Jeroboam yunnal Nabat, atn win 'ix jucb'tzan eb' yit israelal 'a maysch'olnil. 'Ix yij cot eb' yowl sc'ojl Jehová Dios 'a yib'an̈, yujto xyal sb'a eb' 'a jun tzo'n̈ comn dios.
27A jancto yab'xil win Omri yet' smasnil tas xlaj sb'o', yet' jantc tas ya'jnac ganar yi'n cani, ata tz'ib'b'il 'a ch'an̈ libro yic yab'xil eb' sreyl Israel. 28Ax yic xcham winac, ata xmucx win 'a chon̈b' Samaria. Ax jun yunnal tzcuch Acab, a 'ix 'ochx can reyl sjeloc.
'Ochnc Acab reyl 'a Israel
29A yic 38 ab'il xo yoch win Asa reyl 'a Judá, ata 'ix 'och win Acab reyl 'a chon̈b' Israel, atn win yunnal Omri. 22 ab'il xyac' win reyl 'a Samaria. 30A win Acab cha, yel xo wal maysch'olnil sb'eyb'al win 'a sat Jehová, 'ec'b'al xo say win smulc 'a yib'n̈ ewin rey b'ab'l 'e'nc yuj winac. 31Man̈ocn̈ej sb'eyb'al win Jeroboam chi sb'eylb'ej, palta to 'ix yij win 'ix Jezabel yistziloc, 'ix yisl win Et-baal sreyl Sidón. 'Ix 'at ya'nc 'ejm sb'a win 'a jun comn dios tzcuch Baal yet' 'ix yistzil cha. 32'Ix ya'n win b'o jun yet'l xajmb'al yet' jun yatut jun comn dios Baal 'a chon̈b' Samaria. 33An̈jtona 'ix ya'n win Acab chi b'o jun yechl comn dios Asera sb'i. Yuj cha, 'ix yi'n cot win yowl sc'ojl Jehová 'a yib'an̈, yujto yel xo wal 'ec'b'al say win smulc 'a yib'n̈ jun tzo'n̈ eb' rey b'ab'l 'e'nc yu'uj.
34A 'a yic 'aych win Acab reyal, ata 'ix scha b'oj pax chan̈ win Hiel 'aj Betel chon̈b' Jericó. A wal yem yipnub'al yich jun chon̈b' cha, 'ix cham jun sb'ab'l 'unnal win tzcuch Abiram. Ax yic x'och spuertail jun chon̈b' cha, ata 'ix cham junx yunnal tza'n 'unin, tzcuch Segub. 'Ixtnta x'aj yel'ch tas yaljnac can Jehová 'a win Josúe, win yunnal Nun.
Currently Selected:
1 R 16: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
