1 R 14
14
Yaljnac win Ahías*r* chajtlto 'oj lajwc 'el Jeroboam
1'Ay jun tiempoal, 'ix yab'ilan win Abías yunnal Jeroboam. 2Yuj cha, 'ix yaln win Jeroboam chi 'a 'ix yistzil 'ixtic:
—A ticnec, 'ixc 'a chon̈b' Silo muc'uc, yujto ata 'ay win Ahías win schecb' Dios, win 'ix aln 'ayin chajtlto an 'oj woch reyl 'a jun chon̈b' tic. Jel-l a pichul, mac a sat, sec ma'oj ach yilch eb' toto wistzil ach. 3'Ij 'at lajn̈ec 'ixm niwc pan, yet' jun tzo'n̈ c'oxox pan yet' junc xalu no yal chab' 'a winac. 'Ixc 'at c'umj winac, sec 'oj yal 'ayach tas 'oj 'aj win 'unn tic, xchi win 'a 'ix.
4'Ix sb'on sb'a 'ix 'icha xyutj win yaln 'a 'ix. Xlajw cha, 'ix 'at 'ix 'a chon̈b' Silo, xc'och 'ix 'a yatut win Ahías. A win Ahías cha, man̈xtzac stac' yiln winac, yujto tox xjuw yol sat win yuj 'ichm wincal, 5palta a Jehová tox 'ix yal 'a win 'ixtic: Tic wan sjaw 'ix yistzil win Jeroboam wul sc'anb'c 'aych yuj jun win yune 'ix ya'ay. 'Ixtc 'oj otc ta'wc a b'a 'a 'ix, yujto 'oj sjelmtoc sb'a 'ix, yic 'oj jawc 'ix 'ayach, xchi.
6A yic xyab'n win Ahías sc'an̈ sc'och yoc 'ix 'a sti smac n̈a, 'ix yaln win 'ixtic:
—'Ochn̈ ta ach yistzil Jeroboam. ¿Tas yuj xa jelmtej a b'a? Tox 'ix alx 'ayin chajtlto caw ya jun tzo'n̈ paxti 'oj wal 'ayach. 7Yuj cha, 'ixic, 'at al 'a win Jeroboam, chajtlto a Jehová sDiosal chon̈b' Israel a 'ix aln 'ixtic: An ach in sic' 'elt 'a scal eb' chon̈ab', ach wa'n 'och yajlil 'a yib'n̈ eb'. 8An 'ix wij 'ec' jun 'opiso tic 'a yin̈tl David, 'ix wa'n can 'ayach. Palta ach xo tic, man̈ lajnoc xotj a b'a 'icha in checb' David cha, syiclj in checnb'il yet' smasnil sc'ojol, cojn tas tojol a 'ix sb'o 'a in sat. 9Palta ach xo tic, yel xo wal tu tas tza b'o 'a yib'n̈ smasnil eb' 'e'nc reyl 'a yic mantzac ach 'ochi. A jun tzo'n̈ q'uen 'ix a b'o a diosaloc, in a patquiln can 'eli, yic tza tzuntz cot wowal. 10Yuj cha, 'oj wa' cot yailal 'a eb'n̈ yet' eb' en̈til. 'Oj in satl smasnil eb' winc 'a scal eb' et israelal, wach'xam moso man̈ yico'oc sb'a, wach'xam mun yic sb'a. Caw 'oj in satl eb' smasnil, 'icha wal tz'aj smesx 'el stza no cajb'en noc' 'a yet'ul, masnto tzlajw 'el smasnil. 11'Oj cham eb' ecan 'a yol chon̈ab', a no tz'i 'oj chinc sniwnal eb', ax eb' 'oj cham 'a calte', a no 'usj 'oj chinc sniwnal eb' cha, yujto an Jehová in, an tzwala, xchi Dios, xchi win schecb' Dios cha.
12Xyaln pax win Ahías chi 'a 'ix 'ixtic: Ach xo ach tic, 'ixic, paxn̈ 'a atut. Cojnn̈ej wal yic 'oj a c'och 'a yol sti jun chon̈b' cha, ax scham win 'unn cha. 13Ax smasnil eb' chon̈ab', caw 'oj cus eb' yu'uj, ax smucn eb' jun 'unn cha. Yujto cojn jun yin̈tl win Jeroboam chi 'oj mucxoc, cojn jun 'unn chi wach'tac 'a sat Jehová qui Diosalec an̈ israel on̈c tic 'a scal eb' yin̈tl Jeroboam. 14A Jehová, a 'oj 'a'nc 'och junc xo rey 'a qui calc an̈ israel on̈c tic, a 'oj satnc 'el smasnil yin̈tl win Jeroboam cha. Jab'xoj 'oj ujc jun cha. 15'Oj stzicb'tan̈c Jehová chon̈b Israel tic 'icha tz'aj stzicb'tan̈x eb' te 'aj yuj a a'. 'Oj quijxec 'el an̈ israel on̈c tic 'a sat lum lum caw wach' 'ix 'ajx 'a eb' qui mam quichmec. 'Oj quijxec 'at 'a sc'axpil 'at a Eufrates, yujto 'ix qui b'oc jun sch'oxnb'il jun comn dios tzcuch Asera. Caw 'ix qui tzuntzjec cot yowl sc'ojl Jehová 'a quib'n̈ec. 16Yuj cha, 'oj on̈ ya'c 'och Jehová 'a yol sc'ab' jun tzo'n̈ xo chon̈ab', yuj wal smul win Jeroboam 'ix ya'chi. Yuj winac, 'ix 'och qui mulec, xchi win Ahías.
17Xlajw cha, 'ix pax 'ix yistzil win Jeroboam cha, 'ix c'och 'ix 'a chon̈b' Tirsa. A wal xalb'n 'och 'ix smac te n̈a, 'ix cham win 'unn cha. 18Smasnil eb' israel 'ix mucn jun 'unn cha, x'och eb' 'a cusc'ojlal yu'uj, 'icha wal xyutj Jehová yaln 'a win Ahías, atn win schecab'.
19A jun tzo'n̈ xo yab'xil win Jeroboam, 'icha yuj jun tzo'n̈ tas xlaj sb'o', yet' 'aj xlaj yac' owal, yet' yuj tas xyutj ya'n reyal, ata tz'ib'b'il can smasnil 'a ch'an̈ libro yic yab'xil eb' sreyl Israel. 20A win Jeroboam cha, 22 ab'il xyac' win reyal, ax yic xcham winac, ax jun yunnal tzcuch Nadab, a win x'ochx can reyl sjeloc.
Ya'jnac Roboam reyl 'a Judá
(2 Cr 12.1-16)
21A Roboam win yunnal Salomón, 'ix yac' win reyl 'a chon̈b' Judá. 41 ab'il sq'uinl Roboam yic syamn 'och ya'n reyal, uclajn̈e ab'il pax xyac' reyl 'a chon̈b' Jerusalén, atn jun chon̈b' si'jnac 'el Jehová 'a scal smasnil lugar 'a yol yic Israel, yic tzb'inax sb'i ta'. Naama sb'i snun winac, amonita 'ix.
22A Roboam yet' eb' 'anma 'aj Judá, caw wal tu tas sb'o eb' 'a sat Jehová, yel xo wal stzuntzj cot eb' yowl sc'ojl Jehová 'a yib'an̈, 'icha 'ajnc yoch smul eb' smam yichm eb'. 23'Ix sb'o pax eb' yet'l 'emmquilal 'a lum jolmctac witz, yet' 'a yich smasnil te te caw pim xi'il. Tzlin̈n chan̈ eb' q'uen q'uen yechloc, yet' te te sch'oxnb'il comn dios tzcuch Asera. 24'Ay pax eb' winc tzb'on 'ajmulal yet' eb' yit wincal yic tz'och eb' 'emmquilal 'a sdiosal. Tzb'on pax eb' jun tzo'n̈ 'ajmulal to caw yajb'entac, 'icha sb'ojnac jun tzo'n̈ nacion̈ yijnac 'el Jehová 'a 'aj c'ochnc eb'.
25'Ayx o'e ab'il yoch Roboam reyal, 'ix c'och win Sisac sreyl Egipto yac' owl 'a Jerusalén. 26'Ix yi'n 'ec' win smasnil ricoal 'ay 'a yol yatut Jehová, yet' smasnil ricoal 'ay 'a yol yatut win rey, yet' pax smasnil jun tzo'n̈ q'uen tzmacn sat jul-lab' to nab'a oro b'ob'il can yuj Salomón. 27Xlajw cha, ax q'uen bronce sb'o Roboam chi sjelc jun tzo'n̈ tzmacn sat jul-lab' to nab'a oro yaj sb'o cha. 'Ix ya'n can 'a eb' scapitan̈il eb' soldado 'aych stan̈malc sti yatut win cha. 28A yic tz'at win rey chi 'a yatut Jehová 'a junjn 'ejem, ax eb' soldado tz'at stan̈malc winac, tzyij 'at eb' jun tzo'n̈ q'uen tzmacn sat jul-lab' chi yet'oc, tzlajw cha, tzmeltzj pax eb' 'a yet'l chi yet' q'uen jun 'ejm xo.
29A yab'xil jun tzo'n̈ xo tas sb'ojnac win Roboam, ata tz'ib'b'il can 'a ch'an̈ libro yic yab'xil eb' sreyl chon̈b' Judá.
30Caw 'ayn̈j owl 'a scal Roboam yet' Jeroboam. 31A yic xcham Roboam cha, ata xmucx yet' eb' smam yichm 'a Schon̈b' David. Naama sb'i snun winac, amonita 'ix. Ax jun yunnal tzcuch Abiam, a 'ix 'ochx can reyl sjeloc.
Currently Selected:
1 R 14: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
