1 Jn 5
5
Tztac' ca'nec ganar maysch'olnil
1An̈ec tzca'c 'och 'a qui c'ojol, to a Jesús atn Cristo, an̈ec ton yunnaln̈ec xo Dios. Q'uinloc 'ay junc mamb'il tzqui chamc'ojlej, to 'ixta', wan qui chamc'ojlan pax eb' yunnal. 2Yuj cha, cojquec, toto wan qui chamc'ojlanec Dios, toto wan qui yiclniec 'icha tzyala, wan qui chamc'ojlanec qui b'a an̈ yunnaln̈ec xo tic. 3Toto yel tzqui chamc'ojlejec Dios, 'oj qui yiclquec tas tzyal jun tzo'n̈ schecnb'il. A jun tzo'n̈ schecnb'il tic, man̈ yac qui yiclni. 4A jun tzo'n̈ tas maysch'olnil 'a yolyib'n̈q'uinl tic, cannc xo 'a yaln̈ cuj an̈ yunnaln̈ec xo Dios tic. Yujto tzca'c 'och qui c'ojl 'a Dios. Yujn̈ej cha, tztac' ca'nec ganar scan jun tzo'n̈ chi 'a yaln̈ cujec. 5Cojn eb' tzya'ch 'a sc'ojol, to Yunnal Dios Jesús, cojn eb' tztac' scan jun tzo'n̈ maysch'olnil chi 'a yaln̈ yu'uj.
A Dios tzyac' testigoal sb'a yuj Yunnal
6A Jesucristo wulnc 'ec' 'a yolyib'n̈q'uinl tic. Wul ya'jnac bautisar sb'a. 'Elnc pax schiq'uil. Man̈ cojnoc wul ya'jnac bautisar sb'a, palta 'elnc pax schiq'uil. A Yespíritu Dios tzalni, to yel jun tzo'n̈ tic. A Yespíritu cha, caw yel. 7'Ay 'oxwn̈ tzyac' testigoal sb'a yu'uj: 8Atn Yespíritu yet' chab' xo tas 'icha testigo. Atn yic yajx bautisar, yet' pax yic yel schiq'uil. A 'oxe tic, lajnn̈ej yutjnac sch'oxni, to a Jesucristo Yunnal Dios. 9'In tzqui chajec cab' tas tzyal eb' 'anma 'a yolyib'n̈q'uinl tic. Palta a tas tzyal Dios, yel xo wal niwn yel'chi. Yujto a 'ix alni, to Yunnal yaj Jesucristo. 10An̈ec tzca'c 'och qui c'ojl 'a Yunnal Dios, cojquec si'mb'il, to yel tzyal Dios yu'uj. Palta ax eb' matz ya'ch xon sc'ojl 'a Yunnal cha, wan yaln eb', to a Dios tzyac' 'es. Yujto matz ya'ch eb' sc'ojl 'a tas tzyal yuj Yunnal. 11Atn jun tic yaljnac can Dios, to tzyac' qui q'uinlec 'a jun 'ejmn̈ej, to yujn̈ej Yunnal tzya'n qui q'uinlec tic. 12Yuj cha, an̈ec 'aych Yunnal Dios 'a qui c'ojol, 'ay qui q'uinlec 'a jun 'ejmn̈ej yu'uj. Ax eb' man̈ 'ayc 'och sc'ojl 'a 'a, may sq'uinl eb'.
'Ay qui q'uinlec 'a jun 'ejmn̈ej
13Ax tzeya'ch e c'ojl 'a Yunnal Dios, a 'ayx tzin tz'ib'j 'at jun tzo'n̈ tic, sec wach' caw tznachj 'el eyu'uj, to 'ay qui q'uinlec 'a jun 'ejmn̈ej.
14Yuj cha, matz on̈ xiwc qui leslwi 'a Dios, yujto cojquec, tzann̈j tas tzqui c'anc 'a 'a, 'oj yab'i', toto tzqui c'anc tas 'a 'icha tznib'ej. 15Cojquec, a tz'ab'n qui lesal. Yuj cha, cojquec paxi to a tz'a'n tas tzqui c'anc 'a 'a.
16Q'uinloc tzeyil junc quit creyenteal to wan sb'on maysch'olnil. Toto a jun tzb'o cha, matz 'ijx 'at yuj 'a chamel, tzex leslwi yu'uj, ax Dios 'oj 'a'nc sq'uinal. Palta 'ay jun tzo'n̈ maysch'olnil tzon̈ 'i'nec 'at 'a chamel. May tas tzwal 'ayex, to tzex leslwi yuj eb' tzb'on jun tzo'n̈ cha. 17Smasnil jun tzo'n̈ maysch'olnil, mul 'a sat Dios. Palta 'ay jun tzo'n̈ maysch'olnil matz on̈ 'i'nec 'at 'a chamel.
18Cojquec, toto yel yunnaln̈ec xo Dios, man̈x 'oj qui b'eylb'oquec maysch'olnil, yujto a Yunnal tzon̈ tan̈wniec. Yuj cha, man̈xtzac stac' on̈ yixtnec win diablo. 19Cojquec to yic on̈c xo Dios. Ax eb' yic yolyib'n̈q'uinl tic, c'uxn 'ayc' eb' 'a yol sc'ab' win diablo cha. 20An̈jtona', cojquec paxi, wulnc 'ec' Yunnal Dios 'a yolyib'n̈q'uinl tic. A xjacn qui nab'enec, sec wach' tzcojquejec 'el Dios caw yel. Yuj cha, junn̈j cajc yet' jun caw yel cha, atn Jesucristo Yunnal. A jun cha, caw yel Dios. A tz'a'n qui q'uinlec 'a jun 'ejmn̈ej. 21Ex chamc'ojlb'il wu'uj, caw man̈ eya'ch e nab'en 'a jun tzo'n̈ tzalx 'och diosal. [Ya' cab'i'.]
Currently Selected:
1 Jn 5: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
