1 Jn 2

A Cristo tz'a'n 'och qui tic 'a Dios

1Ex chamc'ojlb'il wu'uj, tzin tz'ib'j 'at jun tzo'n̈ tic 'ayex, sec man̈xtzac e b'o maysch'olnil. Palta toto 'ay 'aj tzqui b'oc maysch'olnil, 'ay jun tz'a'n 'och qui tic 'a qui Mam Dios, atn Jesucristo. A jun cha, caw tojl snab'en. 2'Icha tz'aj junc xajmb'al, 'ixta x'aj scham Cristo stojloc qui mulec. Man̈ yujocn̈ej qui mul an̈ec tic 'ix chami, palta yuj smul smasnil 'anma 'a yolyib'n̈q'uinl tic.

3Toto tzqui yicljec jun tzo'n̈ schecnb'il Dios, to 'ixta', caw cojquec xo Dios cha. 4Palta toto tzcalc 'ixtic: An tic, wojc xo Dios, toto xqui chi, palta matz qui yicljec jun tzo'n̈ schecnb'il, to 'ixta', ton̈j tzca'c 'es. May jac tas yel tzcalec. 5Palta a mach tzyiclni tas tzyala, wal yel 'ay schamc'ojlal 'a Dios si'mb'il. 'Ixta tzcutjec cojcan 'eli, to junn̈j cajc yet'oc. 6A mach tzalni, to junn̈j yaj yet' Dios, yowlal tzb'eylb'ej sb'eyb'al Jesucristo.

A jun checnb'il tzalx pax 'ati

7Ex wu'tac, ex wanab', a jun checnb'il 'oj walb't 'ayx tic, man̈toc at 'ijnoc 'oj eyab' tic. Yujto a jun checnb'il tic, alb'ilx 'ayex yictax eyoch yico'oc Dios. Eyab'jnacx jun checnb'il tic pecti', chajtlto yowlal tzqui chamc'ojlejec qui b'a. 8Palta a jun checnb'il tic, tzat walb't 'ayx jun 'ejm xo. Wan qui b'eylb'anec jun checnb'il tic 'icha yutjnac sb'a Jesucristo, yujto wan sat jun q'uic'q'uinl 'a qui pixnec. Ax jun sacq'uinl caw yel, a 'ayx 'och 'ayn̈ec.

9Toto tzcalec to sacq'uinl xo yaj qui pixnec, palta toto tzon̈ chichnec 'och 'a junc quit creyenteal, to 'ixta', q'uic'q'uinl to yaj qui pixnec. 10Toto tzqui chamc'ojlejec eb' quit creyenteal, to 'ixta', sacq'uinl xo yaj qui pixnec, may junc tas tztac' sjun 'el qui nab'enec. 11Palta a eb' tzchichn 'och 'a eb' yit creyenteal, q'uic'q'uinl to yaj spixn eb'. 'Icha junc mach tzb'eyc' 'a q'uic'q'uinal, matz yil 'aj tz'ati, 'ixta 'eb', yujto juwnac 'el snab'en eb'.

12Ex 'ac' creyente, tzin tz'ib'j 'at jun tzo'n̈ tic 'ayex, yujto a Dios x'a'n can lajwc e mul yuj Jesucristo. 13Ax xo 'ichm creyente ex, tzin tz'ib'j 'at pax 'ayex, yujto eyojc xo jun 'ayc' xoni, yictax mantzac b'o yolyib'n̈q'uinl tic. Ax xo te'n exx 'a e creyenteal, tzin tz'ib'n 'at pax 'ayex, yujto xcan win diablo 'a yaln̈ eyu'uj.

An̈jtona ex 'ac' creyente, eyojc xo qui Mam Dios. Yuj cha, tzin tz'ib'n 'at 'ayex. 14Ax xo 'ichm creyente ex, tzin tz'ib'j 'at 'ayex, yujto eyojc xo pax jun 'ayc' xoni, yictax mantzac b'o yolyib'n̈q'uinl tic. Ax xo te'n exx 'a e creyenteal, xeya'ch spaxti Dios 'a e c'ojl wet'oc. 'Ix can pax win diablo 'a yaln̈ eyu'uj. Yuj cha, tzin tz'ib'n pax 'at 'ayex.

15Man̈ qui chamc'ojloquec qui b'a yet' yolyib'n̈q'uinl tic, yet' jun tzo'n̈ tastc 'ay 'a 'a. Toto tzqui chamc'ojlejec qui b'a yet'oc, ax 'a qui Mam Dios, may qui chamc'ojlalec. 16A eb' yic yolyib'n̈q'uinl tic, cojxn yic sniwnal eb' tznib'j 'ochi. Tznib'n pax 'och eb' jun tzo'n̈ tastc tzyil yet' sat. Tzb'an̈n pax sb'a eb' yuj jun tzo'n̈ tastc 'ay 'a 'a. Palta a jun tzo'n̈ b'eyb'al cha, man̈ yico'oc qui Mam Dios, yic yolyib'n̈q'uinl tic. 17A yolyib'n̈q'uinl tic, yet' jantcn̈ej maysch'olnil tznib'j 'och eb' 'anma', wan slajw 'eq'ui. Palta a eb' tzb'on 'icha tznib'j Dios, pitzn eb' 'a jun 'ejmn̈ej.

A eb' 'ajc'ojl yajch 'a Cristo

18Ex chamc'ojlb'il wu'uj, 'ayn̈ecx 'ec' 'a jun slajb' tiempo. 'Ix cab'ec to a jun 'ajc'ojl yajch 'a Cristo, 'oj pitzwc cha'an̈. Ax ticnec, niwn xo eb' 'ajc'ojl yajch 'a Cristo tox 'ix pitzw cha'an̈. Yuj cha, cojquec to 'ayn̈ecx 'ec' 'a jun slajb' tiempo. 19A eb' cha, x'el eb' 'a qui calec, palta man̈toc caw quitb'eymoc qui b'a yet' eb'. Octom caw quitb'eymec qui b'a yet' eb', to 'ixta', xcan eb' quet'ec. Palta 'ixta x'aj eb' yeli, sec tzcheclj 'eli, to man̈ quitb'eymoquec eb'.

20Palta a Cristo 'a'jnac Yespíritu Dios 'ayx quet' on̈. Yuj cha, cojquec qui masnil jun cuynb'il caw yel. 21May junc ex man̈ eyojcoc jun yel cha. Yuj cha, tzin tz'ib'n 'at 'ayex. Eyojc xon paxi, toxn may junc 'es 'a scal jun cuynb'il caw yel cha.

22Tic tzwalb't 'ayex, machtc eb' tz'a'n 'es. Atn eb' tzalni to a Jesús, man̈ 'Ac'b'ilc Yopiso Colwjumal. Atn eb' 'ajc'ojl yajch 'a 'a, yujto tzyal eb' to man̈ Yunnalc Dios. An̈jtona', matz ya'ch pax eb' sc'ojl 'a qui Mam Dios. 23Tzann̈j eb' tzalni to man̈ Yunnalc Dios Jesucristo, man̈ yico'oc qui Mam Dios eb'. Ax eb' tzalni to Yunnal Dios, atn eb' yic cha.

24Yuj cha, a jun cuynb'il xcab'ec, yictax on̈ 'ochc yico'oc Dios, yowlal an̈j tzca'c 'och 'a qui c'ojl 'a smasnil tiempo. Toto 'ixta tzcutjec ca'n 'och 'a qui c'ojol, to 'ixta', junn̈j cajc yet' qui Mam Dios, junn̈j cajc pax yet' Yunnal. 25Atn Jesucristo ya'jnac can sti 'ayn̈ec, to tzyac' qui q'uinlec 'a jun 'ejmn̈ej.

26Tic xwalb't 'ayx yuj jun tzo'n̈ eb' tznib'j tzex 'ixtn paxti'. 27A Jesucristo 'a'jnac Yespíritu 'ayn̈ junjn on̈ec. Yuj cha, man̈ yowlalc chuct junc 'anma tzon̈ cuynec, yujto a Yespíritu tzon̈ cuynec 'a smasnil tas. A jun tzo'n̈ cuynb'il tzyac' 'ayn̈ec, caw yel, may junc 'es 'aych 'a scal. Yuj cha, yowlal junn̈j tzon̈ 'ajc yet' Cristo, yujto 'ixta yaj yaln Yespíritu 'ayn̈ec.

28A ticnec ex chamc'ojlb'il wu'uj, yowlal junn̈j cajc yet' Cristo 'a smasnil tiempo, sec wach' ma'oj qui xiwec ax sjawi. Ma'oj qui q'uixwec pax 'a yojltac yic 'oj jawc cha. 29Cojquec xoni to a Jesucristo, caw tojl snab'en. Yuj cha, tznachj pax 'el cujec, toto tojl tzcutjec pax qui nab'en yet'oc, to 'ixta', yunnaln̈ec xo Dios.

Currently Selected:

1 Jn 2: CSS

Highlight

Compare

Copy