1 Cr 5
5
Eb' yin̈tl Rubén
1-3A Rubén, atn win sb'ab'l 'unnal Israel, ax eb' yunnal: atn Hanoc, Falú, Hezrón yet' Carmi. Palta a Rubén ma'ix yij smacl yic sb'ab'l 'unnab'ilal, yujn̈ej to syam cot win yistzil smam. A jun smacl yic sb'ab'l 'unnab'ilal cha, ata x'ajx can 'a eb' yunnal José, atn junx win yunnal pax Israel cha. A yic xb'ey tiempo, a Judá caw niwn yel'ch 'ix 'aj 'a yib'n̈ eb' yu'tac, yujto a 'a x'elt jun yajal, palta ax jun macl yic b'ab'l 'unnab'ilal cha, a 'a José, ata 'aycni.
4-6Eb' yin̈tl Joel 'a stzolil: atn Semaías, Gog, Simei, Micaía, Reaía, Baal yet' Beera. A Beera cha, yajl yaj 'a scal eb' yin̈tl Rubén, atn win 'ijxnac 'at 'a 'icha presoal yuj Tiglat-pileser sreyl chon̈b' Asiria.
7A eb' yican Beera cha, eb' to yajl yaji, a tzyal yaj stz'ib'x can sb'i smam yichm eb': atn Jeiel, Zacarías, 8yet' Bela, yunnal Azaz yixchicn Sema. A Sema cha, atn yunnal Joel. A Bela cha, ata 'e'nc cajn 'a Aroer. A slu'um, tzc'och to lum 'a Nebo, yet' 'a Baal-meón. 9An̈jtona', 'ix 'ec' cajn win 'a sti cot lum cusltac lum 'a stojlal 'aj tzq'uel c'u, yujto 'ix niwtj scajb'en noc' win 'a yol yic Galaad. A jun cusltac lum cha, tzc'och lum 'a sti a niwn a Éufrates.
10A 'a yol stiempoal rey Saúl, 'ix yac' eb' rubenita owl yet' eb' agareno, x'ajx ganar eb' agareno chi yuj eb'. 'Ix can cajn eb' 'a yatut eb', 'a smasnil yol yic Galaad 'a stojlal 'aj tzq'uel c'u.
Eb' yin̈tl Gad
11Eb' yin̈tl Gad, cann̈c cajn eb' 'a yojltac 'ec' eb' yin̈tl Rubén, 'a yol yic Basán, masnto 'a chon̈b' Salcá. 12A Joel sat yajl yaj 'a chon̈b' Basán cha, ax 'a spatquil, 'ix jaw Safán, Jaanai, yet' Safat. 13Ax jun tzo'n̈ xo yican eb', a tzyal stzol-l yaj smam yichm eb': atn Micael, Mesulam, Seba, Jorai, Jacán, Zía yet' Heber, ucwn̈ sb'ey eb' 'a smasnil. 14Atn eb' yunnal Abihail tic, win yunnal Huri, a slistail eb' smam yichm Abihail, atn stzol-l tic: Jaroa, Galaad, Micael, Jesisai, Jahdo yet' Buz. 15An̈jtona yet' pax Ahí yunnal Abdiel, yixchicn Guni, atn yajl yaj 'a scal eb' yican. 16Smasnil jun tzo'n̈ eb' cha, 'ix 'ec' cajn eb' 'a lum Galaad, 'a Basán yet' 'a yaldeail, yet' pax 'a smasnil 'aj wach' swa scajb'en noc' eb' 'a Sarón, masnto 'a smon̈jon eb'. 17Smasnil jun tzo'n̈ eb' cha, 'ix tz'ib'x eb' yet' yin̈til, yic 'aych Jotam reyl 'a Judá, ax Jeroboam 'aych reyl 'a chon̈b' Israel.
Yab'xil nan̈l yoxl 'in̈tal
18A eb' yin̈tl Rubén, yet' eb' yic Gad, yet' pax spacl eb' yic Manasés, 'ay 44,760 eb' soldado caw tec'an. Yet' eb' smacnb'il sat jul-lab', yet' eb' yespada, yet' eb' jul-lab'. Caw matz xiw eb', cuywnac eb' ya'n owal. 19'Ix yac' eb' owl yet' eb' agareno, atn eb' yin̈tl Jetur, Nafis yet' Nodab. 20'Ix 'och Dios yet' eb', yuj cha, 'ix 'ajx ganar eb' agareno yet' eb' 'aych yet' eb'. 'Ix can eb' 'a yol sc'ab' eb', yujto a yic wan ya'n eb' owl cha, 'ix sc'an eb' scolwal Dios. 'Ix colwj Dios yet' eb', yujto 'ix ya'ch eb' sc'ojl 'a 'a. 21Xlajw cha, 'ix yi'n 'at eb' jantcn̈ej no scajb'en noc' eb' 'ajc'ojl yajch 'a eb' cha, 'ay 50 mil no cameyo, 250 mil no calnelu, chab' mil no b'uru, yet' pax jun ciente mil eb' 'anma 'ix yij 'at eb' 'icha presoal. 22Til wal eb' 'ajc'ojl chi 'ix chami, yujto a jun owl cha, a Dios 'ay yico'. 'Ixta x'aj scan cajn eb' 'a jun tzo'n̈ slugar cha, masnto 'ix 'ijx 'at eb' 'a 'icha presoal.
23Ax junx spacl 'in̈tal eb' yic Manasés, yujto caw 'ix niwtj eb', yuj cha, 'ix c'och cajn eb' 'a jun lum lum 'ay 'a yol yic Basán, masnto tzc'och jun lum chi 'a Baal-hermón, atn Senir mto switzl Hermón. 24A eb' yajl yaj 'a scal eb': atn Efer, Isi, Eliel, Azriel, Jeremías, Hodavías yet' Jahdiel. Smasnil jun tzo'n̈ soldado cha, caw te'n eb', b'inab'il eb', yajl yaj eb' 'a eb' yican. 25Palta caw 'ix 'och eb' tenmtacl 'a qui Diosalec, atn sDiosal qui mam quichmec yet' eb'. Caw maysch'olnil eb'. 'Ix 'och eb' 'emmquilal 'a jun tzo'n̈ sdiosal eb' chon̈b' ya'jnac Dios lajwc 'el 'a sat eb'. 26Yuj wal cha, schecn Dios win Pul, atn win tzcuch pax Tiglat-pileser, sreyl chon̈b' Asiria, yic tzyi'n 'at win eb' rubenita, eb' gadita yet' spacl 'in̈tal eb' yic Manasés 'icha presoal 'a chon̈b' Halah, Habor, Hara, yet' 'a jun tzo'n̈ xo chon̈b' 'ay 'a stitc a Gozán. Ata xcann̈j eb'.
Currently Selected:
1 Cr 5: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
