1 Cr 10
10
Schaml Saúl yet' eb' yunnal
(1 S 31.1-13)
1'Ix yac' eb' filisteo owl yet' chon̈b' Israel, ax x'aji 'ix 'at eb' israel chi 'elc yuj eb' filisteo cha, caw niwn eb' israel chi xcham 'a lum witz tzcuch Gilboa. 2'Ix 'at eb' filisteo chi 'a spatquil Saúl yet' eb' yunnal. Smiln cham ewin filisteo chi eb' yunnal Saúl cha, atn Jonatán, Abinadab yet' Malquisúa. 3'Ix yamchj sjuln eb' Saúl, 'ix lajwi. 4Yuj cha, 'ix yaln 'ixtc 'a win soldado 'et'jnac syamc'ab' yic owal: 'Ij q'uet espada, tzlajw cha, tza tecn 'och 'ayin, sec wach' man̈oc jun tzo'n̈ chuc chon̈b'al tic 'oj tzaljoc in smilni, xchi.
Palta ax win soldado ajun yet' cha, ma'ix yal sc'ojl win sb'on tas xyal Saúl cha, yujto caw tzxiw winac. Yuj cha, 'ix yi'n q'uet win Saúl chi yespada, 'ix sjuln at n̈ojnjoc sb'a 'a yib'n̈ sjayl sn̈i q'ue'en. 5Ax yic xyiln win soldado ajun yet' cha, chajtlto xcham Saúl, yuj cha, sjuln 'at pax n̈ojnjoc sb'a 'a yib'n̈ sjayl sn̈i yespada jun xo, 'ix chami. 6'Ixta x'aj scham Saúl 'a jun c'u chi yet' 'oxwn̈ eb' yunnal yet' smasnil eb' 'ay 'a yatut. 7Ax yic 'ix yiln smasnil eb' israel cajn 'a jun pan̈n 'a'lic cha, chajtlto tox 'ix 'at eb' yit israelal eb' chi 'eloc, tox xcham pax Saúl yet' 'oxwn̈ yunnal, yuj cha, 'ix yactn can eb' schon̈ab', x'at eb' 'elc jun xo. Xlajw cha, ax eb' filisteo xc'ochcn cajn 'a schon̈b' eb' cha.
8Ax 'a junx c'u, 'ix 'at eb' filisteo, spojn 'ec' eb' tastc 'ay 'a eb' xcham cha. 'Ix 'ilchj Saúl yuj eb' yet' eb' yunnal, t'ocn 'ec' eb' 'a lum jolm witz Gilboa, chamnc xo eb'. 9Yajn̈j wal cha, 'ix yi'n 'el eb' spichl Saúl, 'ix yi'n 'el eb' sjolom, xyi'n 'at eb' yet' syamc'ab' yic owal. Yuj cha, schecn 'at eb' schecab' yic tz'at alxc yab' smasnil 'anma 'a yol smacb'en eb', yet' 'a jun tzo'n̈ sdiosal eb'. 10'Ix 'at ya'nc 'och eb' syamc'ab' Saúl chi 'a yol junc yatut sdiosal eb' cha, ax 'a yol yet'l jun sdiosal eb' tzcuch Dagón, ata 'ix 'at st'un q'ue eb' sjolm Saúl.
11A yic 'ix yab'n smasnil eb' 'aj Jabes 'a yol yic Galaad, tas 'ix yutj eb' filisteo Saúl cha. 12Yuj cha, 'ix smol aln smasnil eb' winc to caw wal tec'an, 'ix 'at yi'noc eb' sniwnal Saúl yet' yic eb' yunnal, 'ix yi'n cot eb' 'a Jabes cha. Ata 'ix mucx sb'acl eb' 'a yich jun te ma'ach'. 'Ix 'och eb' 'a c'ajb'c'ojlal 'a uque c'u yuj cusc'ojlal.
13-14'Ixta 'ix 'aj scham Saúl yuj smaysch'olnilal. 'Ix 'och smul yujto ma'ix syiclj schecnb'il Jehová. An̈jtona', a pax 'a jun 'ix 'ix tzc'umn spixn eb' chamnc 'anma', ata xit' sc'anb'c snab'en, man̈oc 'a Jehová sc'anb'ej. Yuj cha, 'ix smiln chamoc, ax 'a David yunnal Isaí, ata 'ix 'ajx can jun yopiso Saúl cha.
Currently Selected:
1 Cr 10: CSS
Highlight
Share
Compare
Copy
Want to have your highlights saved across all your devices? Sign up or sign in
Biblia Chuj San Sebastian © Sociedades Bíblicas Unidas, 1999.
