Lc 1
1
A Lucas max tz'ibentok jun un ti' bay Teófilo
1-2Ti chin tz'ibejtok jun un ti' ayach mamin Teófilo. Ay juntzan tzet yetal max uj co xol. A eb chi alon el k'anej Dios tinani', max yil eb juntzan tu' yet max chaon el yich. Max lajwi tu', max con is cuyon eb yin. Xiwil mac max jay yin nabal tz'ibencan yabixal juntzan tzet yetal max uj tu'. 3Ayin ti', mamin Teófilo, mayal in cuy juntzan tu' yin c'ojanc'ulalil masanil. Yuj tu' max in na' tol watx' chin tz'ibejtok ayach yin txolilal, 4yet watx' chojtaknej elok, tol yel juntzan tzet yetal mayal a cuy tu'.
Yaljubal Juan, cham ak'om bautismo albilcan yin ayokto
5A yet ayoc cham Herodes yin reyal bay yul yet Judea, ay jun sacerdote chi yik Zacarías, yetbi ba yetok jun makan eb sacerdote chi yik Abías.*fn* Elizabet bi yistzil cham tu'. Yinatil Aarón c'apax xal. 6Watx' beybal eb cawanil yul sat Dios. Yikem eb bay is chekbanil c'al bay is ley Cham Jajawil; yuj tu' xan c'am wal junok mac chi je' yaloni tol ay yobtakil eb. 7C'am junok yuninal eb, yujtol man unewomixok xal. Yetok c'apaxok, icham animaxa eb cawanil.
8A yet junel, yet max ajapnok tiempoal yak'wi serbil Zacarías yetok jaywanxa eb yetbi, 9max yaoc eb suerte, axcac'alta' beybal eb junjun el. A yiban Zacarías max ayc'ayi. Yuj tu' xan max octok yul templo Cham Jajawil, yin bet yak'on tz'a incienso suk'uk'i jab. 10A yet lanan yak'on tz'a tu', aycan eb anima txajlok yina masanil. 11A yet ayoctok tu', max ul tx'oxon ec' ba jun yángel Cham Jajawil bay Zacarías tu'. Max ulic' lecan bay jun pac' tz'eyil yaltaril incienso tu', bay yetc'ulal q'uexan k'ab Zacarías. 12A yet max yilon yin jun ángel tu', caw wal max c'ayaj c'ul, max xiwcan aj yuj. 13Axa yalon jun ángel tu' bay axca ti':
—Zacarías, manchak ach xiwi; mayal yab Dios a txaj. Yuj tu' xan, a etbi Elizabet, ok aljok jun is winak unin. Juan ok ak' yika'. 14Caw wal ok e' a tzalojc'ulal yin. Xiwil anima ok tzaloj aj yet ok yabeni tol mayal alji junok e yuninal. 15A jun unin tu', caw miman ok yun yeloc yul sat Cham Jajawil. Man ok yuc' vino, man ok yuc' an. Ayxa oc yalan yikbej Espíritu Santo yet ok aljok. 16Xiwil eb et israelal ok watx'nej oc ba yin Cham Jajawil Dios yuj jun a c'ajol tu'. 17A Juan tu' ok babjok satak Cham Jajawil. Axca wal is nabal Elías, c'al is yikbej, caytu' ok yun is nabal c'al is yikbej c'apaxok. Yuj tu' xan ok yak' chalej ba nabal eb mamej yetok eb uninalej. A' ok q'uexon c'apax nabal eb tenomtak yul sat Dios, yet watx' chi watx'ji oc beybal eb. Axca ton tu' ok yut yak'on na ba c'ul eb anima, cax ok q'uexon eb is nabal, yet watx' ay eb watx'xa is nabal yet ok jay Cham Jajawil, ẍi jun ángel tu'.
18Axa yalon Zacarías tu' bay, axca ti':
—¿Tzet ok wut wojtaknen elok tatol yel juntzan chal ti'? Yujtol ayin ti', caw wal icham inxa. Ixnamxa c'apax wetbi, ẍi.
19Axa yalon jun ángel tu' bay:
—Ayin ton Gabriel in, yak'omal in serbil Dios. Ayin max quin cheklaytek ul wal jun watx' abix ti' ayach. 20Axa tinani', majxa je' a k'anjab jabok, masantac'al ok aljok jun onenal max wal tu'. Yujtol maj aoc yin a c'ul tzet max wal ti', xan caytu' ok onej. Ato yet ok ajapnok tiempoal, cax ok yunen jun ti', ẍi jun ángel tu'.
21A eb anima chi echbanen yeltek Zacarías tu', max c'ayaj c'ul eb yujtol caw wal max mayji yul templo Dios. 22Axa yet max elolok, majxa je' k'anjab bay eb. Max naon el eb conob tu' tol ay junok tzet yetal max tx'ox Dios bay. Yechelxac'al chi yak' yetok is k'ab, yujtol majxa je' k'anjabi.
23Max ajapnok tiempoal lajwi yak'wi serbil xin, axa pax bay yatut tu'. 24Manto payok tu', max oc unin yin Elizabet. Oyeb xajaw ayxac'al ec' xal bay yatut. Max c'oli naobtanen axca ti': 25Yuj watx'c'ulal Cham Jajawil win, xan caytu' chi wunej, yet watx' c'amxa chi al-lay in k'umal yuj anima yujtol c'am wune', ẍi xal.
Yaljubal Jesús albilcan yin ayokto
26Wakeb wal xajaw tu', max chekontek Dios cham ángel Gabriel bay conob Nazaret, yul yet Galilea. 27Max ulic' bay jun ix k'opoj, c'amtoc'al winak chi k'umej, chi yik María. A jun ix tu', ayxa is trato yetok jun winak chi yik José, yinatil rey David. 28Max octok jun ángel tu' bay ayic' ix, max yalon bay ix axca ti':
—Tzalojan, ayoc Cham Jajawil Dios etok. Yelc'al miman is watx'c'ulal Cham max yak' ayach, ẍi.
29A yet max yilon oc ix yin jun ángel tu', max c'ayaj c'ul ix. Max naobtanen ix tzet max yal tu'. 30Max lajwi tu', max yalon pax bay ix axca ti':
—María, manchak ach xiwi, yujtol xiwil watx'c'ulal Dios max tx'ox ayach. 31A tinani', ok pitzc'oj aj jun winak unin en, cax ok ak' yik Jesús. 32Caw mimek winak ok yun yelocok. Ok binajok tol C'ajol Cham Axac'al Ocok. A Cham Dios Jajawil tu' ok aon oc e reyalok, cax ok occan q'uexelok cham rey David, cham is yichmam. 33A' ok oc e Yajawilok ayex israel ex ti' yin tojbalk'inal. C'am bak'in ok lajwok jun yopiso tu', ẍi jun ángel tu' bay ix:
34—¿Palta tzet ok yun jeon jun chal tu'? Ayin ti' c'amto wetbi, ẍi ix bay.
35—A Cham Espíritu Santo ok jay eban. Axa yipalil Cham Axac'al Ocok ok ayol eban axca junok asun. Yuj tu' xan a jun unin ok aljok tu', yetc'al Dios yayji. Ok binajok tol C'ajol Dios. 36A ecan Elizabet, caw wal ixnamxa, palta ok aljok jun is winak unin. Chi yal eb anima tol c'am bak'in chi jay junok yune', palta wakebxa xajaw yoc unin yin xal tinani'. 37Yujtol masanilc'al tzet yetal chi je' yuj Dios, ẍi jun ángel tu' bay ix.
38—Chekbej Cham Jajawil wayji; yuj tu', yunokab axca max al tu', ẍi ix bay.
Max lajwi tu', axa toj jun ángel tu'.
Max bet ulanelay Elizabet yuj María
39A yet jun tiempoal tu', ayman max toj María bay jun conob bay siquilal tx'otx' yul makbej Judea. 40Max apni oc ix bay yatut Zacarías, max yak'on ix cawil c'ul Elizabet. 41A yet max yaben Elizabet k'anjab María tu', axa yaj jucnaj jun unin ayxa oc yin tu', cax max oc xal yalan yikbej Cham Espíritu Santo. 42Axa yalon yin ipejal axca ti':
—Ach ti', yel miman watx'c'ulal Dios max tx'ox ayach yintak masanil eb ix jet ixal. Miman c'apax watx'ilal ok al-lay yin jun one' ok aljok tu'. 43Ayin ti', c'am jabok welapnok, axa pax ach ti' xin, txutx ach Cham Jajawil, palta chach jay pax quin ul a k'umeni. 44A yet max waben a k'anjab yet max ach jayi, max aj jucnaj jun unin ayxa oc win ti', cochxac'al tol max tzaloj aj max wabej. 45Ach ti', max aoc yin a c'ul tzet max yal Cham Jajawil ayach. Yuj tu' caw wal tzalojc'ulalil et, yujtol yowalil ok yunej, ẍi Elizabet tu'.
46Max lajwi tu', max yalon María axca ti':
Chi wal watx' k'anej bay Cham Jajawil yin masanil in c'ul.
47Caw wal chi tzaloj in c'ul yin Dios co Colomal.
48Ayin ti', yak'omal in serbil Dios, c'am welapnok jabok, palta max oc t'anan Cham win. Yuj tu', ok yal eb anima masanil tiempo tol watx' wet.
49Yujtol a Dios, Cham miman yikbej, xiwil watx'ilal max tx'ox ayin. Asanxanej oc Cham.
50Masanil tiempo chi ok' is c'ul yin masanil mac chi xiw bay.
51Max tx'oxilok tol caw miman yikbej, max can eb lues yalan yuj.
52Max yican el eb yajaw yin yopiso, axa eb yaynakil max yiaj can.
53Max yak' noj c'ul eb ay is wajil, axa bay eb beyom, c'am jabok tzet max yak' yet max chekon pax eb.
54Max oc jetok ayon israel on, is yak'omal on serbil ti'. Maj toj c'ayc'ulal yok' c'ul jin,
55axca yaloncan bay eb jichmam, yujtol yak'nakcan is ti' bay Abraham yin junelnej, c'al ayon is yinatil on ti', ẍi María tu'.
56Oxeb mi xajaw max betic' María tu' bay Elizabet, axa meltzoj bay yatut junelxa tu'.
Yaljubal Juan ak'om bautismo
57A yet max ajapnok tiempoal yalji yune' Elizabet, winak unin jun max alji. 58A yet max yaben eb cajan is cawilal, c'al eb yican, tol max tx'ox Cham Jajawil watx'c'ulal bay xal, max tzaloj aj eb yetok xal. 59Ukubixialxa yalji, max jay eb bay yatut Zacarías, yuj yalay oc jun yechelej chi yik circuncisión yin is mimanil jun unin tu'. Max yochej eb max yik Zacarías, yet watx' chi oc q'uexelok is mam tu'. 60Axa yalon xal txutxej tu' bay eb axca ti':
—C'amak, Juan ok yika', ẍi xal bay eb.
61—¿Tzet yuj xan caytu' ok ak' yika'? Tokwal ay junok caytu' yoc bi e xol, ẍi eb bay.
62Xan yin yechelejal max k'anlen eb bay is mam nak unin tu', tzet biejal chi yochej chi yik nak. 63Axa k'anon cham jabok tzet yetal bay chi tz'ibej ay tu', max tz'iben ayok: Juan chi yik jun unin ti', ẍi, max tz'iben ayok. Toxac'al max c'aycan aj c'ul eb masanil yet max yaben eb jun ti'. 64Yet-xac'al jun bek tu', max jakchaj ti' Zacarías k'anjabi. Max yalon is watx' k'anej bay Dios. 65Yuj tu', caw wal max c'ayaj c'ul jantak eb cajan is cawilal. Max binaj jun ti' bay masanil siquilal tx'otx' yul yet Judea tu'. 66A masanil eb max aben juntzan tu', caw wal chi naobtanej eb tzet wal yayji. Chi yalon eb axca ti': ¿Tzetlaj ok yun yeloc jun unin tu'? ẍi eb.
Caytu' max yal eb yin, yujtol ayoc yipalil Cham Jajawil yin.
Is bit cham Zacarías
67A ton Zacarías is mam jun unin tu', caw wal ayoc yalan yikbej Cham Espíritu Santo. Yuj tu' xan max ak'lay k'anjab aj yuj, max yalon axca ti':
68¡Jalek watx' k'anej bay Cham Jajawil, Cham co Diosal ayon israel on ti', yujtol max jay ayon is conob on ti', yuj con ul colon elok!
69Max yatek jun co Colomal caw miman is yipalil. A nan xol eb yinatil David, cham yak'omal serbil, a tu' ok aljok.
70Axca tu' max yut yaloncan Dios, yet max yak'balnen eb is chekbej yaloncan yet payxa, eb asan Dios aj cuenta yin.
71Atax yet tu' max yalcan Dios tol ok on is colil yul k'ab eb ajc'ul oc jin, c'al yul k'ab jantak eb chi chichon oc c'ul jin.
72Albil c'apax canok, tol ok ok' is c'ul yin eb jichmam. Man ok tok is trato c'ayc'ulal max yak' yetok eb, yujtol a jun is trato tu', asannej a' ay yet.
73Caytu' max yut yak'oncan is ti' bay jichmam Abraham yet max locban is bi bay.
74Max yalcanok tol ok on is colil yul k'ab eb ajc'ul jin, yet watx' yin c'am bilc'ulalil chi jak' serbil Cham
75yin tojolal, c'al asannejokab yin Cham chi jaoc co c'ul yin tojbalk'inal.
76Axa ach xin, ach in c'ajol, ok ach oc chekbejok Cham Dios Axac'al Ocok, yujtol ok ach babjok satak Cham Jajawil, cax ojc'al ok c'oli watx'nen eb anima is nabal, axca watx'ji junok be satak junok yajaw.
77Ach ok ak' nachaj el juj tzet ok yun co colchaji, cax ok elcan co yobtakil jiban,
78yujtol camc'ulnebil on yuj co Diosal, caw wal chi ok' c'ul Cham jin. Axca yaj can c'u, cax chon is tzektaneni, axca tu' ok yun jay Cham chekbiltek yuj co Diosal.
79Axa tzektanen yanimail eb ayic' xol k'ekk'inal tu', eb lanan toj bay camich. A' ok tx'oxon c'apax ayon tzet ok jut co beybal, yet watx' junc'ulal chon ayji ec' yetok, ẍi cham Zacarías.
80A jun unin tu' max ch'ibc'al ajok, cax max jayc'al is nabal. Max betlej ec' cajan bay tz'inan tx'otx', masantac'al max ajapnok tiempoal tx'oxon aj ba bay eb yet israelal.
Currently Selected:
Lc 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989