Jn 12
12
Yabixal yet max secoc María jun ambal suk'uk'i jab yin Jesús
(Mt 26.6-13; Mc 14.3-9)
1Obixokto yoc k'in Pascua bay Jerusalén, max apni oc Jesús bay Betania bay cajan Lázaro, nak max ictzoj aj yuj Jesús. 2A yet max apni oc Jesús, max oc jun miman loj yuj eb yuj Cham. A Lázaro tu' max low yetok eb. Axa Marta chi iwi eltek loj. 3A pax ix María xin, max yitek nan litro ambal suk'uk'i jab, chi yik nardo.*fn* A jun ambal tu', caw wal can is tojol. Max jayc'al ix bay Jesús cax secon oc ix yin yakan Cham. Lajwic'al tu', max joontak ix yetok is xil. Jun bek max nojil yul jun na tu' yuj jabil. 4Ay jun is cuywom Jesús chi yik Judas Iscariote, nak t'inan yaon oc Cham yul k'ab camich. A' max alon axca ti':
5—A jun ambal suk'uk'i jab ti', aymi junok 300 denario is tojol.*fn* Matawal tol max co txonilok, cax chi jak'on tojol bay eb meba', ẍi, chi tz'ak yaloni.
6Palta toc'al chi tz'ak yala', man yelok chi yala', ta a eb meba' tu' chi na'. Palta yujtol c'ubom tumin yayji, yuj tu' xan a' max ochen max tz'ak c'ubaj is tojol tu', cax chi yioncan el jabok yet yin ch'en, yujtol toc'alta' elk'om nak. 7Axa yalon Jesús bay nak axca ti':
—Bek a tzuon ix, yujtol a jun yal suk'uk'i jab ti', max c'ubaj ec' ix, yuj in bonlay yet c'ual in mukbanil. 8A eb meba' tu', ayc'al ec' eb e yetok. A pax ayin ti xin, man tojbalk'inalok ayin ec' e yetok, ẍi bay nak.
Eb max ochen chi yak' cam Lázaro
9Xiwil eb israel max abeni tol ayic' Jesús bay Betania, xan max toj eb yila'. Man asannejok Cham chi yochej eb chi yila', palta chi yochej c'apax eb chi yil yin Lázaro, yujtol max ictzoj aj xol eb camnak yuj Jesús. 10-11Yuj yictzojbail Lázaro tu', xan xiwil eb israel max yaoc c'ul yin Jesús. C'amxa chi yaoc eb c'ul yin eb sacerdote. Yuj tu' xan max lajtinej el ba eb yajawil eb sacerdote, cax chi yochen eb chi mak' cam Lázaro tu' c'apaxok.
Chi oc Jesús bay conob Jerusalén
(Mt 21.1-11; Mc 11.1-11; Lc 19.28-40)
12Xiwil anima max jay bay Jerusalén yuj k'in Pascua. Axa yet junxa c'ual max yaben eb tol lanan yapni oc Jesús bay tu'. 13Yuj tu' xiwil eb chi ion el xaklak an palma. Chi yiontok eb, cax chi toj eb chaon Jesús. Max aj yaw eb yin ipejal, chi yalon eb axca ti':
—Yuj wal dios. Al-layokab watx' k'anej bay Cham chekbiltek yuj Cham Jajawil ti'. Jalek watx' k'anej bay Cham co Reyal ayon israel on ti', ẍi eb.
14Max ilchaj jun no burro yuj Jesús, max aj yiban no' axca tz'ibelaycan yul tx'an Un bay chi yal axca ti':
15Ex aj Sión, manchak ex xiwi. Ilab wal jay e Reyal e xol. Ayaj yiban jun no yune' burro, ẍi tx'an Un tu'.
16A yet jun c'u tu', maj nachaj el juntzan ti' yuj eb cuywom Jesús. Ato yet max ilay paxaj Jesús satcan, cax max naontek eb, tol a yabixal Jesús tz'ibbilcan yul tx'an Un tu', axcac'al tu' max yun yeloc yuj eb.
17A eb ayic' yetok Jesús, yet max yawten eltek Lázaro bay mukan yet max ictzoj ajok, max yalil eb tzet max yil eb tu'. 18Yuj tu xan max toj eb anima tu' chaon Jesús, yujtol max yab eb yabixal jun milagro max uji.
19Max yalon eb fariseo axca ti':
—A tinani' c'amxa tzet watx' chi junej. Ilab wal masanil anima chi oc yetok, ẍi eb.
Chi yochej eb griego chi yil yin Jesús
20Ay juntzan eb griego max apni bay Jerusalén bay k'in tu', yuj yalon ba eb bay Dios. 21A eb tu', max jayoc eb bay Felipe aj Betsaida, bay yul yet Galilea, max yalon eb bay axca ti':
—Mamin, chi jochej chi jil yin Jesús, ẍi eb.
22Max toj Felipe yalon bay Andrés, cax max toj eb cawanil yalon bay Jesús.
23Axa yalon Jesús bay eb axca ti':
—Ayin ti', Chekbilintek yuj Dios xol eb jet animail, a tinani' lanan jay yorail txecloj elok, tol yel miman welapnok. 24Wal yel chi wal ayex, k'inalok ay junok ixim bak' trigo chi can yiban tx'otx', toc'al chi can caktu'. Ta chi muklayi, axca tol chi cami, palta chi aj pax ulok, mimanxa bak' chi yak'a'. 25A mac asannej wal is k'inal ay yelapnok yul sat, ok lajwokcan el is k'inal tu'. A pax mac c'am yelapnok is k'inal yul sat bay yulyibank'inal ti xin, a ton eb tu' ok cha k'inalej tol ayc'al yin tojbalk'inal. 26Ta ay mac chi ochen chin ak'on serbil, tzaklojokab wintak, yet watx' a bay ayin ec'ok, a tu' chi ayji c'apax ec'ok. Ta ay mac chin ak'on serbil, a in Mam ok paktzen bay eb, cax miman ok yun yeloc eb.
Max yaltek Jesús tzet ok yun cami
27A tinani', caw wal chi oc pitz'an cusc'ulal win, palta, ¿tzet ok wut waloni? ¿Tom ok wal bay Dios axca ti': Mamin, col in el yul k'ab jun yailal ok jay wiban ti', xin ta quin chi? Yuj ton jun ti' xan ayintek yuj. 28Mamin, txeclojokab elok tol miman elapnok, ẍi Jesús.
Lajwi tu xin, max yaben eb yoc jun k'anej satcan, tol max yal axca ti': Mayal in tx'oxo' tol miman welapnok. A tinani' xin, ok in tx'ox junelxa, ẍi jun k'anej tu'.
29Axa eb anima ayic' bay tu', max yab eb jun tu'; yuj tu' xan ay eb max alon axca ti':
—Tekan c'u jun max bil tu', ẍi eb.
Ay eb xin:
—Tekan ángel junok max k'anjab aytek bay Jesús ti', ẍi eb.
30Yuj tu xan max yal Jesús bay eb:
—Man wujok, xan max al-lay aytek juntzan ti', palta e yuj xan max al-layi. 31A tinani', a eb ay bay yulyibank'inal ti', ok beyc'ulnelay eb, cax ok in k'okon el jun yajaw bay yulyibank'inal ti' yin yopiso. 32A pax ayin ti xin, a yet ok in ilay aj bay sat tx'otx' ti', ok witek masanil anima ayin, ẍi Jesús.
33Max yal axca tu', yuj tx'oxon elok tzetbil ok yun cami. 34Axa yalon eb anima bay axca ti':
—A yul tx'an ley ayic' ayon, a tu' max jabej tol a Cham Cristo, ayc'al ec' yin tojbalk'inal. Yuj tu', ¿tzet xan chala' tol a jun Chekbiltek yuj Dios xol eb jet animail, yowalil ok ilay ajok? ¿Mactxel jun Chekbiltek yuj Dios chal tu'? ẍi eb bay.
35Axa yalon bay eb axca ti':
—Ayin chi wak' sakk'inal bay e yanimail, ayin ec' e nan e xol tinani', palta jabxanej tiempoal ayin ec'ok. Caw wal che watx'nej e beybal, yak'ban wal tol ayinto ec' jayebokxa c'ual e yetok. Ta c'amak, ok somchaj el e c'ul. Axca wal junok mac chi bey xol k'ekk'inal, c'am chi je' yilon bay chi ca toji, caytu' ok yun e yelocok. 36Ayin ti', aj sakk'inal in. Yuj tu' xan aek oc e c'ul win, yak'ban wal tol ayinto ec' e yetok, cax chi wak'on sakk'inal bay e yanimail yin junelnej, ẍi Jesús bay eb.
Lajwic'al yalon juntzan ti', max eli, max c'uban el ba bay eb.
Maj yaoc eb israel c'ul yin Jesús
37Caxc'al xiwil milagro max tx'ox Jesús bay eb, palta tokwal yuj tu' chi yaoc eb c'ul yin Cham. 38Cay ton tu' max yun yeloc tzet albilcan yuj Isaías, is chekbej Dios, yet max yaloncan axca ti':
Mamin, ¿mactxel max yaoc c'ul yin k'anej max al-layi?
¿Mactxel max nachaj el mulnajbal Cham Jajawil yuj? ẍican Isaías tu' yul tx'an Un Tz'ibbilcanok.
39Xan majc'alta' je' yaon oc eb yin c'ul. Ilab tol albil pax yuj Isaías junelxa axca ti':
40Axca tol a Dios chi makchen sat eb, chi watx' ak'nej pitbok eb, yet watx' axca tol c'am chi ilwi eb, cax c'am chi nachaj el yuj eb, yet watx' c'am chi meltzojtek eb bay Cham cax chi col-lay eb yuj Cham, ẍi.
41Yalnakcan Isaías juntzan ti', yujtol yilnak is mayk'ak'al Jesús, xan a ton yabixal ti' albilcan yuj.
42Caxc'al albilcan axca tu', palta ay eb israel max yaoc c'ul yin Jesús. Toltax eb yajaw, xiwil eb max yaoc yin c'ul. Asan tol c'am chi tx'oxil ba eb, yujtol chi xiw eb bay eb fariseo, yujtol talaj chi uktelay eltek eb yul nail is culto eb yuj eb. 43Chi yut ba eb caktu', yujtol chi yochej eb tol miman yelapnok eb yul sat anima. C'am chi na eb tatol ay yelapnok eb yul sat Dios.
A is k'anej Jesús ok beyc'ulnen anima
44Axa Jesús xin, yin ipejal max k'anjab eltek xol anima axca ti': A eb chi yaoc c'ul win, man asannejok win chi yaoc eb c'ul. Chi ya c'apax oc eb c'ul yin Cham cheknejintek. 45A eb chin iloni, lanan c'apax yilon eb Cham cheknejintek tu'. 46Ayin ti', max in jay ul wak'on sakk'inal bay eb anima bay yulyibank'inal ti', yet watx' a eb chi yaoc c'ul win, c'amxa k'ekk'inal yin yanimail eb. 47A eb chi aben in k'anej, ta c'am chi yikej eb, mayinnak ok waoc yailal eb, yujtol man yujok waon oc yailal anima xan max in jay bay yulyibank'inal ti', palta yuj wak'on colchaj eb, xan max in jayi. 48A eb c'am welapnok yul sat, eb c'am chi iken in k'anej, ayxa mac ok aon oc yailal eb, a ton in k'anej chi wal ti'. A in k'anej ti' ok aon oc yailal eb yet lajub c'ual. 49Yujtol man yulok wet chin k'anjabi, a in Mam cheknejintek, a' ak'nej is chekbanil ayin tzet chi ul wala'. 50Wojtak, yuj is chekbanil tu', xan chi je' chaoncan eb anima is k'inal tol ayc'al yin tojbalk'inal. Yuj tu', axca max yun yalon in Mam ayin, caytu' chi wut walon c'apaxok, ẍi Jesús.
Currently Selected:
Jn 12: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989