2 P 1
1
Cawil c'ulej
1Ayin ton Simón Pedro in, yak'omal in serbil Jesucristo. Is chekbej in c'apaxok. Ti chin tz'ibejtok jun in carta ti' ayex, ex che yaoc e c'ul yin Dios jetok on, xan lajan wal watx'il e yet axca jet ti'. Tix yuj ti' xan watx' jet, yujtol a co Diosal, a ton Cham co Colomal Jesucristo, caw watx' ton Cham. 2Yak'okab Dios miman watx'c'ulal, c'al junc'ulal ayex, yujtol e yojtakxa Cham, yetok Cham Jajawil Jesús.
Is beybal eb yet-xa Dios
3Ay juntzan tzet yetal caw yowalil chi oc juj, yet watx' chi ja wal oc co nabal yin Dios, yak'ban ayon ec' cayti'. Mayal yak' Cham masanil juntzan tzet yetal tu' ayon yuj yipalil, yujtol mayal yak' jojtaknej el Jesucristo. A awtenej on oc yetok, yujtol miman yelapnok Cham, cax xiwil is watx'ilal. 4Yuj is watx'il tu', xan tol max yak'can Cham is ti' ayon. A juntzan tzet albilcan tu', caw wal miman yelapnok, cax xiwil watx'il. Yuj juntzan tu', xan chi je' co colchaj el yul k'ab juntzan yob ochwanilej bay sat tx'otx' ti', yujtol a is nabal Dios ayoc jin yuj juntzan tzet albilcan tu'. 5Yuj tu xin, man k'okbilok tol chi jaoc co c'ul yin. Yowalil chi jak' c'apax jip co watx'nen oc co beybal. Chi cam wal co cuyon jelanil Dios. 6Co mitx'ek waay co ba yin tzet man watx'ok. Caw tec'an chi jut co ba. Asanokab yin Dios chi jaoc co nabal. 7Watx'okabc'al chi jut co nabal yin eb juẍtak, c'al yin eb janab, chi co camc'ulnelej c'apax co ba yetok eb.
8Ta a juntzan ti' yelc'ulal wal tol chi ji' can junjun c'u, caw ay jopiso yuj Dios chi yal tu'. Man nabaokc'al max jojtaknej el Cham Jajawil Jesucristo chi yal tu'. 9Palta a mac manchak beybalnen juntzan ti', axca tol makantoc'al sat eb, ma xin, axca tol c'am chi je' yilontok eb junok tzet yetal najat, yujtol c'amxa chi natek eb tatol ibilxa el is yobtakil eb yet yalantok. 10Yuj tu' ex wuẍtak, ex wanab, caw jak'okab jip jojtaknencan el sic'libil tol yel awtebil onxa, c'al sic'bil onxa el yuj Cham. Tatol axca tu' chi jut co ba, c'am bak'in ok etax el co nabal. 11Ta axca tu', c'am tzet ok on tenon oc wanaj yin joc yul k'ab Cham Jajawil Jesucristo Cham co Colomal. A yikbej Cham, ayc'al yin tojbalk'inal.
12Yuj tu', caxc'al e yojtakxa juntzan ti', caxc'al tec'anxa e waay yin juntzan cuybanilej caw yel bay ayoc e nabal, ok in jek e na'. 13Chin na' tol watx' chex wiptzej, cax chin jekon e na' juntzan ti', yak'ban tol iquis into ec'ok. 14Yujtol a Cham Jajawil Jesucristo max ak'on nachaj el wuj, tol manxa mimanok tiempo ayin ec'ok. 15Yuj tu xin, xan chi wak' wip, yet watx' ok je' e naonc'altek juntzan cuybanilej ti' masanil tiempo, yet maxax in cam tu'.
A eb max ilon mimanbilal Cristo
16Albilxacan juj ayex, tol ay yip Cham Jajawil Jesucristo, cax tol yowalil ok jay Cham yet is cayelal, palta a juntzan tu', man comon k'anejok. Man yulok jet max co naon ajok, yujtol ayon wal caw max jil Cham Jajawil tu' tol xiwil watx'il. 17Acaw ilbil juj, yet max ilay can yuj co Mam Dios. Max jab yalon Dios tol miman yelapnok Cham Jajawil tu'. Max yal aytek Dios xol tzekekial axca ti': A ton jun in C'ajol ti', camc'ulnebil wuj. Caw chin tzaloj yetok, ẍi aytek. 18A jay belan k'anej albil satcan tu', caw max cam jaben on, yujtol ayon ec' yetok Cham Jajawil bay jun tzalan bay max ulaytek Dios.
19Yetok c'apaxok, ayokto jay Cham Jajawil tu' cax max tz'ibelaycan yabixal yuj eb chekbej Dios. Ayic' tx'an Un bay Tz'ibbilcan tu' tinani'. A tzet chi yal tx'an Un tu', a caw yel. Caw watx' chi jut co ba, ta ac'ala' jaon oc co nabal yin tzet tz'ibbilcan yuj eb tu', yujtol a tx'an Un tu', lajan tx'an axca junok co tzektebal chi co tzek xol k'ekk'inal. Chon is tzektanej masantac'al chi sakbi, yet chi ajol c'u. Axca c'u tu', caytu' yet ok jay Cristo, axa yak'on mimanbok sakk'inal yin janimail tu'. 20A eb chekbej Dios yet payxa tu', ayoktoc'al max tz'ibenc'alcan eb yul tx'an Un juntzan tzet t'inan jayi, palta yowalil chi jojtaknej elok, tol c'am junok mac chi je' comonc'al chi yal tx'oklil tzet chi yal elapnok juntzan tzet tz'ibbilcan tu'. 21Yujtol a eb tu', c'am junok tzet yulc'al yet eb max naaj eb yin is nabal, max tz'ibencan ay eb, palta a Dios sic'nej el eb. Axa Cham Yespíritu Dios chi ak'on nachaj el yuj eb, tzetbil chi yut yaloncan el eb is k'anej tu', cax max tz'ibencan ay eb.
Currently Selected:
2 P 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989