1 Ts 1
1
Is yichbanil carta Pablo
1Ayin Pablo in ti', yetok Silvano, c'al Timoteo, chi jatok jun carta ti' ayex, ex creyente bay conob Tesalónica. Yet exxa co Mam Dios. Yet exxa c'apax Cham Jajawil Jesucristo. Yak'okabc'al Dios*fn* is watx'c'ulal, c'al is junc'ulal ayex.
Is watx' beybal eb aj Tesalónica
2A yet chon txajli junjuntak el, chex co natek, cax chi jalonc'al yuj diosalil bay Dios e yuj e masanil. 3Chex co natek satak co Mam Dios, tol caw wal chex mulnaj yin yet Cham, yujtol caw wal che ya ton oc Cham yin e c'ul. Chi co natek, tol caw wal che yak' serbil Cham, yujtol xiwil e camc'ulal yin. Yetok c'apaxok, caw wal tec'an che yut e ba, yujtol asan Cham Jajawil Jesucristo che yaoc yipok e c'ul. 4Ex wuẍtak, ex wanab, camc'ulnebil ex yuj Dios, jojtak tol a Cham sic'nej excan elok. 5A yet max on ec' jalon el k'anejal yet colbanilej ayex, man naba k'anejok max ec' jalil ayex, yujtol a Yespíritu Dios ayoc jetok. Jojtak sic'libil, tol caw wal yel jun abix tu'. E yojtak tzet beybalejal max ec' co beybalnej e xol, yet watx', watx' chex elocok.
6Ayex ti', max e chail yich e beybalnen co beybal. Max e beybalnej c'apax beybal Cham Jajawil. Caxc'al caw wal max e yab yail yet max e chaon k'anej Dios, palta max e cha' yin tzalojc'ulalil, yujtol a Yespíritu Dios ak'nej e tzalojc'ulal tu'. 7Yuj tu' xan a tinani', max e tx'ox jun watx' beybalej bay masanil eb jet creyenteal yul yet Macedonia tu', c'al bay eb yul yet Acaya. 8Yuj tu', ayex max e yak' ojtaknelay el yabixal Cham Jajawil bay junjun lugar. Tz'akan max yab eb aj Macedonia tu', yetok eb aj Acaya, tol che yaoc Dios yin e c'ul. Man asannejok eb max abeni, palta max ablay bay juntzanxa lugar. Yuj tu' xan manxa yowalilok, tol ayonto wal ok jalil e yabixal. 9A masanil eb max abeni, lanan yalon eb e yabixal, tol watx' max on e yut e chaon apnok, yet max on betic' e xol. Lanan c'apax yalon eb tzet max e yut e bekoncan juntzan tzet yetal max e yal-lej oc e diosalok, cax max e chaon el yich e yak'on serbil Cham Dios iquis, a ton Cham acaw Dios. 10Chi yal c'apax eb tol lanan e yechbanen yayol Cham C'ajol Dios bay satcan, a ton Cham Jesús, tol max ictzonelay aj xol eb camnak yuj Dios. A Cham chon coloncan el yul k'ab jun miman yailal ok jay yuj yowal c'ul Dios.
Currently Selected:
1 Ts 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989