Nahúm 1
1
Aju tk'oj Dios ti'j tnam Nínive
1Atzun tkanil lu tzaj tma'n Dios te Nahum aju aj Elcos. Aju tkanil lu ti'j tnam Nínive. 2Tocxix twitz Kman ti'j tcyakil ex nna'j tk'o'n t-xel mya ba'n. Nna'j tk'o'n t-xel mya ba'n cye keju in jaw cyi'n cyib ti'j ex at-xix tk'oj, ex in tzaj tk'oj cyi'j ke aj k'oj ti'j. 3Yaj in tzaj tk'oj Kman ex at nimxix tipumal, mlay tzic'x ti'j tu'n mi'n tcub tcastiw xjal at til. In bet Kman tuj cyk'ik' jbal ex xcyakinpaẍ, ex aju muj, atzun kuk in jaw cyu'n tkan. 4In xi tmayo'n aju mar ex bi'x in tzkij tu'n, ex in che tzkij cycyakil ke nima tu'n. Ke cojbil tuj tx'otx' Basán ex tuj Carmelo in che tzkij, ax icx in che tzkij ke bech ate' tuj Líbano. 5Ke nmak witz in che jaw lu'lun twitz, ex ke tal witz in che cub ulj twitz. Oc tyec'unte tib, in tzaj lu'lun tcyakil tx'otx' ex cyuc'ix keju najlke twitz. 6¿Alcye jun jacu cub we' twitz oc ttzaj tk'oj? ¿Alcye jun jacu tzic'x tu'n aju tk'oj? In tzaj nim ttx'u'jil ic tza'n k'ak', ex tu'n in che cub pax ke pic. 7Ba'nte Kman; ate jun colbil tuj tk'ijlalil xobajil, cwentin tu'n keju k'ukl cyc'u'j ti'j. 8Atzun keju in jaw cyi'n cyib ti'j che najel tu'n, ic tza'n in naj tcyakil tu'n jun nima otok ch'iy wen, ex ke aj k'oj ti'j che xel tlajo'n tuj klolj. 9¿Tiku'n in che ximane tu'n cyk'ojine ti'j Kman? Che najele tu'n te jumajx, mya il ti'j tu'n tcub cab maj cycastiwoye tu'n. 10Masque ic cyten ic tza'n ch'i'x t-sacun tib, ex masque chyomni cywi' tu'n k'e'n, che bajel tz'e'y te jumajx mer ic tza'n tzkij ch'im.
11Aya tnam Nínive, tuja etz aju xjal cub ximante tu'n tbinchante mya ba'n ti'j Kman; jun xjal k'ol nabl jumajx mya ba'n.
12Tu'ntzun jlu in tma'n Kman cye ke xjal etzan tu'n: Masque nimxix cybaj ke aj Asiria ex nimxix cyipun, pero at jun k'ij che bel byo'n ex che najel. Wu'ne ma che c'ixbisanjtze, pero ja'lo ya mlay che oc nc'ixbisa'ntle. 13Cbajel npaẍu'ne aju yuw tcub cyibaje ex che bel ntzakine ke caden toc cyi'je, chi Kman.
14Atzun cyeye aj Nínive, ma tma Kman cyi'je cyja': Mlay che tentl ke cyiyjile tu'n cucx ttzaj na'n cybiye; cbel nxitune tcyakil wik tilbilal ate' tuj tja cydiose, ex atzun che belex nmaku'ne ma chixin, porque jumajx mya ba'n keye.
Tkanil tu'n tnaj tnam Nínive
15Cyque'yinxe cywi' ke witz, lu sanjel tzul k'olte tkanil ba'n te colpibl cyeye. Akeye aj Judá, cyic'sa'n cube ke nink'ij; japunx cyu'ne aju o txi cytziyane te Dios. Ke xjal mya ba'n mlay che ultl k'ojlel cyi'je; ma che naj te jumajx.
Currently Selected:
Nahúm 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993