Malaquías 1
1
Aju tc'ujlalil Dios cyi'j aj Israel
1Atzun yol jlu tzaj tma'n Kman te Malaquías aju t-sanjel tu'n t-xi tma'n cye aj Israel.
2Chi Dios cye cyja': C'ujla'n keye wu'ne, atzun cyeye in cyma'ne: ¿Tza'n tten in tma'na ka c'ujla'n ko'ye tu'na? Che chiye. Atzunte Kman tzaj ttzak'we'n: ¿Baka mya cyerman cyib Esaú tuc'il Jacob, ex a Jacob nc'ujlaye, 3atzunte Esaú el wic'une? Aju tiwitz tx'otx' te Esaú oc wu'ne te tzkij tx'otx' ex xi nk'o'ne ttx'otx' tu'n tajben cye txcup te tjak' c'ul.
4Ex ka che chi aj Edom: Masque ma ko naje pero che jawil kbincha'ne juntl maj ke ktanmiye, ka che chi, atzunte Dios aju Tajaw Tcyakil in tma'n: Cjawil cybincha'n juntl maj, atzun weye cbel nxitune, ex aju tnam lu c'oquel tbi: Tnam jatum in binchet nim mya ba'n, ex aju nasyon c'oquel tbi: Nasyon tcub ttx'u'jil Dios tibaj te jumajx. 5Ax keye che que'yilte ex oc cyma'ye: Ma'xix te Kman toclen, max ma pon baj tkanil ti'jxi tmojonil cytx'otx' aj Israel.
E oc ic'le'n ke pal tu'n Kman
6Chitzun Kman aju Tajaw Tcyakil in xi tma'n cye ke pal: Ke c'wa'lbaj in che niman cyman, ex ke majen in che nimante cypatrón. Katzun akine Cymane, ¿tiku'ntzun minti' in chinx cynimane? Ex ka akine Cyajawe, ¿tiku'ntzun minti' in che xobe nwitze? Ic'un kine cyu'ne ex in cyma'ne: ¿Alcyetzun ma kbinchaye twitza tu'nju in tma'na keye ka ic'una ku'ne? Che chiye. 7Atzun ic'bil weye cyu'ne jlu: In cub cyk'o'ne ke pan tz'il tibaj n-altare ex in cyma'ne weye: ¿Alcyetzun ma kbinchaye tu'nju in tma'na keye ka in kbincha'ne mya ba'n ti'ja? Che chiye. Oc in cub cyximane ka minti' toclen n-altare atzun in cybincha'ne mya ba'n weye, 8oc in tzaj cyk'o'ne ke alumaj moẍ weye ex ke cox, ex ke yab: ¿Ba'npe jlu? Cyxi'chake ex cyk'onxe te gobernador, jacutzun cyile ka jacu tzalaj ti'j cyoyaje ex ka jacu che tzaj xtaline tu'n, chi Kman aju Tajaw Tcyakil. 9Cykaninxe te Dios tu'n ttzaj tz'e'y tc'u'j ki'j. Pero ¿ti tten tu'n ttzalaj Dios cyi'je ka cucx ma txi cyk'o'ne cyoyaje mya ba'n? 10Chitzun Kman aju Tajaw Tcyakil: Nokwit at jun cyeye xi lamolte ttzi njaye tu'ntzun mi'n tcub c'opit k'ak' nokx gan tibaj n-altare, porque minti' in chin tzalaje cyi'je ex mlay nc'amtle cyoyaje. 11Cycyakil nasyon twitz tx'otx' che nimal weye, ex tuj tcyakil part cbel cypatun storac te nimbil weye, ex tbanilxix cyoyaj ctzajel cyk'o'n weye. 12Atzun cyeye nno'c cyk'o'ne n-altare te minti' tajben oc in cyma'ne ka tz'il ex ka minti' tajben aju oyaj in cub k'ot tibaj. 13Ax icx in cyma'ne cyja': Ma ko sicte ti'j tcyakil jlu, che chiye. Atzun in chin el cyic'une, chi Kman aju Tajaw Tcyakil. In che tzaj cyi'ne ke alumaj elk'a'n in che tzaj cyu'ne ex ke cox ex ke yab. ¿Ocpe che c'metel ke cyoyaje lu wu'ne? Mlay, chi Kman. 14Tzajxwit tcastiw ju xjal in nic'an yol tu'nju otok tzaj ttziyan tu'n ttzaj tk'o'n weye jun alumaj tbanilxix cyxol ke talun, ex te tibajxi in tzaj tk'o'n aju alumaj at ttzacaj. Akine rey ma' woclene ex in che xob ke nasyon nwitze. Atzun yol jlu in tma'n Kman, aju Tajaw Tcyakil.
Currently Selected:
Malaquías 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993