Isaías 1
1
Ate Judá jun nasyon binchal il
1Tzaj tma'n Dios tyol te Isaías aju tcy'ajal Amoz, cyi'j ke aj Judá ex ti'j tnam Jerusalén, tuj tk'ijlalil tej cyten Uzías, Jotam, Acaz ex Ezequías te rey tuj tx'otx' Judá.
2Aya cya'j ex aya tx'otx', cybintze aju in tma'n Kman: Ma che baj nch'isane ke nc'wa'le, pero ma jaw cyi'n cyib wi'je. 3Aju wacẍ nne'l tnic' ti'j tajwil ex ju bur nne'l tnic' ti'j jatum in cu'x k'o'n twa tu'n tajwil; atzun ke aj Israel akeju etzan wu'ne, minti' nne'l cynic' wi'je ex minti' cynabl, chi Dios.
4Ay bec'bil cywitz ke xjal binchal il, aju cyil ic tten ic tza'n jun iktz alxix tcub cyibaj; ke xjal lu puro binchal mya ba'n ex jumajx ma che naj. Ma tz'el cypa'n cyib ti'j Kman, ma tz'el cyic'un aju Dios Xjan cye aj Israel ex ma cyaj cycolin. 5¿Tiku'n cyaje cucx tu'n tcub cycastiwoye? ¿Cucxpe che oquele te miban che bine? Tcyakil ti'j cywi'ye at ẍil ex jumajx ma baj cyipune. 6Tzajnix t-xe cykane ex max japun baj tuj cywi'ye, minti' ch'in ba'n at cyi'je, tcyakil cyi'je at ẍil ex c'ixble'n; ke tx'a'c ma jaket cytzi' ex mi a'l jun o tz'oc k'aninte, mi a'l jun o tz'oc potzin ch'in ti'j ẍil ex mi a'l jun o tz'oc k'onte ch'in aseyt ti'j tu'n tcub ta'w.
7Aju cytanmiye bi'x ma baj xitj ex ma jaw cyk'ak'al ke tnam. Cywitzxe ma txi cyi'n ke aj k'oj cyi'je tcyakil twitz cyawale. Tcyakil ma tz'oc ic tza'n jun lugar minti' cynajbil xjal tuj, bi'x ma naj cyu'n xjal ẍe tzaj tuj juntl nasyon. 8Ma cyaj ten tnam Sión ic tza'n jun tal pach tcub t-xol tkan uva, ic tza'n jun tal pach tuj tmij tkan melón ex ic tza'n jun tnam txolin cyten aj k'oj ti'jele. 9Nokwit mi xcyaj clo'n cab ox kbet tu'n Kman aju Tajaw Tcyakil, icxwitlo kten ic tza'n ke tnam Sodoma ex Gomorra.
Aju c'ulbil axix toc twitz Dios
10Akeye nejenel tuj Jerusalén cyuc'ix ke xjal, ic ma che oque ic tza'n ke aj Sodoma ex ke aj Gomorra. Cybintze aju in tma'n Kman cyeye ex cyk'ontz cywi'ye ti'j xnak'tzbil tzul tma'n cyeye.
11Chi Kman in tma'n: ¿Ti tajben weye tu'n tul cyi'ne nim chojbil? Ma baj nganiye cyi'j ke ẍne'l in cub cypatune ex ti'j t-sebyil tal wacẍ; minti' waje ti'j tchc'el tor ex tchc'el ẍne'l ex tchc'el tal chip. 12In che ule yec'ul cyibe nwitze, pero ¿alcye xk'mante cyeye tu'n cyic' bete ttxa'n npe'ne? 13Mi'n tzaj cyi'ne mastl cyoyaje weye, akeju minti' cyajben, mlayx tzic'x ta'w t-sibel storac wu'ne. In tzaj cytxco'ne ke xjal tu'n tic'set ac'aj xjaw ex k'ij te ojlabl, pero mlay tzic'x cynink'ije wu'ne ex aju mya ba'n in cybincha'ne. 14Ic'un ke cynink'ije wu'ne oc in cub cyic'sane ac'aj xjaw ex ju buybil tib nno'c cyu'ne; tcyakil jlu mya ba'n te weye ex mlay tzic'x wu'ne. 15Oc tjaw cyk'o'n cyk'abe twitz cya'j tu'n cyna'ne Dios, mlay che tzaj nbi'ne, porque nojni cyi'j cyk'abe tu'n chic'. 16Cytx'jom cyibe ex cyi'n ele aju tz'il cyi'je. Cyi'n ele cybinchbene mya ba'n nwitze ex cycolinxe tu'n cybinchanteye mya ba'n. 17Cyxnak'tzam cyibe tu'n cybinchanteye ju ba'n ex cyk'onque tilil tu'n cybinchanteye aju tz'aklxix, che onine cyi'j keju in che yajlanjtz, cybinchanxe cyi'j ke meba c'wa'l ex che coline cyi'j ke meba xu'j.
18Chi Kman in tma'n: Cytzaje, ko yolin tu'n tbant ti'j jlu ku'n. Masque cyakxix que'yin cyile wen, jacu tz'oc wu'ne te sak ic tza'n ttxa che'w, ex masque ic tza'n jun xbalun tocsa'n tc'a' cyak que'yin, pero jacu tz'oc wu'ne te sak ic tza'n sak lan tx'jo'maj wen. 19Ka ma txi cycuyine tu'n tbant cybine, che wa'le ti'j tbanil twitz awal in tk'o'n tx'otx'; 20katzun cucx ma che tene miban che bine, che cymele tuj k'oj. Akine Cymane in chin k'mante ju yol lu.
C'elel ti'n Kman aju mya ba'n tuj Jerusalén
21Akeye aj Jerusalén, nej ic cytene ic tza'n jun xu'j tcwentin tib, atzun ja'lo ma che oque ic tza'n jun xu'j jawni twitz cyuc'il xinak. Nej cycyakil keye tz'aklxix ex in che bete tuj tumelxix, atzun ja'lo ma che oque te byol xjal. 22Nej ic cytene ic tza'n sak pwak, atzun ja'lo ma che oque ic tza'n tz'is, ic cytene nej ic tza'n ta'l twitz uva tbanilxix, atzun ja'lo ma che oque ic tza'n ta'l twitz uva smo'n tuc'il a'. 23Ke nejenel ate' cyxole miban che niman ex cyamiw cyib cyuc'il elek'. Cycyakil in cyc'mo'n pwak tu'n mi'n tcub cysentens xjal cyu'n, ex o'cx cyaj tu'n t-xi k'o'n oyaj cye. Minti' in xi cybincha'n cyi'j ke meba c'wa'l ex cyi'j ke meba xu'j oc in che pon xtisil.
24Cyja'tzun in tma'n Kman aju Tajaw Tcyakil, aju at tipumal ex Cydios aj Israel, chi cyja': O'cxtzun ja'lo, wu'ne cchjetel cyi'j ke aj k'oj wi'je ex c'oquel t-xel wu'ne. 25Cbel nk'o'ne cycastiwoye tu'n tel wi'ne tcyakil mya ba'n cyi'je, ex c'oquex nk'o'ne cycyakil cybinchbene mya ba'n tuj k'ak' tu'ntzun cynaj te jumajx; ax icx c'elel wi'ne tcyakil ttz'ilil in bant cyu'ne. 26Che oquel nk'o'ne juntl maj ke jwes cyxole ic tza'n nej, ex ke aj nabl ic tza'n keju e ten nej. Octzun tbant jlu wu'ne, c'oquel k'ma'n juntl maj cybiye: Aju tnam jatum ate' ke xjal tz'aklxix ex ocslalxix ke.
27Tu'nju tz'aklxix kine ex tu'nju colbil at wuc'ile, che tzokpetel ke xjal najl tuj tnam Sión, akeju c'ajetz ti'j cyanmi; 28atzun keju miban che niman ex ke aj il che najel, ex keju nne'l cypa'n cyib wi'je che cymel.
29Ctzajel cych'ixwiye cyi'j tze' c'ol ex cyi'j tkan awal nim in che tzalaje cyi'j, akeju jaw cysc'o'ne tu'n cycub tene c'ulul cywitz ke tilbilal. 30Ic che oquele ic tza'n jun tze' c'ol in tzaj tz'ak t-xak oc ttzkij, ex ic tza'n tkan awal minti' a' te a'lbil te. 31Aju xjal at nim tipun c'oquel ic tza'n tzkij ch'im, ex aju tak'unben c'oquel ic tza'n c'ech; junx che c'antel cycabil ex mi a'l cbel yupinte cye.
Currently Selected:
Isaías 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993