3 Juan 1
1
Jun k'olbebl tu'n apostl Juan
1Akine ansyan in xi ntz'ibane teya Gayo, axix toc at nc'u'je ti'ja.
2In chin cubsane twitz Dios ti'ja erman, aya at nc'u'je ti'ja, cuchiwt tu'n tel ba'n teya tuj tcyakil ex tu'n ttena tuj txubtxaj ic tza'n tanmiya ba'n ta'. 3Porque nimxix in tzalaje tej cyul junjun erman ex tzaj cytx'olba'n ti'ja, cyma ka in japunxix tu'na tuj tcyakil, porque cucx toc lpe'ya ti'j ju yol axix toc. 4Atzun mas in chin tzalaje ti'j jlu, oc nbinteye ka o'cx in che oc lpe' ke nc'wa'le ti'j ju yol axix toc.
In yolin Juan ba'n ti'j Gayo
5Erman, at nc'u'je ti'ja, ba'nxix in tbincha'na oc in ajbena cye erman, masque minti' ojtzki'n cywitz tu'na. 6Tej cyul tzalu tzaj cyma'n cywitz ke ocslal ti'j ju tc'ujlalila cyi'j. Ba'nxix in tbincha'na ka ma txi tk'o'na ch'in onbil cye tuj cybe, porque in che ajben te Dios. 7Porque ma che ex tuj cybe nok tu'nju at cyc'ujlalil ti'j Crist, ex minti' ch'in onbil o cyc'am cye xjal mya ocslal ke. 8Cyja'tzun, ilxix ti'j tu'n cyc'monjtz ke jlu ku'n ex tu'n t-xi kk'o'n ch'in onbil cye, tu'ntzun kak'nan junx cyuc'il tu'n tpacbanjtz ju yol axix toc.
Mya ba'n tmod Diótrefes
9Xi ntz'ibane jun u'j cye ocslal, pero ate Diótrefes taj tu'n toc te nejenel cyxol, ex minti' in xi tniman kyole. 10Cyja'tzun, ka ma chinxe tu'n npone cyuc'ile, cxel nma'ne te aju mya ba'n in tbincha'n, in yolin toc tu'n yol mya ba'n ki'je ex in si'min yol ki'je. Ex mya conporm in cyaj tu'n jlu, ax icx minti' in che tc'mo'n ke erman in che pon, ex minti' in tk'o'n permis cye mastl ocslal akeju cyajbil tu'n cyc'monjtz erman cyu'n, ex in che etz tlajo'n cyxol ke ocslal.
11Aya erman at nc'u'je ti'ja, mi'n tz'oc lpe'ya ti'j ju mya ba'n, nok o'cx ti'j ju ba'n. Aju xjal in tbincha'n ba'n, te Dios te; pero aju xjal in tbincha'n mya ba'n, minti' ojtzki'n Dios tu'n.
Ate Demetrio jun yec'bil ba'n
12Cycyakil xjal in che yolin ba'n ti'j Demetrio, ax icx aju tbinchben in tyec'un ka ba'n tmod, ax icx keye in ko yoline ax toc ti'j, ex ba'n tu'na aju kyole axix toc.
Jun yol te mancbil
13Nimcu at tu'n t-xi nma'ne teya, pero mi'n wajbile tu'n t-xi ntz'ibane tu'n tint ex tu'n plum; 14porque ximan wu'ne mya yajxi tu'n npone que'yil teya; octzun ko yolil ex c'oquel kque'yin kwitz.
15Cuchiwt tu'n ttena tuj txubtxaj. In xi k'olbe'na cyu'n ke amiw. K'onxa nk'olbeble cye teyle junjun kamiw.
Currently Selected:
3 Juan 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993