2 Crónicas 1
1
Xi tkanin Salomón tu'n ttzaj tk'o'n Dios tnabl
1 Reyes 3.3-15
1O cyuwsanjtz Salomón aju tcy'ajal David tuj tcawbil, porque ate Kman aju Tdios o ten tuc'il, cyja'tzun o ch'iyxix toclen. 2E tzajtzun ttxco'n Salomón cycyakil aj Israel: Ke nejenel cye soldad, akeju at jun milchak soldad tuj cycwent ex keju at jun syentchak soldad tuj cycwent, ke jwes, ex cycyakil ke nejenel te junjun c'loj aj Israel at cyxilen cyxolx. 3Cycyakil xjal otok che chmet tuc'il Salomón e je'x tuj lugar te c'ulbil tuj Gabaón, porque atzun ta'tok ja xbalun te mojbabl tibil tuc'il Dios, aju otok bant tu'n tmajen Dios Moisés tuj lugar tzkij tx'otx'. 4Pero otok tzaj ti'n David ju cax c'ubl tley Dios tuj tnam Quiriat-jearim, ex ul ti'n tuj Jerusalén tuj lugar jatum otok bant tten tu'n, porque otok jaw tbincha'n jun ja xbalun tu'n tocx ten cax tuj. 5Aju altar k'an c'uxbil, aju otok baj tbincha'n Bezaleel aju tcy'ajal Uri ex tal tchman Hur, ax icx axtok ta' tuj Gabaón, tcub twitz ja xbalun te Kman. Tujtzun lugar lu xi' Salomón ex cycyakil xjal c'ulul te Kman.
6Jaxtzun Salomón jatum ta' altar k'an c'uxbil, aju tcub twitz Kman twitz ja xbalun te mojbabl tibil tuc'il Dios; tibajtzun altar lu cub tpatun Salomón jun mil alumaj te jun oyaj te Kman.
7Tujx ju konic'an lu, cub tyec'un tib Dios twitz Salomón ex tma: Kanintza weye alcye tajbila ex jacu txi nk'o'ne.
8Atzunte Salomón xi ttzak'we'n te Dios cyja': Nimxix o tc'ujlaya David aju ktzan nmane, ex a kine ma chin oc tk'o'na cawil te t-xel. 9Atzun ja'lo Nman Dios, japunx tu'na aju tzaj tma'na te David aju ktzan nmane, tu'nju ma chin oc tk'o'na te rey cyibaj tnam xjal nimxix cyajlal ex mlay bant cyajlanjtz. 10Cyja'tzun k'ontza nnable ex wojtzkible tu'ntzun cyxi nẍaklune ke tnam xjal lu; porque ¿alcye jun jacu bant tcawin cyibaj ke xjal etzan tu'na nim cyajlal? Chi Salomón.
11Tzajtzun tzak'we'n Salomón tu'n Dios cyja': Tu'nju ma tzaj tkanina jlu weye, ex minti' ma tzaj tkanina tu'n tten tk'inumabla, mi tu'n tjaw nimsa'na, mi tu'n cycyim ke aj k'oj ti'ja, ex mi tu'n t-xi lak'e' tuj tank'ibla, nok o'cx ma tzaj tkanina tnabla ex tojtzkibla tu'n tbant tcawina cyibaj ke xjal etzan wu'ne, ex wu'ne ma tz'oc nk'o'na te rey tu'n tcawina cyibaj, 12cyja'tzun cxel nk'o'ne tnabla ex tojtzkibla, ax icx cxel nk'o'ne tk'inumabla, ex cjawil nimsa'na; ctel mas tnabla ex tk'inumabla cywitz ke rey akeju e ten nej na'nxtok toc teya te rey, ex cywitz keju che oquel te rey te tibajxiya.
13Te tibajxi ajtztzun Salomón tuj lugar te c'ulbil tuj Gabaón, aju tcub twitz ja xbalun te mojbabl tibil tuc'il Dios, pon tuj Jerusalén ex o cawin cyibaj aj Israel.
Oc ten Salomón xc'a'mil cyi'j carwaj ex chej cabay
1 Reyes 10.26-29; 2 Crónicas 9.25-28
14Bajtzun tchmo'n Salomón ke carwaj ex ke chej cabay. Attok jun mil tuc'il cyaje syent tcarwaj ex cablaj mil tchej cabay. Ake jlu e ocx tk'o'n Salomón cyuj ke tnam jatum ate' ke cwartel cye carwaj te k'ojbil, ex at carwaj ex cabay ax e ocx tk'o'n tuj lugar nikayin ttxlaj tuj Jerusalén. 15O chmet nimxix sak pwak ex k'an pwak tuc'il rey Salomón tuj Jerusalén, mer ic tza'n abj; ex nim tze' wi'ten o chmet, mer ic tza'n tkan higo in tzaj ch'iy tuj c'ul tuj chk'ajlaj t-xe witz. 16Ke chej cabay te Salomón atzun in che tzaj k'i'n tuj Ejipt ex tuj Cilicia, porque ke comersyant te Salomón in tzaj cylak'o'n ma chixin. 17Oc in tzaj cylak'o'n jun carwaj tuj Ejipt, kak syent sak pwak twi', ex atzun twi' jun chej, jun syent tuc'il 50. Ex cycyakil ke rey cye aj Hetey ex cye aj Siria in xi cylak'o'n ke jlu cyuc'il ke tmajen Salomón.
Currently Selected:
2 Crónicas 1: MAMH
Highlight
Share
Copy
Want to have your highlights saved across all your devices? Sign up or sign in
Mam del Norte © Sociedades Bíblicas Unidas 1993