Mt 5
KQC

Mt 5

5
Ch'owen pa ruwi' ri qitzij kikoten
1Y toq ri Jesús xerutz'et chi e janila chi winaqi' ri kimolon-ki' chiri', rija' xjote-el pa ruwi' ri juyu', y xtz'uye' k'a qa. Y k'ari' xkimol-apo-ki' ri rutijoxela' rik'in. 2Y jari' toq ri Jesús xch'on k'a richin yerutijoj, y xubij:
3Jebel ruwa-kiq'ij ri noqaqa chikik'u'x chi kan nik'atzin ri Dios chupan ri kik'aslen,
roma rije' kan ye'ok-wi chupan ri aj-chikajil ajawaren.
4Jebel ruwa-kiq'ij ri ye'oq' wakami,
roma rije' kan xtibekuqubex kik'u'x.
5Jebel ruwa-kiq'ij ri kiqasan-ki',
roma rije' xke'ichinan ri ruwach'ulew pa ruq'a' ri Dios.
6Jebel ruwa-kiq'ij ri kan nik'at kánima chirij ri ruchojmilal;
ri Dios xtuben chike chi xtich'uch'u' ri kánima.
7Jebel ruwa-kiq'ij ri kan nikijoyowaj kiwech ch'aqa' chik,
roma rije' kan xtijoyowex chuqa' kiwech.
8Jebel ruwa-kiq'ij ri ch'ajch'oj kánima,
roma rije' kan xtikitz'et ruwech ri Dios.
9Jebel ruwa-kiq'ij ri yeqasan ruwi' oyowal,
roma rije' xtibix chike chi e ralk'ual ri Dios.
10Jebel ruwa-kiq'ij ri nikik'owisaj tijoj-poqonal, roma choj ri kik'aslen chuwech ri Dios,
roma rije' kan xke'ok chupan ri aj-chikajil ajawaren.
11Jebel ruwa-iq'ij rix, toq xkixyoq', xkixtzeqelibex y xtitz'uk-tzij chiwij woma yin. 12Kan titze'en k'a iwech y kixkikot janila, roma nim rajel-ruk'exel ri xtik'ul chila' chikaj. Ri xtik'owisaj rix, kan keri' chuqa' xkik'owisaj ri e q'alajirisey ruch'abel ri Dios ri xek'oje' ojer kan.
Ri ye'atz'amin y ri yesaqirisan kik'aslen ri winaqi' chuwech re ruwach'ulew
13Ja rix ri ix achi'el atz'an chikikojol ri winaqi'. Jak'a wi ta ri atz'an nik'is ta el ri ratz'amil, xa kan man jun chik k'a banel richin ta natz'amin. Xa man jun chik k'a nik'atzin-wi; xa kan xaxe chik k'a nik'atzin chi nik'aq-el y yeq'ax ri winaqi' pa ruwi'.
14Rix kan ix achi'el saqil chuwech re ruwach'ulew, achi'el jun tinamit ri k'o pa ruwi' jun juyu' ri man tikirel ta richin nrewaj-ri'. 15Roma rix man jun bey k'a nitzij ta jun q'aq' richin nisaqirisan y nijupuba' ta kan jun bojo'y pa ruwi'. Ri q'aq' ri nitzij kan richin k'a nisaqirisan; roma ri' nikanoj jun k'ojelibel ri nitz'uyuba-wi, richin keri' kan yerusaqirisaj konojel ri ek'o pa jay. 16Kan keri' ta k'a xtisaqirisan ri ik'aslen rix chikiwech ri winaqi'; Richin keri' toq xtikitz'et k'a ri utzilej taq ibanobal, ri winaqi' kan xtikiya' k'a ruq'ij-ruk'ojlen ri aj-chikajil qatata'.
Ri Jesús xuya' jun tijonik pa ruwi' ri pixa'
17Man k'a tich'ob chi yin xipe chuyojik ri pixa' ri ruya'on kan ri Moisés, y ri wuj ri kitz'iban kan ri ojer taq q'alajirisey ruch'abel ri Dios. Yin xipe richin ninben ronojel ri kibin kan rije'. 18Roma kan qitzij ninbij chiwe, chi ronojel ri tz'ibatel kan chupan ri pixa', kan xkebanatej-wi. Re ruwach'ulew y re kaj xa xkek'is k'a. Jak'a ri e tz'ibatel kan chupan ri pixa' kan xkebanatej-wi, y man jun xtik'oje' kan chaq keri'. 19Xabachike wineq ri nuq'ej ruwi' jun chike ri nubij chupan ri pixa', stape' ta jun tzij ri achi'el xa ta man jun rejqalen niq'alajin; y kan keri' chuqa' yerutijoj-wi ri ch'aqa' chik winaqi'; ri nibanon keri', xa man jun k'a ok ruq'ij xtik'oje' chikikojol ri ek'o chupan ri aj-chikajil ajawaren. Jak'a ri wineq ri nibanon ronojel ri tz'ibatel chupan ri pixa' y kan keri' chuqa' yerutijoj-wi ri ch'aqa' chik winaqi', ri nibanon keri' kan xtik'oje' k'a ruq'ij chikikojol ri ek'o chupan ri ajawaren ri'. 20Roma ri', rix ri niwajo' yixok chupan ri aj-chikajil ajawaren, kan nik'atzin k'a chi ri ik'aslen más ta choj chuwech ri kik'aslen ri achi'a' etamanela' chirij ri pixa' y chuwech ri kik'aslen ri fariseo.
Ri k'o chi niban toq k'o oyowalen
21Rix kan iwak'axan k'a ri xbix chike ri qawinaq ojer kan chi man kekamisan. Y xabachike k'a wineq ri nikamisan, kan aj-mak-wi y k'o chi niq'at-tzij pa ruwi'. 22Jak'a yin ninbij chi wi k'o ta jun ri, stape' ta xaxe royowal ri nipe chire jun wineq, kan nimakun-wi y kan k'o chi tiq'at-tzij pa ruwi'. Chuqa' ri nibin chire jun chik wineq chi maneq runa'oj; ri nibin keri', kan aj-mak chuqa', roma ri' kan ruk'amon chi nuk'uex chikiwech ri achi'a' ri pa komon yeq'aton-tzij richin chi niq'at-tzij pa ruwi'. Y xabachike k'a ri nibin nakanik chire jun chik wineq, ri' xa kan oyoben chik roma ri q'aq'.
23Roma ri' wi rat kan atk'o chik apo rik'in ri porobel richin chi naya' jun sipanik chire ri Dios y jari' toq noqaqa chi'ak'u'x chi ri awach'alal royowal chawe, 24kan taya' k'a kan ri sipanik chiri' akuchi k'o-wi ri porobel, y jari' kabiyin rik'in ri wineq ri'. Tabechojmirisaj kan ri banatajineq chi'ikojol. Y toq achojmirisan chik kan y junan chik iwech, k'ari' katzolin y tasuju' ri sipanik chire ri Dios.
25Wi k'o ta oyowalen chi'ikojol, kan tachojmirisaj chi'anin rik'in ri etzelanel awichin, rokik xa k'a ri' ichapon-el bey pa q'atbel-tzij, roma wi xa man keri' ta xtaben, ri sujunel chawij xkarujech pa ruq'a' ri q'atoy-tzij, y re q'atoy-tzij re' xkarujech-el pa ruq'a' ri chajiy cárcel, y rija' xkaberutz'apej kan. 26Y kan qitzij wi ninbij chire ri keri' nik'uluwachin, chi xa kan man xtel ta k'a pe ri chiri' pa cárcel, k'a toq rutojon chik na kan ronojel ri kan k'o chi nutoj.
Tijonik pa ruwi' ri winaqi' e k'ulan
27Rix kan jebel iwetaman ri xbix kan ojer chi jun wineq ri k'ulan, man tukanoj jun chik richin nimakun rik'in. 28Jak'a yin ninbij chi xabachike wineq ri nuya' ruwech chirij jun chik, ri nibanon keri', pa ránima xa kan xmakun yan.
29Xa roma ri' wi jun runaq'-awech nibanon chawe chi yamakun, más utz tawelesaj y tatorij-el. Roma más utz chi xaxe jun chike ri runaq'-awech nibe kan y mani kan chijun ri ach'akul ri nibe kan pa q'aq'. 30Chuqa' wi xa jun chike ri aq'a' nibanon chawe chi yamakun, más utz chi tachoyo' y tatorij-el. Roma más utz chi xaxe jun chike ri aq'a' nibe kan y mani chi kan chijun ri ach'akul ri nibe kan pa q'aq'.
Ri winaqi' ri e k'ulan man utz ta chi nikijech-ki'
31Y chuqa' iwetaman chi ri ojer kan xbix chi wi jun achin ri man nrajo' ta chik ri rixjayil y nujech-ri' rik'in; tubana' jun wuj ri richin jachojri'il y tuya' chire ri ixoq. 32Jak'a yin ninbij chiwe chi ri achin ri nujech-ri' rik'in ri rixjayil y xa man roma ta chi ri ixoq xukanoj ta chik jun achin; ri achijlonel ri' kan nuben-wi k'a chire ri rixjayil chi nimakun. Y wi k'o ta chik jun achin ri nik'ule' rik'in ri ixoq ri rujachon ri', ri achin ri' kan nimakun-wi.
Ri Jesús xch'on pa ruwi' ri ya'on-tzij
33Y chuqa' rix kan jebel iwetaman ri xbix chike ri qawinaq ojer kan, chi man tikiq'ej ruwi' ri ya'on-tzij ri nikiben. Xa kan tikibana' k'a ri xkiya' kitzij chire richin nikiben chuwech ri ajaw. 34Jak'a yin ninbij chiwe chi man jun bey tiben jun ya'on-tzij pa rubi' ri kaj, roma kan ja ri chila' chikaj k'o-wi ri rajawaren ri Dios. 35Ni man tiya' itzij pa rubi' ri ruwach'ulew, roma ja re' ri rupalibal ri Dios, ni man chuqa' tikusaj ri rubi' ri Jerusalem, roma re tinamit re' kan richin ri nimalej rey. 36Ni man tiben jun ya'on-tzij y ninataj ri rusumal-iwi' roma rix xa kan man xkixtikir ta xtiben chi jun rusumal-iwi' xtok ta seq o q'eq. 37Ronojel k'a ri ich'owen kan xaxe k'a ri qitzij; wi ja' kan jari' k'a, y wi ni kan ni k'ari'. Roma wi xa xtiben jun ya'on-tzij xa kan niq'alajin chi k'o itzel pan iwánima.
Man tiben ruk'exel ri itzel niban chiwe
38Y rix kan jebel iwetaman ri xbix chike ri qawinaq ri ojer kan, chi ri nelesan jun runaq'-ruwech jun wineq, kan keri' k'a chuqa' tiban chire ri xbanon. Ri niq'ajo-el rey jun wineq, kan keri' k'a chuqa' tiban chire ri xbanon. 39Jak'a yin ninbij chiwe chi man tipaba-iwi' chuwech ri nibanon etzelal chiwe. Wi xa k'o k'a jun ri nupaq'ij ri ipalej, xa kan utz k'a niya-iwi' pa ruq'a' jun bey chik. 40Y wi k'o jun wineq ri kan yixruchop chi oyowal roma nrajo' nrelesaj kan ri itziaq chiwij, kan man k'a tipoqonaj niya' kan chire; y pa ruwi' ri', kan tiya' k'a kan chuqa' ri iq'u' chire. 41Wi jun aj-labal nibanon chiwe chi tik'uaj-el ri rejqa'n, xa kan rik'in k'a kikoten tik'uaj ri ejqa'n ri', y chuqa' man tipoqonaj nisuj-iwi' richin nik'uaj más nej. 42Y wi k'o jun ri k'o nuk'utuj chiwe, kan tiya' k'a chire. Y wi k'o chuqa' nuk'utuj pa qajik chiwe, man tipoqonaj niya-el chire.
Ke'iwajo' ri ye'etzelan iwichin
43Rix kan jebel iwetaman ri xbix ojer kan chi kan ruk'amon-wi chi kan ke'iwajo' ri iwachpochel. Jak'a ri ye'etzelan iwichin, kan ke'iwetzelaj. 44Jak'a yin ninbij chi kan ke'iwajo' k'a ri ye'etzelan iwichin; tiya' urtisanik pa kiwi' ri ye'etzelan iwichin; utz tibana' kik'in ri xa man utz ta kina'oj iwik'in rix y tik'utuj ri rutzil ri Dios pa kiwi' ri ye'oqotan y ri yeyoq'on iwichin. 45Richin keri' kan niq'alajin-wi chi rix ix ralk'ual ri aj-chikajil qatata'. Roma rija' kan utz wi k'a pa qawi' qonojel. Kan k'a chila' chikaj nuben-pe chi k'o ri rusaqil ri q'ij pa kiwi' ri winaqi' e utz y pa kiwi' ri winaqi' e itzel; kan k'a chila' k'a chuqa' nuben-pe chi k'o job pa kiwi' ri winaqi' e choj y ri man e choj ta. 46Wi rix ye'iwajo' xaxe ri ye'ajowan iwichin, xa man jun rajel-ruk'exel xtik'ul, roma ri keri' xa kan kibanobal chuqa' ri e itzel taq moloy méro ri k'o chi nitoj chire ri rey aj-Roma. 47Y wi rix xaxe ri iwach'alal ri ye'iq'ejela', ¿achike ta chik k'a ri más utz ri yixtajin chubanik? Man jun. Roma xa keri' chuqa' nikiben ri winaqi' ri man ketaman ta ruwech ri Dios. 48Rix kan kixok k'a tz'aqet rik'in ri ibanobal achi'el ri aj-chikajil qatata' ri kan tz'aqet rik'in ri rubanobal.

Kaqchikel Bible © Bible Society in Guatemala, 2003.


Learn More About Kaqchiquel Bible

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.