2 Crón 1
1
Ri Salomón xuk'utuj runa'oj chire ri Dios
(1 Rey 3:3-15)
1Ri Salomón, ri ruk'ajol kan ri David, xjikibex k'a chupan ri ruq'atbal-tzij y ri Jehová Dios kan k'o-wi rik'in y kan janila k'a xunimirisaj ruq'ij. 2Y rija' xeroyoj k'a konojel ri winaqi' richin xch'on kik'in, xch'on kik'in ri aj-raqen ri ek'o pa kiwi' e 1,000 aj-labal, xch'on kik'in ri aj-raqen ri ek'o pa kiwi' ri e wok'al aj-labal, xch'on kik'in ri achi'a' ri to'onela', xch'on kik'in konojel ri e aj-raqen kichin ri tzobaj y kik'in ri ch'aqa' chik aj-raqen. 3K'ari' ri Salomón y konojel re winaqi' re' xebe k'a pa Gabaón, ri chiri' pa ruwi' jun juyu' ri akuchi nikiya-wi ruq'ij ri Dios, roma chiri' k'o-wi ri rachoch ri Dios richin molojri'il ri banon rik'in tzieq ri rubanon kan ri Moisés, ri rusamajel ri Jehová pa tz'iran ruwach'ulew. 4Jak'a ri David xa ruq'axan k'a kan ri káxa richin ri rujikibel-tzij ri Dios ri xk'oje' ojer kan pa tinamit Quiriat-jearim, roma rija' chiri' pa Jerusalem rupaban chik q'anej jun rachoch ri banon rik'in tzieq. 5Keri' chuqa' ri porobel ri banon rik'in q'enq'oj-pueq, ri rubanon kan ri Besalel, ruk'ajol ri Urí y rumam ri Hur, chiri' pa Gabaón k'o-wi chuwech ri rachoch ri Dios. Ri Salomón, y konojel ri e beneq rik'in xebe k'a chiri' richin xbekik'ulubej ri Dios.
6Y ri Salomón xjote' k'a el chiri' chuwech ri Jehová akuchi k'o-wi ri porobel y chiri' k'a xusuj-wi e 1,000 kamelabel ri niporox chijun.
7Y chupan k'a ri aq'a' ri' xuk'ut-ri' ri Dios chuwech ri Salomón, y xubij chire: Tak'utuj chuwe ri achike nawajo' richin ninya' chawe, xcha'.
8Y ri Salomón xubij: Rat kan janila xajoyowaj ruwech ri David ri nata', y ja yin xinaya' kan pa ruk'exel richin xinok kan rey. 9Wakami k'a, Jehová Dios tajikiba' k'a ri asujun chire ri nata', roma ja yin ri xinaya' kan rey pa ruwi' re jun tinamit re janila nim, ri kan man e ajlatel ta, achi'el ri poqolaj ri k'o chuwech re ruwach'ulew. 10Wakami tabana' utzil taya' nuna'oj y wetamabal richin yenyuqej re winaqi' re', roma kan man jun chik k'a ri xtitikir ta xtiq'aton-tzij pa ruwi' ri atinamit re janila nim, xcha'.
11Y ri Dios xubij k'a chire ri Salomón: Roma jare' ri k'o pan awánima, y man xak'utuj ta beyomel, ni richin ta niya'ox aq'ij, ni ta ri kikamik ri e etzelanel awichin, ni man xak'utuj ta k'iy ak'aslen; pa ruk'exel ri' xa ja ri awetamabal y ri ana'oj xak'utuj richin naq'et-tzij pa ruwi' ri nutinamit ri achoq pa ruwi' xatinkusaj kan rey, 12roma ri' kan xtinya' k'a awetamabal y ana'oj. Chuqa' kan xtinya' abeyomel y ak'ojlemal. Kan man jun chik k'a xtiq'aton-tzij achi'el xtaben rat chikikojol ri ch'aqa' chik rey ri xe'el yan el, y ri xke'ok kan chawij rat, xcha' chire.
13Toq ri Salomón xuya' yan ruq'ij ri Jehová chiri' pa ruwi' juyu' richin Gabaón, xtzolin k'a pa Jerusalem richin xberuq'ata-tzij pa ruwi' ri tinamit Israel.
Ri rubeyomel ri rey Salomón
(1 Rey 10:26-29; 2 Crón 9:25-28)
14Y ri Salomón xeruloq' k'a e k'iy ru-carruaje y xek'oje' e k'iy ruwinaq ri yech'oke' chirij kiej. Ronojel k'a ri ru-carruaje e 1,400, y ri achi'a' ri yech'oke' chirij kiej e 12,000. Konojel re winaqi' re' xerutaluj pa taq tinamit ri akuchi ek'o-wi ri ru-carruaje y ek'o ri xek'oje' kan chiri' pa Jerusalem rik'in rija'. 15Chuqa' kan xumol ruchi' saqipueq y q'anapueq pa ruk'iyal chiri' pa Jerusalem, y kan achi'el chik k'a ri abej rubanon, y chuqa' janila xetamex ruwech ri tiox-che' kan achi'el etaman ruwech ri ruche'el wíkix ri k'o chuwa-taq'aj. 16Ri loq'onela' richin ri rey Salomón nikiloq'ola-pe ri kiej pan Egipto y pa Cilicia, y nikik'en-pe chire. 17Toq rije' nikiloq' jun carruaje ri nipe pan Egipto, nikiloq'-pe chi 600 raqen saqipueq, y jun kiej rajel 150 raqen saqipueq. Y ri rey kichin ri hitita y ri ki-rey ri aj-Siria nikiloq' kan chuwi-kiq'a' ri e rusamajela' ri rey Salomón.
Ri Salomón xukanoj che' richin rachoch ri Dios
(1 Rey 5:1-18; 7:13-14)
Currently Selected:
2 Crón 1: KQC
Highlight
Share
Copy
Want to have your highlights saved across all your devices? Sign up or sign in
Kaqchikel Bible © Bible Society in Guatemala, 2003.