Jud 1
1
Lep'iyenataĝanaĝac ñe'me Judas
1Jayem Judas 'me jayem lalemaĝajet joñe'me Jesucristo, nataq'aen jayem lanoqolec joñe'me Santiago, ami janema naa'me naajo' yedii's, da'me ami jo'ne ami noqopitalo joñe'me Qadet'a Dios nataq'aen ami netelalo joñe'me Jesucristo, qa'a joote ami yiyaĝanalo joñe'me Qadet'a, ami yiyota'alo qaedi yataqachiñe ami e'n lec'oqo'tepi. 2Auacoñiyeguet da'me let'adaic 'me lichoĝodenataĝanaĝac ñe'me Qadet'a, nataq'aen da'me 'lemaĝac choqoda'me loqopich'i.
Achiya'agueta gaa'me qovinaĝanaĝayaqa
3Ami yaqaya'olqa, jayem jalcote da'me yamaic ta'le jediñe joda'me lajoĝoc da'me qat'oyaĝac 'me dalaĝaic jo'ne joote ena'uaque qo'mi uetauelo. Qalaĝaja nayi male jela'a da'me qoyouetaque da'me ami jamaĝalo da'me dojo' qaedi ami ñachoĝodenouelo da'me aueloquiaĝanaĝañi da'me adepi'i, da'me jo'ne qoye'uauaĝanouelo joca'li ga'me lec'oqo'tepi joñe'me Dios. 4Qa'a uo'oe gaa'me jo'ne ch'e ami yeuomaĝanouelo joda'me loqovinaĝanaĝaco qaedi ami tauelo. Nach'egaua jo'ne joote uaqatetelo'te daa'me nedii's jo'ne Dios 'laqataqa joca'li, queda'me joote qoyeloĝonaĝateda'a da'me Dios le'uaĝanaĝanaĝac, nach'egaua ga'me jiyaĝadipi jo'ne yataqachiñe etaĝaloĝoiquipi. Nataq'aen ch'e yacoteguet da'me lichoĝodenataĝanaĝac joñe'me Dios qama'le ena'am ta'le ch'e yayaquiaĝa'n qaedi 'yete'tape naa'me mach'e loeco jo'ne lequejeguetaĝa. Nataq'aen nematedapec joñe'me Qadadipa mach'e Qadejaliaĝanec Jesucristo.
Dios ye'uaĝa'n gaa'me jo'ne ja yoqochideta
5Mate mane'e joote auayachiñe da'me dojo', qalaĝaja jetaque ami ñetouenaĝanaĝaneque da'me jo'ne ya'uo joca'li ñe'me Jaliaĝanec, queda'me jetaque nec'alaĝatedegue gaa'me Israel lec'oqo'tepi. Qama'le ya'uo da'me naqatedegue jogaa'me, yachiyoĝotauelo jogaa'me Egipto laje', qalaĝaja ca'li yem da'me dojo' qama'le yapalaĝa't jogaa'me jo'ne ja p'iida'a joñe'me.
6Nataq'aen anetoviñetac da'me uo'oe gaa'me piyem laje' jo'ne ja yiyamaĝatetedac joda'me mach'e 'lonataĝanaĝac, dite da'me queda'ae di'me yataqachiñe 'lachaqa't, qama'le Dios ye'tema ga'me necoñetague'j 'me ja 'naidena'a jo'ne 'lalaĝa, qaedi qoyajoĝoteda'a ga'me nolo' jo'ne p'ategue qom 'uo da'me ne'uaĝanague'j.
7Nataq'aen anetoviñetac di'me noic jo'ne Sodoma nataq'aen di'me Gomorra choqogaa'me noyaqa laqaya' jo'ne leje'gue joca'li. Ena'ama jaajo' piyem laje', nach'egaua gaa'me noyaqa male qoye'n naloqotenaĝanaĝaiqui, yajouaĝat da'me nemedoue da'me nequejeguetaĝa, queda'me najetedoue daa'me namaĝanaĝaco jo'ne ja yauaqa'aguet da'me jo'ne mach'e 'loyaĝa'j qoyen. Chane'eja ñe'me Dios ye'uaĝa'n jogaa'me, qama'le male uetedoue da'me lachoĝode'j jo'ne dole' 'me qaya'te loiquiaqa'.
8Temaqaedi da'me 'uo da'me dojo' naloqotenaĝanaĝaiqui, pilaetaĝa yaqalan taĝa jena'me jenjo' jiyaĝadipi jo'ne quetapegue'to jonaa'me lichoĝonaĝaco, qama'le 'naĝa't da'me mach'e 'loyaĝa'j, nataq'aen ja yacoteguet da'me lamaĝajoĝonaĝac joñe'me Qadejaliaĝanec, nataq'aen ja yiyamaĝate'tape daa'me 'laqataqa nale enapegalo jogaa'me namaĝa'spi jo'ne 'uo ga'me li'yoĝodi'j.
9Qalaĝaja ñe'me lajoĝola' ga'me piyem laje'pi jo'ne lenaĝat da'me Miguel deloiquitapegue' ca'li ñe'me payac, deloiquitedapiye da'me lapachidiaĝac di'me Moisés ca'li joote qaya, qalaĝaja ja jetaque ch'e ye'uaĝaneque daa'me mach'e 'laqataqa, dite da'me nach'edata da'me enaac: “¡Mach'e am nelaĝa joñe'me Jaliaĝanec!” 10Qalaĝaja jenjo' jiyaĝadipi yataqata ja 'noe'n gaa'me 'laqataqa jo'ne yedaĝatapegalo jogaa'me jo'ne ja yateto'n. Nataq'aen ga'me te'me latetonaĝanaĝa'j ena'am ga'me jiyac jo'ne qaya'te yatetonac, qama'le qom 'uo ga'me yauote, nach'ega jo'ne 'naĝa't jogaa'me.
11¡Degueja qom'te da'me lachoĝode'j jogaa'me! Qa'a quetede'egue di'me Caín, nataq'aen da'me eda'am di'me Balaam queda'me jetaque nauedela't jaga'me laicaua, qama'le dajediñe. Nataq'aen qoleguetaĝanaĝayaqa jogaa'me, eda'am di'me Coré joca'li, qama'le nimichidiñe jo' qom'te.
12Jogaa'me yataqata yauote da'me adepocoĝoqui nale yalegouelo gaa'me adiqui'yaĝaqui' 'me a'nonaĝachiguilo, qa'a ja yiyamaĝatetedac, dite da'me ch'e deque'y nataq'aen ch'e niyo'm. Ja yaloĝo'n ga'me lepocoĝo'j, qalaĝaja eetapela'ajalo made'tape, qa'a nach'egaua jo'ne najoĝola'te jo'ne mach'e netelela'ajalo. Nach'egaua yataqachiñe ja 'noe'n, qama'le ena'ama gaa'me piyem loje' jo'ne ja chiyaqayi ga'me uotep, qa'a ch'e layat layoĝonataqa. Nataq'aen ena'ama gaa'me ep'a 'me ja yauote jala nale yovita ga'me laloqo', yataqachiñe qaqa'te' qa'a joote ja netayelo gaa'me patadi. 13Nach'egaua ena'ama gaa'me lepa' let'al ga'me noĝop, qa'a ena'am ta'le ya'uo 'lali nale, nach'egaua 'lonataĝanaĝaco jo'ne ja nepocoĝolo'te. Nataq'aen ena'ama ga'me uaqachiñipi jo'ne yejomateda'ague ga'me dajotegue, qa'a queda'e da'me yoqochiñe jo'ne 'laqatac joñe'me Dios, qama'le qoyecoñe't qaedi tadoue ga'me jo'ne ja 'naidena'a 'me yataqachiñe yeda'at jo'ne 'lalaĝa.
14Nataq'aen ca'li Enoc, jo'ne tachigui da'me siete noqochic ga'me lauadipi di'me Adán, joca'li yojaĝanaĝan joñe'me Dios, qama'le enapegalo naa'me naajo' jiyaĝadipi ca'li enaac: “Ami ja'aĝatema da'me jauana joñe'me Jaliaĝanec choqogaa'me lamaĝa's jo'ne piyem laje' 'me jalcote jo'ne naequetapegue'to queda'me naequena joñe'me, 15qaedi 'uo da'me nemitague'j choqoda'me nec'atenague'j ena'uaque joga'me jiyaĝadipi, qaedi qoyanema da'me ne'uaĝanague'j ena'uaque joga'me etaĝaloĝoiquipi, yajouaĝat yema gaa'me ja 'noe'n jo'ne yauo'oe nale, nataq'aen ena'uaque ga'me loeco lo'olpi jo'ne nenaĝatedegue jogaa'me 'laqataqa jo'ne ja chimadichidiñe q'ae'n nale eetedapega joñe'me Jaliaĝanec.”
16Jenjo' jiyaĝadipi yataqachiñe da'me jaĝaiquipi nataq'aen ja chimadichidiñe daa'me 'laqataqa. Nach'edata da'me yelodaque da'me ja no'en jo'ne yepaquetapegue' daa'me nejiyaĝauayaĝaco. Nataq'aen 'yoĝodenaĝayaqa daa'me 'laqataqa, nataq'aen da'me doja'a ga'me laqaya't qama'le yi'yoĝode'n qaedi daquitetapega nale joga'me.
Niyamaĝataĝa'j ga'me p'etaqadaiquipi
17Qalaĝaja ami yaqaya'olqa, anetoviñetac da'me 'laqata'j gaa'me lamaĝa's joñe'me Qadejaliaĝanec Jesucristo, 18ca'li enapega't: “Gaa'me p'atedegue noloqo'ote qom'te qama'le uo'oe ga'me jiyaĝadipi 'me 'uenaĝanaĝaiquipi jo'ne quetapegue'to daa'me nejiyaĝauayaĝaco lamaico jo'ne ja 'noe'n.” 19Nach'egaua jo'ne chiyoqodayi da'me nelagaĝac, qa'a quetapegue'to naa'me nejiyaĝauayaĝaco lamaico nataq'aen ja yauata ñe'me Lepaqal joñe'me Dios.
20Qalaĝaja ami yaqaya'olqa, nach'e aueñeta't a'nañaĝachiyec da'me jo'ne ja 'nalegue 'me adepi'i, nataq'aen anajeñe'teguet ñe'me Dios Lepaqal da'me ami yauequeteda'ague joda'me anetamenaĝaqui. 21Naq'aeta da'me ta'le aniyamaĝachetoue da'me loqopich'i joñe'me Dios. Nataq'aen 'noota qom 'uo da'me adeuataqataĝanaĝaqui ga'me nolo' qom ñe'me Qadejaliaĝanec Jesucristo qo'mi yanema da'me 'noyaĝac jo'ne ja 'naidena'a, qa'a jalcote da'me lichoĝodenataĝanaĝac.
22Avichoĝodeñi' jogaa'me jo'ne maliaĝa 'uo da'me loqoleguetaĝanaĝa'j. 23Gaa'me laqaya' anec'alaĝachidegue, auachiyoĝochiyauelo joga'me dole' jo'ne ne'uaĝanague'j. Nataq'aen avichoĝodeñi' jogaa'me laqaya', mate mane'e at'oiya'agueta nale jogaa'me, ena'am ta'le a'uaqaiquiya'agueta joga'me louo qa'a yidayelo da'me ja no'en jo'ne nejiyaĝauayaĝa'j.
Da'me p'ategue 'laqatac
24Ñe'me Qadet'a Dios 'uo da'me lañoqotaĝanaĝac qaedi ami netela'aque da'me ta'le auachiyaqaijeguem, qama'le ami nechalataĝadoue queda'me qaya'te adejamaĝataĝaqui nataq'aen ami jaqachiguilo joda'me adamaiqui qom auajoiya'aguet da'me 'lonaĝac joñe'me. 25Chane'eja joñe'me Qadet'a jo'ne qaya'te ena'am, mach'e Qadec'alaĝaiqui jouaĝat joñe'me Qadejaliaĝanec Jesucristo, 'noota qom nach'e eta't qoyanem da'me ni'yoĝodenataguec nataq'aen da'me lañoqotaĝanaĝac, nataq'aen da'me 'lañaĝac, nataq'aen da'me lejaliaĝa. Nach'e naq'aeta jalchi'ena joca'li yemta nataq'aen nayi naa'me naajo' noloqo'ote, nataq'aen nach'e eta't ja pal. Jaja'a, nach'e naq'aeta da'me dojo'.
Currently Selected:
Jud 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina