Jn 21
21
Jesús naloĝonegueta jogaa'me siete jo'ne mach'e lapaĝaguenataqa
1Mane'e joca'li yem da'me dojo', qama'le Jesús yitaĝa naloĝonegueta jogaa'me lapaĝaguenataqa, ua'ña di'me lae jaga'me qa'em lat'edai jo'ne yauaqa'a di'me noic jo'ne Tiberias, qama'le naq'aeta da'me 'uo joca'li: 2'uo ñe'me Simón Pedro, nataq'aen Tomás jo'ne lenaĝat qoyen da'me Uadiaĝaic, nataq'aen Natanael jo'ne 'lachaqa' di'me noic jo'ne Caná jo'ne uaue di'me aleua Galilea, nataq'aen jogaa'me lec'oqo'te ñe'me Zebedeo, choqogaa'me dojolqa jo'ne lapaĝaguenataqa laqaya' joñe'me. 3Qama'le ñe'me Simón Pedro enaac joca'li:
—Nayi da'me jec, ji'yaco.
Qama'le jogaa'me 'yadeteguet joñe'me:
—Da'me qo'mi nach'e ena'am qolaq, am qolaĝague.
Qama'le yenoĝodegue joca'li, queda'me nedañgui jaga'me nelicota, qama'le yema jo'me pi'yaq da'me di'yaco'tape, qalaĝaja qaya'te ta'le loĝone'j ga'me niyaq. 4Mane'e ca'li yamta'le 'yoĝoñi, qama'le Jesús yitaĝa naloĝon ueta'ña ga'me lae jaga'me qa'em lat'edai, qalaĝaja jogaa'me lapaĝaguenataqa ja yayate'n, ja eetedapega ta'le naqaeñe joñe'me Jesús. 5Ñe'me Jesús yena't jogaa'me:
—Jega, ami yaqaya'olqa, ¿qo'li qaya'te adoĝonequi?
Qama'le 'yadeteguet:
—¡Qaya!
6Qama'le Jesús enaac:
—Auajaqa'ña na'me licota loec jana'me anajelaĝai, qaedi 'uo ga'me adoĝonequi.
Qama'le naqaeda da'me etede'ec joca'li, qama'le ua'ña da'me ja yaqanate't ta'le navidijeguem jaga'me najelaĝai queda'me jalcote joga'me niyaqapi jo'ne loĝonaqa. 7Chane'eja ñe'me napaĝaguenatac jo'ne yataqata nauotaĝaua joñe'me Jesús t'aqataĝanem joñe'me Pedro, enaac:
—¡Naqaeñe ñe'me Qadejaliaĝanec!
Mane'e da'me domachiya ñe'me Simón Pedro da'me naqaeñe joñe'me Jaliaĝanec, qampaja'a da'me nejachegue jaga'me lapoto, da'me qaya'te louo laqaya ta'le yatañe, qama'le tañgui joga'me noĝop. 8Ja qaya'a ga'me loogue, uotaĝa cien metros di'me ua'ña, qama'le jogaa'me napaĝaguenataqa laqaya' male yovideda'ata ga'me loogue da'me netedañgui jaga'me licota, qoyauequetata jaga'me jelaĝai jo'ne uañgui ga'me niyaqapi. 9Mane'e ca'li nenochidi'ña jena'me aleua, qama'le yauata joga'me dole' jo'ne edetañgui, choqoga'me niyaq jo'ne uetañgui nataq'aen jaga'me pan. 10Qama'le joñe'me Jesús t'aqataĝanema jogaa'me, enaac:
—Anedoyiquena ga'me niyaq, ga'me jo'ne yemta anaqachijeguem.
11Chane'eja ñe'me Simón Pedro yitaĝa nañgui jaga'me licota qama'le yedaĝatata joga'me loogue jaga'me jelaĝai najaĝaye ga'me niyaqapi jo'ne let'adaicpi. Ga'me niyaqapi nalo'taguet ciento cincuenta y tres: te'me jalcote ga'me niyaqapi qalaĝaja ja qoyip'iaĝachigui jaga'me jelaĝai. 12Qama'le Jesús enaac:
—Auanaeyiquena qaedi cha'li aueque'eyi.
Qalaĝaja jogaa'me lapaĝaguenataqa qaya'te ta'le 'uo ga'me onolec jo'ne yañoĝot da'me yenat joñe'me da'me jach'e jogamaĝa, qa'a joote yayate'n da'me nach'eñe joñe'me Jaliaĝanec. 13Ñe'me Jesús yacona jaga'me pan da'me yec'atalo jogaa'me qaedi yanouelo; yem qama'le nach'e ena'am da'me yanouelo joga'me niyaq.
14Chane'eja male tres da'me naloĝonegueta jogaa'me lapaĝaguenataqa joñe'me Jesús ca'li joote 'niyelaĝajeguem.
'Laqatac ñe'me Jesús jo'ne yanem joñe'me Simón Pedro
15Ca'li yem da'me niqui'yaĝac, qama'le Jesús yenat ñe'me Simón Pedro:
—Simón jo'ne am lec'oĝot ñe'me Juan, ¿qo'li yataqachiñe jayem adoqopita, da'me ja ena'ama naa'me naajo' adaqaya'?
Pedro 'yateguet joñe'me:
—Jaja'a, Jaliaĝanec, joote auayaten da'me am jauotec.
Qama'le Jesús enaac:
—Qama'le 'noota qom adetelalo naa'me yoqo'te, jo'ne ena'am ta'le yelopi 'naĝanaĝate lec'oqote.
16Qama'le yitaĝa 'viyelaĝalegue da'me yenat:
—Simón jo'ne am lec'oĝot ñe'me Juan, ¿qo'li jayem adoqopita?
Ñe'me Pedro 'yateguet joñe'me:
—Jaja'a, Jaliaĝanec, joote auayaten da'me am jauotec.
Qama'le Jesús enaac:
—'Noota qom adetelalo naa'me yoqotel, jo'ne ena'am ta'le yelopi 'naĝanaĝatel.
17Male tres da'me yenat:
—Simón jo'ne am lec'oĝot ñe'me Juan, ¿qo'li jayem auauotec?
Ñe'me Pedro male ja matac qa'a tres da'me qoyenatetapec da'me eeta da'me yataqachiñe noqopita joñe'me Jesús, qama'le yitaĝa 'yateguet:
—Jaliaĝanec, joote auayaten ena'uac: auayaten da'me am jauotec.
Ñe'me Jesús male enaac:
—Adetelalo naa'me yoqotel jo'ne ena'am ta'le yelopi 'naĝanaĝatel. 18Am ja'aĝatem da'me eja: da'me chiyoqotelegue da'me am nejoqolec, mach'e ane'tela't da'me auaidiñe jogaa'me adeuo qaedi auajoyi ga'me jo'ne a'uamaqaten. Qalaĝaja qom male am 'yaĝaicachigui, qama'le am qoyeladelegue da'me nacoloĝodegue naa'me adoua' qaedi ga'me jiyaĝaua laqaya am yanayelo ga'me adeuo, qama'le am yauegue qom'te ga'me jo'ne ja jetaque auajoyi.
19Da'me 'yaĝatem da'me dojo', ñe'me Jesús yayatenaĝanaĝanec ñe'me Pedro da'me eeta qomle da'me leleuaĝa jo'ne chiyaqayi da'me qo'nonaĝachigui ñe'me Dios. Ca'li yem da'me jo'ne 'yaĝatem qama'le uaqata joñe'me, enaac:
—¡Jayem oquegue!
Jesús 'yaĝat ñe'me lapaĝaguenatac jo'ne nauotaĝaua
20Mane'e da'me nejelec ñe'me Pedro, qama'le yauana ñe'me napaĝaguenatac laqaya jo'ne yataqachiñe nauotaĝaua ñe'me Jesús, nach'eñe jo'ne ue'ta lae ñe'me Jesús joca'li 'uo jo'me niqui'yaĝac ca'li pi'yaq qama'le 'uo da'me lenataĝanaĝac ca'li: “Jaliaĝanec, ¿jach'e ga'me jo'ne am yaneuo qomle?” 21Mane'e joca'li Pedro yauana, qama'le yenatec joñe'me Jesús:
—Jaliaĝanec, qama'le da'me dojo', ¿jach'e jogamaĝa eeta qomle?
22Jesús 'yateguet joñe'me:
—Qom jepaquetapega ta'le nec'aletaye chayovida'a qom yitaĝa 'ñiyelaq, qama'le ¿toqoch'e auepaquetapega ta'le auayaten? Da'me am, nach'edata da'me adema'a da'me jayem oquegue.
23Jena'me jenjo' 'laqatac qodomachiya'at jogaa'me laqaya'olqa queda'me uotaĝa ja yitaĝa yeleu da'me dojo' napaĝaguenatac, qalaĝaja ñe'me Jesús ja eetac da'me ja yeleu ga'me lapaĝaguenatac, dite da'me naq'aeta da'me eetac ca'li: “Qom jepaquetapega ta'le nec'aletaye chayovida'a qom yitaĝa 'ñiyelaq, qama'le ¿toqoch'e auepaquetapega ta'le auayaten?”
24Nach'ayem napaĝaguenatac jo'ne jechoĝo't naa'me naajo' uo'oe, qama'le naa'me naajo' jedidiñe. Nataq'aen jayatenaq queda'me yataqata eja da'me dojo' jo'ne joote qoyediñe.
25Nataq'aen uo'oe qayoĝode' jogaa'me 'nanaqa laqaya' jo'ne e'n di'yo't ñe'me Jesús. Qalaĝaja ta'le onolqa'tape qoyedidiñe, jeetapega yema jena'me aleua ja nalodelegue gaa'me nedel jo'ne qoyachalo'te da'me qoyediñe.
Currently Selected:
Jn 21: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina