3 Jn 1
1
Lep'iyenataĝanaĝac ñe'me Juan
1Jayem jo'ne jayem 'yaĝaicachigui, nayi jalcote da'me yamaic jo'ne am jamaĝa, am yaqaya Gayo, am jo'ne yataqachiñe eja da'me am joqopita.
2Am yaqaya jo'ne am joqopita, jalcote ñachoĝodenot joñe'me Dios qaedi yataqachiñe am ue'tajop da'me 'noota nataq'aen machiñe auen da'me 'uo da'me liyamaĝac na'me at'oyaĝac, nach'e naq'aeta na'me adepaqal. 3Yataqachiñe jalcote da'me jayem matac queda'me uo'oe gaa'me qadaqaya'olqa jo'ne nededa'aquena jo'ne am 'yaĝatetedac queda'me am yataqatelegue, qa'a nach'e aueta't ja anañaĝanañi da'me jo'ne eja. 4Nataq'aen da'me dojo' yamaic jo'ne p'ajaye queda'me jayate'n jogaa'me yalaqapi queda'me 'nañaĝatela'ajalo quetedalegue da'me jo'ne chimaqachiñe.
Alecochiyalo gaa'me Dios lamaĝa's jo'ne chiyoqoda'a ga'me qaya'ta
5Am yaqaya jo'ne am joqopita, yataqachiñe eja a'uonataĝanaĝan da'me adepe'e queda'me alecochiyalo jogaa'me qadaqaya'olqa, jogaa'me jo'ne chiyoqoda'a ga'me qaya'ta. 6Ena'uaque jogaa'me jo'ne chiyoqoda'a ga'me qaya'ta 'yaĝatema gaa'me p'etaqadaiquipi queda'me adoqopitalo jogaa'me. Qama'le jayem avichoĝoden nayi: yitaĝa alecochiyalo, auanema gaa'me youetedaque qaedi yaqanate't ta'le yauote ga'me leuoĝo'j, naqaeda yiyamaĝaden joñe'me Dios.
7Qa'a jogaa'me eque' qaedi t'onataĝadeuo'o joñe'me Jesucristo, qama'le ja yacoteguet ga'me lecochaĝa'j jogaa'me jo'ne ja p'etaqadaiquipi. 8Qo'che' 'noota qom jeloĝogueta jogaa'me da'me qo'mi, qaedi yecochaĝalo da'me dapaĝaguenataĝatec da'me jo'ne chimaqachiñe.
At'oiya'aguet qomle ñe'me Diótrefes, qalaĝaja auelo'oguet ñe'me Demetrio
9Ja'uo ga'me yediijec ca'li jo'ne ami jedenaqatenalo, ami jo'ne p'etaqadaiquipi, qalaĝaja Diótrefes ja yaconeguet da'me qat'aqataĝanaĝac, qa'a ñe'me 'yamaqaten da'me mach'eñe damaĝajoĝonac. 10Qo'che', qom ami jec'atalo qama'le ami ja'aĝatema yema ga'me jo'ne yauotaque, qa'a 'yaĝatetapi'ñgui gaa'me nequejaĝaco nataq'aen gaa'me loqovinaĝanaĝaco jo'ne qo'mi e'n tayilo nale. Nataq'aen ja nach'edata da'me dojo', dite da'me ja yelo'ogueta gaa'me qadepi'iyaĝa'u jo'ne yovi't nale, nataq'aen gaa'me jo'ne jetaque yelo'ogueta qama'te ja yaje'tema, choqoda'me yamaĝadegue nale jogaa'me chiyoĝotauelo jogaa'me p'etaqadaiquipi.
11Am yaqaya jo'ne am joqopita, ena'te auanaya'alo jogaa'me ja 'noe'n jo'ne qoyadenaĝa't nale, dite gaa'me jo'ne 'noote'. Qa'a joñe'me jo'ne ya'uo da'me 'noota, nach'eñe chiyaqayi joñe'me Dios, qalaĝaja ga'me jo'ne ya'uo ga'me ja no'en qamqa'me ja yateton joñe'me Dios.
12Qama'le ena'uaque dechoqotaĝatec ñe'me Demetrio jalcote 'noota ga'me 'naqataguec, nataq'aen da'me eja qo'mi yayatenaĝaneque queda'me yataqachiñe 'noota ñe'me. Choqoda'me qo'mi nach'e ena'am 'noota ga'me qat'aqatac jo'ne jotauanaq joñe'me, qama'le auayaten queda'me ja'aĝataqatac da'me jo'ne chimaqachiñe.
Da'me p'ategue 'laqatac
13Jayem jalcote ga'me jo'ne jetaque am ja'aĝatem, qalaĝaja ja jetaque ch'e yediijec ga'me jo'ne am jedenaqatena, 14qa'a jeuata'a da'me ja cop'a da'me am jauana, qama'le yataqachiñe jojaqatapega't.
15'Noota qom 'nemaĝac am ue'tajop. Jonaa'me qanaigaĝa'u jo'ne jayem ueteda'ajop am yamaĝata da'me lamai'j. Jayem avichoĝoden, onolqa'tape auep'iye'n jogaa'me qanaigaĝa'u jo'ne am ueteda'ajop.
Currently Selected:
3 Jn 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina