2 Jn 1
1
Lep'iyenataĝanaĝac ñe'me Juan
1Jayem jo'ne jayem 'yaĝaicachigui nayi jalcote da'me yamaic jo'ne am janem, am yaqayole jo'ne am Dios liquiya, nataq'aen ena'uaque gaa'me ac'oqo'tolqa. Yataqachiñe eja da'me ami joqopitalo, nataq'aen ja jayem 'te onolec da'me jayem, dite da'me nach'e ena'ama ena'uaque jogaa'me jo'ne yacoteguet da'me yataqachiñe eja. 2Ami joqopitalo qa'a jouaĝat da'me jo'ne qo'mi uetauelo jo'ne eja 'me yataqatelegue, jo'ne uetauelo naa'me qadai'li qama'le nach'e eta't da'me qo'mi uetauelo. 3'Noota qom Dios mach'e Qadet'a, nataq'aen Jesucristo, jo'ne Lec'oĝot joñe'me Qadet'a, ami yecodelo'te da'me leyalaqataĝanaĝac nataq'aen ami yanema da'me anichoĝodenataguequi nataq'aen da'me at'emaĝaqui, qa'a yataqatelegue joñe'me, nataq'aen yataqachiñe ami noqopitalo.
'Noota qom ñoqopitaqapega't
4Yataqachiñe jayem matac queda'me uo'oe gaa'me jauanalo jo'ne am chiyoqodayi da'me quetedalegue joda'me jo'ne eja, naq'aeta da'me jo'ne Qadet'a Dios qo'mi yamaĝalo'te.
5Nayi, am yaqayole, am ñachoĝodenot queda'me 'noota ta'le onolqa'tape qo'mi ñoqopitaqapega't. Jenjo' 'yaqatac jo'ne am janem ja namaĝajoĝonaĝac jo'ne dalaĝaic, dite da'me nach'eda da'me Dios lamaĝajoĝonaĝac jo'ne jaconaĝaguet ga'me chiyoĝogueta gaa'me noloqo'ote ca'li jep'iyaqa. 6Joda'me qadoqopich'i ladic yepacapegue da'me dojo': queda'me 'noota ta'le qolaqa'teguelo jodaa'me Dios lamaĝajoĝonaĝaco. Qama'le jenjo' Dios lamaĝajoĝonaĝac, da'me jo'ne joote auomachiya chiyoqo'teguet ca'li ga'me 'uaechiñe, nach'eda 'noota ta'le nach'e eta't da'me anoqopichiyapega't.
Achiya'agueta jogaa'me qovinaĝanaĝaiquipi
7Qa'a uo'oe qayoĝode' gaa'me qovinaĝanaĝaiquipi jo'ne quetedalegue jena'me aleua, jo'ne ja dechoqotaĝatec joñe'me Jesucristo naequena nach'e naq'aeta jiyaĝaua jo'ne yataqatelegue. Ga'me jo'ne naq'aeta, nach'ega qovinaĝanaĝaic nataq'aen nautena joñe'me Cristo.
8Chane'eja, 'noota qom achiya'agueta jogaa'me, qaedi ja am 'te yoqovi'n, qaedi ja ne'uela't da'me jo'ne chiyaqayi da'me qat'onataĝanaĝac, dite da'me yataqachiñe auacoñiyeguet ga'me onaĝaic jo'ne anejetenaguequi. 9Qom 'uo ga'me eetapela't noqotetenegue da'me jo'ne joote Cristo dapaĝaguenataĝanec, nach'ega ja ue'tajop joñe'me Dios. Qalaĝaja ga'me jo'ne 'nañaĝateque daa'me daajo' Cristo lapaĝaguenataĝanaĝaco, nach'ega ue'tajop joñe'me Qadet'a nataq'aen joñe'me Lec'oĝot.
10Qom 'uo gamachaqaega ami dejapichiyalo jo'ne ja dapaĝaguenataĝanec da'me dojo' Cristo lapaĝaguenataĝanaĝac, ena'te aueñi taue ga'me at'emequi uotaĝa ta'le auep'iyeñi; 11qa'a ga'me jo'ne yep'iyen, nach'ega jo'ne yotaua'n gaa'me 'lonataqa jo'ne ja 'noe'n.
Da'me p'ategue 'laqatac
12Jalcote ga'me jo'ne jetaque ami ja'aĝatema, qalaĝaja ja jetaque ch'e yediijec ga'me jo'ne ami jamaĝalo. Yeuataqataĝanaĝac da'me ami jec'atalo qaedi yataqachiñe ami jajo'tagueta da'me jojaqatapega't, qaedi naq'aeta da'me qadalochigui joda'me qadamaic.
13Ena'uaque jogaa'me lec'oqo'tolqa jaga'me adaqaya, jaga'me jo'ne nach'e ena'am Dios liquiya, am yamaĝa da'me lamai'j nataq'aen lep'iyenataĝanaĝa'j.
Currently Selected:
2 Jn 1: TSN
Highlight
Share
Copy
Want to have your highlights saved across all your devices? Sign up or sign in
Nuevo Testament Toba del Oeste © 2010 Sociedad Bíblica Argentina