2Maseuta 1
1
Muoni Eliya na seuta Ahaziya
1Ahabu seuta ywa Izulaeli eze abanike, wantu wa Moabu niyo wahitukila wasekulongozwa ni wantu wa Izulaeli.
2Seuta Ahaziya umo endaga uko Samaliya kalagala kulawa kulanga kwe golofa vyaleka alumila vihiye. Elo niyo asigila walosi, awagamba, “Hitani kwa Baali Zebubu, mnungu ywo umzi wa Ekuloni, mkamuze hegu unyonje uno nanihone.” 3Mna mndima ywa kwembingu ywa Zumbe Chohile niyo amgamba muwoni Eliya mwikazi ywa umzi wa Tishibe, “Halawe wite ukadugane na awalosi awo uwauze, ‘Kwa mbwani mwaita kwa Baali Zebubu mnungu ywa Ekuloni? Mwe isi ya Izulaeli hamna Chohile?’ 4Mgambileni seuta kugamba, Zumbe Chohile kagamba vino, ‘Kwa ukanuni, hosele molusazi ukweile mlanga mwakwe, mna chindedi nobanike.’”
Eliya niyo adamanya saviya Zumbe alongile. 5Wadya awalosi weze wauye kwa seuta, seuta niyo awauza, “Ni mbwani msunguza kuuya?”
6Awalosi niyo wamhitula, “Chidugana na mntu kachigamba chuye chikugambile kugamba Zumbe Chohile agamba vino, ‘Ni mbwani watuma walosi kwa Baali Zebubu, mnungu ywa Ekuloni? Togola, mweisi ya Izulaeli hamna Chohile? Umo mlanga mo lusazi ukweile hosele mlanga mwakwe. Ko ukanuni nobanike.’”
7Seuta niyo awauza, “Mntu mdugane naye niyo awagambilani izimbuli izo evivihi?”
8Niyo wamhitula, “Nendile kavala suche za mazoya na mwe chigudi nendile kanyinya msipi wa mkota.”
Niyo seuta agamba, “Uyo ni Eliya ywa Tishibe!.”
9Aho, seuta niyo asigila sekulu yumwenga ywa awankondo wakwe na wantu milongo mishano wamwigaile Eliya. Sekulu uyo niyo aita ambwila Eliya kekala kulanga kwe lugulu, niyo amgamba, “Weye mntu ywa Chohile, seuta agamba sela.”
10Eliya niyo amhitula yudya sekulu, “Kwaviya miye ni mntu ywa Chohile, moto nausele kulawa kwembimbu ukutikimye weye hamwenga na wantu wose unanawo!” Niyo moto wasela kulawa kwembingu niyo wambalanga uyo sekulu na awantu milongo mishano nendile we wose.
11Seuta niyo atuma sekulu mtuhu na wantu watuhu milongo mishano wambase Eliya. Yudya sekulu niyo amgamba Eliya, “Weye mntu ywa Chohile seuta agamba sunguza sela!”
12Eliya niyo amhitula, “Kwaviya miye ni mntu ywa Chohile, moto nausele kulawa kwembingu ukutikimye weye hamwenga na wantu mwi wose!” Moto wa Chohile kulawa kwembingu niyo wasela niyo wambalanga hamwenga na awantu wakwe milongo mishano.
13Seuta niyo asigila sekulu mtuhu nkanana ya katatu hamwenga na wantu milongo mishano. Sekulu uyo ywa katatu niyo akwela kulanga ko lugulu, afika madi kulongozi kwa Eliya na kweila akagamba, “Weye mntu ywa Chohile, nakweila uchilekeile ujima wetu miye hamwenga na awandima wako wano milongo mishano usekuchikoma. 14Vilongozi waidi walongole na awantu wawo, watikimya ni moto useile kulawa kwembingu, mna haluse nakweila fila mbazi uwikazi wangu.”
15Ahadya, mndima ywa kwembingu ywa Zumbe niyo amgamba Eliya, “Sela hamwenga naye, naho usekumogoha.” Eliya niyo enuka asela hamwenga naye kubula kwa seuta. 16Eliya niyo amgamba seuta, “Zumbe agamba vino, ‘Kwaviya kutuma walosi waite wakauze ulangilizi kwa Baali Zebubu mnungu ywa Ekuloni saviya mweisi ya Izulaeli hamna Chohile ukudaha kumuza ulangilizi, ivyo mo ulusazi ukweile hosele mlanga mwakwe. Chindedi nobanike!’”
17Elo, Ahaziya niyo abanika saviya Zumbe Chohile amgambile muwoni ywakwe Eliya. Kwaviya Ahaziya nendile hana mwana ywa chilume, Yolamu niyo atenda seuta hantu hakwe, mo mhilimo wa kaidi wo ulongozi wa Yeholamu mwana ywa Yehoshefati seuta ywa Yuda.
18Mbuli ntuhu adamanye Ahaziya zose ziwandikwa mwe ichitabu cha Mbuli za Mihilimo ya Maseuta wa Izulaeli.
Currently Selected:
2Maseuta 1: OTZBVL2026
Highlight
Copy
Compare
Share
Want to have your highlights saved across all your devices? Sign up or sign in
The Old Testament in Zigua @The Word for The World International and the Zigua Language translation, 2026. All rights reserved.