Roma 5
5
Dame Ho Maromak Liu Hosi Fiar
1Nee duni tanba ita sai loos ona liu hosi fiar, ita iha dame ho Maromak liu hosi ita nia Nai Jesus Kristu. 2Liu hosi Nia ita iha mos dalan atu tama ba grasa, nebee agora ita hamriik hela tanba ita fiar. No ita haksolok iha esperansa ba Maromak nia glória. 3No laos nee deit, maibee ita haksolok iha tempu terus. Tanba ita hatene katak tempu terus foo pasiénsia, 4no pasiénsia prova ita nia karakter, no karakter nee foo esperansa. 5No esperansa la halo ita moe, tanba Maromak fakar tiha Ninia domin ba ita nia fuan laran liu hosi Espíritu Santu nebee Nia foo ona ba ita.
6Tanba bainhira ita sei fraku hela, no tempu too ona, Kristu mate tanba sira nebee la hamtauk Maromak. 7Susar atu hetan ema nebee prontu atu mate tanba ema moris loos, maibee karik ema ida bele brani atu mate tanba ema diak. 8Maibee Maromak hatudu Ninia domin ba ita ho ida nee: Bainhira ita sala nain hela, Kristu mate tanba ita. 9Nee duni tanba agora ita sai loos ona liu hosi Ninia raan, oinsaa liu tan ita sei hetan salvasaun hosi Maromak nia laran hirus liu hosi Nia. 10Tanba se bainhira ita mak inimigu hela, ita konsege dame malu ho Maromak liu hosi Ninia Oan Mane nebee mate, oinsaa liu tan, bainhira ita dame malu ona, ita bele hetan salvasaun liu hosi Ninia moris. 11Laos nee deit, maibee ita mos haksolok iha Maromak liu hosi ita nia Nai Jesus Kristu, tanba liu hosi Nia ita dame malu ona.
Mate Iha Adão, Moris Iha Kristu
12Nee duni, sala tama iha mundu liu hosi ema ida, no ema nee mate tanba sala. Nunee mate pasa ba ema hotu tanba ema hotu halo sala ona. 13Sala tama ona iha mundu molok lei mai, maibee ita la sura sala bainhira lei la iha. 14Maski nunee, mate ukun hosi Adão too Moisés, inklui mos ba sira nebee halo sala nebee la hanesan Adão nia sala. Adão mak ilas ba Ida nebee atu mai.
15Maibee prezenti gratis la hanesan ho sala nee. Tanba liu hosi ema ida nia sala ema barak mate. Maibee liu tan nee, Maromak nia grasa no prezenti gratis nebee mai liu hosi grasa hosi Ema Ida, Jesus Kristu, sei fahe res-resin ba ema barak. 16No prezenti gratis nee la hanesan ho rezultadu hosi ema ida nia sala. Tanba julgamentu nebee tuir sala ida nee lori kastigu, maibee prezenti gratis nebee tuir sala barak lori laran loos. 17Tanba liu hosi ema ida nia sala, mate ukun liu hosi ema ida nee. Maibee oinsaa liu tan ba sira nebee simu grasa res-resin, no prezenti gratis nebee moris loos, sei ukun iha moris liu hosi Ema Ida, Jesus Kristu.
18Nee duni, hanesan sala ida lori kastigu ba ema hotu, nunee hahalok loos ida lori laran loos no moris ba ema hotu. 19Bainhira ema ida la halo tuir, ema barak sai sala nain; nunee mos bainhira Ema Ida halo tuir, ema barak hetan moris loos. 20Agora, lei tama hodi aumenta sala nebee hasoru lei. Maibee bainhira sala aumenta barak, grasa aumenta barak liu tan. 21Nunee hanesan sala ukun iha mate, grasa mos ukun liu hosi moris loos. No moris loos nee lori ita ba moris rohan laek liu hosi Jesus Kristu, ita nia Nai.
Currently Selected:
Roma 5: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.