Mateus 20
20
Servisu Iha Toos Uvas
1“Tanba reinu lalehan hanesan uma nain, iha dadeer-saan nia sai ba hodi buka ema atu servisu iha ninia toos uvas. 2No bainhira nia koalia ona ho ema servisu atu foo osan denáriu#20:2 Osan iha tempu nebaa, nebee baibain selu ba ema nia servisu ba loron ida. ida kada loron ida, nia haruka sira baa ninia toos uvas. 3Depois nia sai ba maizoumenus tuku sia, no haree ema seluk hamriik halimar iha merkadu. 4Nia dehan ba sira, ‘Imi mos baa, no tama toos uvas, no hau sei selu imi buat nebee loos.’ No sira baa. 5Nia sai fali maizoumenus meiudia no tuku tolu lokraik, no halo hanesan uluk nee. 6Maizoumenus tuku lima lokraik nia sai ba, no nia hetan ema seluk nebee hamriik halimar hela. Nia dehan ba sira, ‘Tanba saa mak imi hamriik halimar iha nee loron tomak?’ 7Sira dehan ba nia, ‘Tanba la iha ema nebee foo servisu mai ami.’ Nia dehan ba sira, ‘Imi mos baa tama toos uvas.’ 8Entaun bainhira rai nakaras ona, toos nia nain dehan ba ninia atan, ‘Bolu sira nebee servisu, no selu sira nia kolen. Hahuu hosi ida nebee ikus too ida nebee uluk.’ 9No bainhira sira mai nebee hetan servisu iha tuku lima lokraik, ida-idak simu osan denáriu ida. 10Maibee bainhira ema uluk mai, sira hanoin katak sira sei simu liu fali. Maibee ida-idak simu mos osan denáriu ida. 11Simu tiha osan nee, sira murmura hasoru uma nain nee. 12Sira dehan, ‘Sira nebee ikus nee servisu oras ida deit no ita boot selu sira hanesan ami. Maibee ami servisu todan durante loron manas.’ 13Maibee nia hataan ba ema ida hosi sira, no dehan, ‘Kolega, hau la halo sala ida ba o. Laos o konkorda ona ho hau atu hetan osan denáriu ida? 14Foti buat nebee o nian no baa deit. Hau sei foo ba ida ikus hanesan hau foo ba o. 15Laos katak hau iha direitu atu halo buat nebee hau hakarak ho hau nia riku-soin? O laran moras#20:15 Gregu dehan ‘matan aat’. Haree fraze hanesan iha Mateus 6:22 no Deuteronómiu 15:9. tanba hau mak diak ka?’ 16Nunee sira nebee ikus sei sai uluk, no sira nebee uluk sei sai ikus.”
Jesus Foo Hatene Nia Atu Mate
17 # 20:17-19 Haree Marcos 10:32-34 no Lucas 18:31-33. Bainhira Jesus lao sae dadaun ba Jerusalém, Nia bolu eskolante nain sanulu resin rua ba sorin, iha dalan klaran nee, no dehan ba sira, 18“Tebes, ita sae ba Jerusalém. No ema sei entrega Ema Nia Oan ba xefi saserdote sira no eskriba sira. Depois sira sei tesi lia atu foo kastigu mate ba Nia. 19Sira sei entrega Nia ba ema Jentiu sira. No ema Jentiu sira sei hakribi Nia, no baku Nia ho sikoti no oho Nia iha kruz.#20:19 Liafuan iha Gregu mak stauroo nebee iha sentidu ‘ai riin’ no bele refere ba kruz. Depois, iha loron terseiru, Nia sei moris hias.”
Inan Nia Pedidu
20 # 20:20-28 Haree Marcos 10:35-45. Depois Zebedeu nia oan mane sira nia inan mai hamutuk ho ninia oan mane sira, no hakneak iha Jesus nia oin hodi husu buat ida hosi Nia. 21Nia dehan ba feto nee, “O hakarak saida?” Feto dehan ba Nia, “Hau husu O bele dehan katak hau nia oan mane nain rua nee bele tuur iha O nia liman loos no O nia liman karuk iha O nia reinu.” 22Maibee Jesus hataan, “Imi la hatene buat nebee imi husu. Imi bele hemu hosi kopu nebee Hau atu hemu ka?” Sira dehan ba Nia, “Ami bele.” 23Nia dehan ba sira, “Imi sei hemu duni hosi Hau nia kopu, maibee atu tuur iha Hau nia liman loos no iha Hau nia liman karuk, nee laos Hau nian atu foo. Tanba Hau nia Aman prepara fatin nee hodi foo ba ema tuir Ninia hakarak.” 24No bainhira sira nain sanulu rona kona ba buat nee, sira sai hirus ho sira nia maluk nain rua nee. 25Maibee Jesus bolu sira mai Nia, no dehan, “Imi hatene katak ema Jentiu nia xefi sira domina sira. No sira nia ema boot sira hanehan sira. 26Maibee imi keta halo hanesan nee. Ema nebee sai boot iha imi nia leet tenki serví imi. 27No nia nebee hakarak sai xefi iha imi nia leet, nia tenki sai imi nia atan. 28Tanba Ema Nia Oan mos mai laos atu ema serví Nia, maibee atu serví ema, no foo Ninia moris hodi hola fali ema barak.”
Jesus Kura Ema Matan Delek Nain Rua
29Bainhira sira sai hosi Jerikó, ema lubun boot lao tuir Nia. 30No tebes, ema matan delek nain rua tuur iha dalan ninin. Bainhira sira rona katak Jesus lao liu, sira hakilar no dehan, “Hatudu laran luak mai ami, Oh Nai, Oan Mane hosi David!” 31No ema lubun boot siak sira, no haruka sira nonook lai. Maibee sira hakilar makaas liu tan no dehan, “Hatudu laran luak mai ami, Oh Nai, Oan Mane hosi David!” 32Jesus para, no bolu sira, no dehan, “Imi hakarak Hau halo saida ba imi?” 33Sira dehan ba Nia, “Nai, loke ami nia matan.” 34Jesus hanoin tebes sira ho Ninia fuan laran. Nia tau liman ba sira nia matan no sira haree kedas. No sira lao tuir Nia.
Currently Selected:
Mateus 20: BK
Highlight
Copy
Compare
Share
Want to have your highlights saved across all your devices? Sign up or sign in
Copyright Kadi Timor. All rights reserved. Portions of scripture can be used without permission for the promotion of God's glory.