Looma 16
16
Mamboto
1Me nyiluheeri ntumunu mu ntoono Fohibe, kibusi kyeetu, nde se kisari kari mu dibuundu dya Senkereya, 2mpisi heki lumutaambula mu Mfumu, mu kiteesu kyayelemene kya bangisi, na lumubakisa mu musamu ngo musamu, wu kaba na nzala beenu ; bukuri nde wabeeri mubakisi wa baatu balaka, na wa me-meene.
3Heenee mboto kuri Pirisika, na kuri Akila, bambaasi baami ba kisalu mu Kiristo Yisu, 4bari mu ntoono kidziingu kya me, baketi kuhoomboso kidziingu kya bo-meene ; kari wunu me nyibvutula matoondo kuri bo ko, ngo se na mabuundu momanso ma bangooyi. 5Heenee se mboto kuri dibuundu dikookutukinaa mu nzo bo. Heenee mboto kuri Epayineto, nduku yaami ya mutima, nde wuri watete mu Adzya, mu kusiila kanyi mu Kiristo. 6Heenee mboto kuri Maari, nde wasala kwalaka mu ntoono beenu. 7Heenee mboto kuri Anderoniko bo na Yunyasi, bo bari kaanda dyaami, na bambaasi baami ba mu boroko, baatu bamvuumfu ha kakati dya bantumu, bo batekisiri kuba mu Kiristo ti na me. 8Heenee mboto kuri Ampilyato, nduku yaami ya mutima mu Mfumu. 9Heenee mboto kuri Uribino, mbaasi yeetu ya kisalu mu Kiristo, na kuri Esetaki, nduku yaami ya mutima. 10Heenee mboto kuri Apele, nde wasoongiri bimbaangi byaandi mu Kiristo. Heenee mboto kuri babo, bari mu nzo Arisitobule. 11Heenee mboto kuri Herodyono, kaanda dyaami. Heenee mboto kuri baatu ba Narisise, bari mu Mfumu. 12Heenee mboto kuri Tirifana, na Tirifosa, bo basala kwalaka mu Mfumu. Heenee mboto kuri Peresise, nduku ya mutima, nde wasala kwalaka mu Mfumu. 13Heenee mboto kuri Lufusi, wasoolu mu Mfumu, na kuri nguri yaandi yiri se nguri me. 14Heenee mboto kuri Asinkirito, kuri Felengo, kuri Eremese, kuri Pateroba, kuri Eremase, na kuri bampaangi bari kintwaari na bo. 15Heenee mboto kuri Filolongo, na Yulya, Nere na kibusi kyaandi, bwobumosi kuri Olimpa na bobanso bangisi bari kintwaari na bo.
16Helesenee mamboto beenu na beenu mu nyumbutunu yangisi. Mabuundu momanso ma Kiristo maluheeri mboto.
Nsyamusunu yampotulu
17Bampaangi, me nyilusyaamisa mu kusa madyeele, mu baatu bakwetoso nkabunu, na bakwelubumusa makya, mu nyikusulu dzi luri lwataambula, batekelee mbisa ; 18bukuri baatu babo bahele kusalila Mfumu yeetu Kiristo, ngo myooyo mya bo-meene, na mu maampu mamabwe, na mu nzoonsulu dzalupyelu, bo bakwewuna baatu bahele kulubuka. 19Mukwongo, bintambukulu byeenu byayabakana kuri baatu bobanso. Ngo me nyimono kiminu mu ntoono beenu, me ntiiri ti beenu luba na madyeele mu mamabwete, na luba kutsyeemeke kwahele mamabi. 20Mwa kidzika kyantele, Nzaambi ya kiyeengi sa kakosono Saatana kunsa bitaambi byeenu.
Bweese bwa Mfumu yeenu Yisu buba na beenu !
21Timote, mbaasi yaami ya kisalu, wuluheekiri mboto ; Lukyosi, Yasoni na Sosipateri bari kaanda dyaami se, baluheekiri mboto.
22Me se Teretyusi, mutini mukaanda wumawu, nyiluheekiri mboto mu Mfumu.
23Ngayo, wataambula me, na wutaambula dibuundu dyodinso, wuluheekiri mboto. Eraseto, musweeki mboongo dza bvula, wuluheekiri mboto, Kwaratusi, mpaangi yeetu se wuluheekiri mboto. [24]
Nkeembu kuri Nzaambi
25Kuri wunde wakuka mu kulukumisa, bunu buri Musamu waami Wamubwete, wu nyikwenata mu nyaabusulu Yisu Kiristo, bunu buri nyabusulu mpaanu dzasweeku, kuholosono mu mantaangu, mahele mbandukulu na manunu. 26Mpaanu dzidzo dzamonokono mu lumalu, mu matinu ma babikiri, mu lutumu lwa Nzaambi, yahele mbandukulu na manunu, mu kuri ti makaanda momanso mabaka nyaabulu, na matumuma mu kanyi.
27Kuri Nzaambi ndemosi ngaa-madyeele, mu Yisu Kiristo, kuri nde kuba nkeembu, mu mantaangu momanso ! Amene.
Currently Selected:
Looma 16: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024