Looma 15
15
Kuyirika mabweeye kuri mbaasi nkani ka kuri ye-meene ko
1Beetu-meene turi na makwa, tuyelemini kukuunda bubolo, bwa babo bahele na makwa, na kuhele kweyirika mabweeye kuni kuri beetu-meene. 2Mpisi muutu mu beetu-meene, kayirika ma kiminu kuri mbaasi yaandi, mu ntoono mamabwe ma ntuungulu. 3Mukwongo, Kiristo kasii saka ma kiminu mu nde-meene ko, ngo bunu bu diri dyatinu : « Bitari bya babo batuka ye, byabwiilikila mu me. » 4Bukuri, momanso ma batekisiri kutina, bamatinini mu ntoono nyikusulu ya beetu-meene, mpisi heki, tubaka nsiitu mu kifiki, na mu nsyamusunu ya Matinu. 5Nzaambi ya kifiki na ya nsyamusunu, kasa kuri ti beenu luba na nyukusunu beenu na beenu, bunu buri kutya kwa Kiristo Yisu, 6mpisi heki, mu mutima mosi na mu munwa mosi, beenu lwekeembese wuri Nzaambi, na Taayi dya Mfumu yeetu Yisu Kiristo.
Musamu Wamubwete wa makaanda momanso
7Hango nkuumbu, yendee lwetaambula bambaasi beenu na beenu, bunu bwa lutaambula Kiristo se mu ntoono nkeembu Nzaambi. 8Bukuri, me nyileele ti, Kiristo wayisa kuba kisari, kya bayiriku bubakala, mu ntoono ngwanwa ya Nzaambi, mu kukukisa nsiilulu dzi basiriri bataayi. 9Makaanda ngo mari, makeembese Nzaambi mu ntoono mutima waandi wangebe, bunu bu diri dyatinu :
« Hango nkuumbu, me sa nyadumusa ye ha kakati dya makaanda,
na me sa nyayimbila mu ntoono nkuumbu yaaku. »
10Matinu mabweese kuleele ti :
« Makaanda, monee kiminu, kintwaari na baatu baandi ! »
11Na ti :
« Makaanda momanso, siikeenu Mfumu,
na baatu bobanso bamudumusa. »
12Esayi wubweese kuleele ti :
« Sa kwapala mutwiikila mu Yese,
wuteleme mu kutuma makaanda,
na makaanda sa masa nsiitu mu nde. »
13Hemese Nzaambi ya nsiitu, kaluluulusa mu kiminu kyokinso, na kiyeengi mu kanyi, mpisi luba lwabuukula mu nsiitu, mu mpinu dza Mpeeve Yangisi !
Kisalu kya Poolo kuri makaanda
14Mu mitariri beenu, bampaangi baami, me nyirikiri kuyaaba ti, beenu se lwaluula mu mutima bubwe, lwaluula mu nyaabulu yoyinso, na lwakuka mu kwelubusina beenu na beenu. 15Me nyalutinini mu kibakala mwamumosi, mu nzala kulubaambula mwooyo, mu ntoono bweese bwa mpa Nzaambi, 16mu kuba mu kisalu kya Kiristo Yisu, mu ntoono makaanda, bu nyayekele nyutu mu ntoono Musamu Wamubwete wa Nzaambi, mpisi makaanda maba kikabu kyataambulu, kyasakumunu kuri Mpeeve Yangisi. 17Hango me nyiri na kimweese mu Kiristo Yisu, mu mya Nzaambi. 18Mukwongo, mbuti me nyitsiitsa kudzoonso, lo mu myayirikiri Kiristo mu me, mu kuri ti makaanda matumuma, mu maampu na mu biyiriki, 19mu mpinu dza bidiimbu na dza bimaangu, mu mpinu dza Mpeeve ya Nzaambi. Mu didyo, me kuholosono ku Yerusalemi, na ku lumperi, natee ku nkoonsi ya Iluriko, nyakukisila kuyaabisa Musamu Wamubwete wa Kiristo. 20Mu didyo, me nyaba na musoongo, mu kweyaabisa Musamu Wamubwete, mumwo muri bakiri bahele kutaanguna Kiristo, mpisi heki me mpele kutuunga, ha yulu lufulu lwa ŋani. 21Ngo, bunu bu diri dyatinu :
« Babo bari basii kubayaabisa nde ko, sa bamumono,
na babo bari basii kuyuka badzoonsolo mu nde ko, sa babakula. »
Bitaasi bya Poolo mu kweende ku Looma
22Mu didyo, me bankakisila mbala dzalaka mu kwiisa kuri beenu. 23Ngo mu lumalu, bukuri nsiiri na kibeendu, kya kusalila mu mankoonsi mamo ko, nyiri na musoongo walaka mu kwiisa kuri beenu, kuholosono mibvu myalaka. 24Mu ntaangu yi nyikweende me ku Esepane, mukwongo nyitsima ti, sa nyalumono ha nyiluta, na bu meeni kumono kiminu mu kuba na beenu mwaantaangu, tumi lumpa biri mufunu mu budyeengi bwaami kukwo. 25Mu lumalu, me nyeensi ku Yerusalemi, mu kweesalila bangisi. 26Mukwongo, bari Masedoni na bari Akayi, bamwiini ti buri bwabubwete, mu kusoongo kintwaari mu ntoono bawelu bangisi, bari ku Yerusalemi. 27Bo bamwiini ti buri bwabubwete, na babee na kibiimbu kuri bo ; bukuri mbuti makaanda mataamburi mamabwe, ma kimpeeve kuri bo, lo mo se mayelemini kubasalila, mu bya mbakulu ya muswini. 28Me manaa kuyirika mamo, na manaa kubaha lubakusu lulwo, me sa ndutula kuri beenu ha nyikweende ku Esepane. 29Me nyaari ti, ha nyikwiisa kuri beenu, me sa nyiisa kuri nyaluula, mu lusakumunu lwa Kiristo.
30Bampaangi, me nyilusyaamisa, mu Mfumu yeetu Yisu Kiristo, na mu ntiilu ya Mpeeve, mu kunwaana kintwaari na me, mu nsaambulu kuri Nzaambi, mu ntoono me. 31Mpisi heki, me mvuuka mu myooko mya bangooyi bari ku Yuuda, na lubakusu lu nyinata me ku Yerusalemi, luba lwataambulu kuri bangisi. 32Mpisi heki me nyiisa mu kiminu kuri beenu, na mu kutya kwa Nzaambi, me mpuuma na beenu. 33Hemese Nzaambi ya kiyeengi, kaba na beenu bobanso ! Amene.
Currently Selected:
Looma 15: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024