Looma 11
11
Nzaambi wahele kuyekele Iselili
1Hango me nyifuula ti : Buri Nzaambi wayekele baatu baandi ? Pele, kadiri bubwo ko ! Bukuri, me nyafumuna mu Iselili, nyapalila mu Abarahami, mu mwooyo wa Benyami. 2Nzaambi wahele kuyekele baatu baandi ba katekisiri kuyaaba. Ho ti beenu, lwahele kuyaaba maleele Matinu mu Eliya, ha kari mu kunyoongono Iselili kuri Nzaambi ? 3« Mfumu, badzusiri babikiri ba ye, batsyaamini madziku maaku, na me me mukaka nyasiiri, na basaka kunzusa. » 4Ngo, nkya mvutu Nzaambi kari kamuha ? « Me nyasweeke mu ntoono ya me-meene, baatu 7.000, bari bahele kutsukumina Baali. » 5Ngo bwobumosi se mu ntaangu yimayi, kuri ndaambu Baatu yasaala, bunu buri nsoolulu ya bweese. 6Ngo mbuti mu bweese, lo kusii kuri ko ti mu biyiriki, bukuri bweese, lo busii bweese ko.
7Hango buri ? Bikwesaka Iselili, wahele kubibaka ; ngo wunde wubari basoolu, wabibaka ; ngo bakaka bakubisa mutima, 8bunu bu diri dyatinu : « Nzaambi wabaha mpeeve ya mbwiilu tolo, miisu mu kuhele kumono, na makutu mu kuhele kuyuka, natee mu kiluumbu kya lu. » 9Na Daavidi wuleele ti :
« Hemese ndiilu yaaku yiba kuri bo, mweete na siinga,
mpwaanyi ya kubwa mu masumu, na ya kutaambila maseembu.
10Hemese miisu mya bo miba mampimbisi, mpisi bahele kumono ;
na sa kuri ti, mambisa ma bo maba makooromo mu mpisi ntaangu. »
11Ngo me nyifuula ti : Buri bo babumuna kya, ngo bari babwa ? Pele, kadiri bubwo ko ! Kasi mu lumvuki lwa bo, ngo makaanda mari mabaka mvuukulu, mpisi heki bo basa bukwa kuri makaanda. 12Ngo mbuti heki lumvuki, lwa bo ngo busina bwa nsi, na mbwiilu bo ngo busina bwa makaanda, lo dyaburi bahele kutaambula mibvuriri bubwete, mu ntaangu yiri bobanso bakukiri ?
Mvuukulu ya makaanda
13Kuri beenu makaanda me nyeki dzoonso : Mu bukuri me nyiri ntumu kuri makaanda, nyikeembese kisalu kyaami, 14mbuti heki mu bubwo, lo me nsii kuri ti, baturi mu kaanda dya muswiinyi basa bukwa, na me mvuukisa babamosi mu bo. 15Mukwongo, mbuti kusuusa kwa bo ha luteke, ngo nyukusunu na nsi, lo buri bubeele mvutukulu bo, mbuti ka bumwooyo mu bafwa ko ?
16Mbuti ndaambu mbanda yiri yangisi, lo mbanda yoyinso se yangisi ; na mbuti mwaansi wangisi, lo bimpaala se byangisi. 17Ngo mbuti muti wubakunini, bimpaala byabimosi byatabula, na ye wuri muti wa ku musitu, bakukwiikiri mu muti wunde, mu kuba kintwaari na bimpaala byasaala, na kutaambula maampa mafumuna mu myaansi, 18lo yaa keembe ko, kuri bimpaala byatabula. Mbuti ye wusa kimweese, lo yaaba kuri ti, kari myaansi myamene mu ye ko, ngo ye wamene mu myaansi.
19Ye kampe sa leele ti : « Bimpaala bibyo babitabula, mpisi heki me mba nyakwiiku. » 20Bwabubwete ; bimpaala bibyo babitaburi bukuri byahele na kanyi, ngo ye wakangimina mu kanyi. Yaa ba na masiiku ko, ngo ba na boomo. 21Bukuri, mbuti Nzaambi kasii wuungula bimpaala, bya muti wamene mu nde-meene ko, lo ye se kakuwuungula ko. 22Ngo moneeti buri mbweeyulu mutima, na nkubulu mutima ya Nzaambi : Nde wuri na nkubulu mutima kuri babo babwa, ngo wuri na mbweeyulu mutima kuri ye, mbuti ye namitini kuba kunsa mbweeyulu mitima yiyo, mbuti ka bubwo ko, lo ye se sa bakuyusula. 23Bo ngo bari, mbuti bahele kunamitina mu mpelulu kanyi, lo bo se sa baba banamukusu ; bukuri Nzaambi wakuka, mu kubweese kubanamikisa. 24Mukwongo, mbuti ye kimpaala kya muti wa musitu, bakutabula na bakunamikisa mu muti wakunu, lo buri dihele kubvulila bubwete mu bo, mu kuba banamukusu mu muti wa bo-meene.
Iselili dyodinso sa dyaba dyabvuukusu
25Bampaangi, me ntii ko ti beenu luba kunsa bunzimbu, mu mitariri mpaanu yimayi, mpisi luhele kumonoko bunu bangaa-madyeele mu beenu-meene, bukuri nkubulu mutima, ya ndaambu kaanda dya Iselili sa yaba, natee makaanda momanso makotiri. 26Na mu bubwo, Iselili dyodinso diba dyabvuukusu, bunu bu diri dyatinu :
« Wunde wukuula baatu sa kafumuna ku Syooni,
na sa kayusula tungu mu Yakobi.
27Bubwo buba lulelusunu lu nyisa na bo, mu ntaangu yi nyiyisila masumu ma bo. »
28Mu mitariri Musamu Wamubwete, bo bataatu mu ntoono beenu ; ngo mu mitariri nsoolulu, bo banduku ba mutima mu ntoono bataayi, 29bukuri bikabu na mbila Nzaambi bikooyisika ko. 30Mukwongo, mu ntaangu yayikulu, beenu lwasiiri nko kuri Nzaambi, ngo mu lumalu, beenu balubakila ngebe, ha lumbisa lwa nko dza bo. 31Bunubwo se, bo mu lumalu, basa nko ha lumbisa lwa ngebe dzibari babakila beenu, mpisi heki bo se bababakila ngebe mu lumalu. 32Bukuri, Nzaambi wakaangisa bobanso kunsa nko, mpisi heki kabakila bobanso ngebe.
Nzaambi wamunene
33Busina, madyeele na nyaabulu ya Nzaambi biri na musundu ; nsundusulu dzaandi, dziri na bwa kufyongokono ko, na manzila maandi, mari na bwa kukotolo ko. 34Mukwongo,
« Na wayaaba kitsimi kya Mfumu ?
Bunu pele na waba muhe-mandoongi kuri Mfumu ?
35Bunu pele, na waha kuri nde,
mpisi nde kamubvutukila ? »
36Bukuri byobinso kuri nde, mu nde, na bya nde. Kuri nde kuba nkeembu mu bibvu ngo bibvu ! Amene !
Currently Selected:
Looma 11: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024