Mataayi 16
16
Bafarisi na basaduki basaka kidiimbu
(Mal 8.11-13; Luk 12.54-56)
1Bafarisi na Basaduki mu kutsiitsa Yisu, bakokosolo kuri nde, na bamuloombo kabasoongo kidiimbu kya ku yulu. 2Yisu wabvutula kuri bo ti : Nsinsika bu yitubukaa, beenu luleelaa ti : "Ntaangu yayibwe, bukuri yulu dyabeenge." 3Na mu kipari, luleelaa ti : "Lolo kuri mvula, bukuri yulu dyabeenge na diri mampimbisi." Ha hamosi, beenu luyaabaa kusobokoso kinzeri kya ku yulu ; ngo ha kaka, beenu lwahele kubangisina kusobokoso bidiimbu bya mantaangu. 4Kiseendu kyakibi na kyakimpala, kiri mu kusaka kidiimbu. Kuri kidiimbu ki babaha ko, mbuti ka kya Yoona ko. Na nde kabasiisaana weensi.
Lufunusu lwa Bafarisi na Basaduki
(Mal 8.14-21)
5Bayiki ba Yisu bu basabuka ku simu dyakaka, badzimikina kuholo mampa. 6Yisu waleele kuri bo ti : « Talee na seenee madyeele mu lufunusu lwa Bafarisi na Basaduki. » 7Bo babeke mu kwetsima bo-meene na baleele : « Ti kampe bukuri beetu tusii holaa mampa ko. » 8Bu kayaaba bubwo, Yisu waleele ti : « Baatu bangaa-kanyi dyantele, buri luri mu kwetsima mu beenu-meene, ti lwahele na mampa ? 9Beenu lwakiri kubakula pe, lwahele kubaambuka mwooyo mu mampa mataanu, mu baatu 5.000, na lutaangu lwa mampiri ma lwabvutiri, 10ti mu mampa nsaamu, mu baatu 4 000, na lutaangu lwa byeeke bi lwabvutiri ? 11Dyaburi beenu luri kubakula pe ti, me nsii kuludzoonsolo mu mitariri mampa ko ? Seenee madyeele mu lufunusu lwa Bafarisi na Basaduki. » 12Haho, bo babakuri ti, Yisu kari mu lufunusu lwa mampa kaba baleele ko, ti se madyeele, ngo mu nyikusulu dza Bafarisi na Basaduki.
Peetelo waleele ti Yisu ngo Kiristo
(Mal 8.27-30; Luk 9.18-21)
13Yisu bu kaba mu kweende ku nkoonsi ya Sedzare ya Filipo, wafuula bayiki baandi ti : « Baatu nki bari mu kweleele, ti Mwaana muutu na kari ? » 14Bamaba baleele ti : « Babamosi Yowane Mubotiki ; bakaka ti, Eliya ; bakimi ti, Yeremi, bunu pele mosi mu babikiri. » 15Yisu waleele kuri bo : « Heki beenu, buri luri mu kweleele, ti me na nyiri ? » 16Simoni Peetelo wabvutula, waleele ti : « Ye ngo Kiristo, Mwaana wa Nzaambi yamwooyo. » 17Yisu wabweese kuleele kuri nde ti : « Ye wuri na kiminu, Simoni mwaana Yoona ; kari muswiinyi na makila ko bikuyaabisiri dyo ; ngo Taayi dyaami diri mu mayulu wu kuyaabisiri dyo. 18Na me ndeeriri ku wuri yeenu : Ye ngo Peetelo, mbangukulu ti tari ; na ha yulu tari didyo, me sa nyatuunga dibuundu dyaami. Mpinu dza lufwa ka dzibvula makwa na dyo ko. 19Me sa nyakuha mafungula ma Kimfumu kya mayulu. Ma wukaanga ye ha butoto, sa maba makaangu ku mayulu. Na mamo ma wunyanguna ye ha butoto, sa maba manyangunu ku mayulu. » 20Hanaho, Yisu wadika bayiki baandi, ti yaa baleele kuri muutu ti mosi ko, ti nde ngo Kiristo.
Yisu wayaabisa lufwa na mfulukulu yaandi
(Mal 8.31–9.1; Luk 9.22-27)
21Kuholosono ntaangu yiyo, Yisu wabaandika mu kweyaabisa kuri bayiki baandi ti, nde yelemini kutoomboko ku Yerusalemi, na kumono mpasi dzalaka, mu myooko mya bakulu bababakala, bakuutu ba bangaanga-nzaambi, na Batini ba mangisi, yelemini kuba wadzusu, na mu kiluumbu kyabitatu, yelemini kuba wafuluka. 22Peetelo kamunataa ku lumperi, baandikiri kumuŋaŋina, waleele ti : « Nzaambi kakukebe Mfumu ! Pele ! Mimyo miri nyirimina mu ye ko ! » 23Yisu bu kasyeeteke, waleele kuri Peetelo ti : « Saatana, ba ku mambisa ma me. Ye wubumisa me makya, bukuri ma wutsima ye mari ma Nzaambi ko, ngo ma baatu ».
24Hanaho, Yisu waleele kuri bayiki baandi ti : « Mbuti muutu tiiri kunama me ha mambisa, lo hemese katuna nyutu ya nde-meene, kanata kuruwa dyaandi na kanama me. 25Bukuri, mpisi wunde wutiiri kubvuukisa kidziingu kyaandi, lo sa kakidziimbisa ; ngo wunde wudziimbisa kidziingu kyaandi mu ntoono me, lo sa kakidzuukila. 26Nkya ndaandu yiri na muutu, mbuti bakiri nsi yansiina, ngo fuukisiri kidziingu kyaandi ? Bunu pele, nki muutu katsiitsa kuha mu kuyiingisa kidziingu kyaandi ? 27Mukwongo, Mwaana muutu weki mu kwiisa, mu munkeembu wa taayi dyaandi, kintwaari na bambasi baandi ; haho, nde kabvutula kuri mpisi nde, bunu buri biyiriki byaandi. 28Mu ngwanwa me nyiluleeriri ti : Babamosi mu bateleme hamaha, bafwa ko, natee bakiri kumono, Mwaana muutu wiisiri mu Kimfumu kyaandi. »
Currently Selected:
Mataayi 16: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024