Mataayi 14
14
Lufwa lwa Yowane Mubotiki
(Mal 6.14-29; Luk 9.7-9)
1Mu ntaangu yiyo, Eroode mutumi nkoonsi, wayuka mvuumfu Yisu, 2na waleele kuri bisari byaandi ti : « Wunde Yowane Mubotiki, wafulukiri mu bafwa, mu didyo, nde kari mu kweyirika bimaangu. » 3Mukwongo, Eroode kakaangaana Yowane, wumutubiri mu boroko, mu ntoono Erodyade, mukasi Filipo mpaangi yaandi. 4Bukuri Yowane wabamuleelaa ti : « Ye wahele na miswa mu kuholo mukyeetu wunde ! » 5Eroode waba na nzala kumudzusa ngo waba bataana mpuumbu baatu, bukuri bo babamonaana ti nde mubikiri.
6Munkeembu wa kiluumbu kya mbutukulu Eroode bu katubuka, mwaana Erodyade wamukyeetu wakina ha kakati dya baatu, na Eroode wamono kiminu mu nde. 7Mu didyo, Eroode walaba maalu kuri mwaana, mu kumuha mpisi kitotolo ki kamuloombo. 8Nguri bu kamusinda, mwaana waleele ti : « Twalikila me hamaha, mutu Yowane Mubotiki munsa lukoombo ! » 9Mbyaasi wanyoongo mu mutima, ngo mu ntoono maalu ma kalabiri na mu ntoono baatu bakatumisini, nde waha miswa ti bamutwaalikila nde. 10Eroode waheeke baatu, mu kweetabula Yowane mutu, mu boroko. 11Batwaala mutu Yowane, munsa lukoombo, baha nde kuri mwaana mukyeetu, na nde wamunata kuri nguri yaandi. 12Bayiki ba Yowane bayisa, banaanguna nyutu, na bayende kweeyidziika ; tumi bayende kweeyaabisa kuri Yisu.
Yisu wadiisila 5 000 ma babakala
(Mal 6.30-44; Luk 9.10-17; Ywa 6.1-14)
13Yisu kayuka bubwo, wayisika haho, na wayende mu bwaatu ku nsi yankatu, ku kibeendu kya nde kaka. Mampuumbu ma baatu bu mayuka, mayisika mu mabvula na mamunama mu miilu. 14Bu kasunduka mu bwaatu, nde wamono mpuumbu baatu yayinene ; nde wabamwiina ngebe mu mutima, na wabeke mu kutsinikisa babeeru ba bo.
15Nsinsika bu yatubuka, bayiki baandi bakokosolo kuri nde na bamuleele ti : « Kibeendu kyankatu, na ntaangu yimwaaluta ; sindika mampuumbu mpisi meende mu mabula, be basuumba byandya bya bo-meene. » 16Yisu wabvutula kuri bo ti : « Bo bahele na nzala kubvutuka, baheenee bi badya beenu-meene. » 17Bo baleele kuri nde ti : « Turi na kitotolo ha ko, ha yulu mana mampa mataanu na bansu boolo. » 18Nde wabaleele ti : « Ntwalikilee byo ha. » 19Nde waleele kuri mampuumbu ti madzakala ha yulu bitiiti. Bu kaholo mampa mataanu na bansu boolo, watala ku yulu, wabisakumuna, wabukuna, na waha mampa kuri bayiki baandi, na bo baha mo kuri mampuumbu. 20Bobanso badya na bayukuta. Batolo bitsuri byasaariri, mitooto kuumi na myoolo myaluula. 21Baatu badiiri baba kampe 5 000, kwahele kutaanga bakyeetu na baala.
Yisu wabakwedyata ha yulu mukaanda maampa
(Mal 6.45-52; Ywa 6.15-21)
22Hanaho, Yisu wakwiikisa bayiki mu kukoto mu bwaatu, na batekesele ku simu dya mubu, mu ntaangu yi kabvutula mampuumbu. 23Bu kamana kubvutula mampuumbu, nde wanwaata ku yulu mulaandu, ku lumperi mu kweesaambila. Nsinsika bu yatubuka, nde waba nde mukaka kukwo. 24Bwaatu bwaba bweki la dyalaka na butoto. Mipaku mya maampa myanyingisa bwaatu, bukuri kiteembu kyaba babwaana. 25Mu kilookolo kyabina, kya butsuku, Yisu wayende kuri bo mu kwedyaata, ha yulu mubu. 26Bayiki bu bamumono wukwedyaata ha yulu mubu, babwiila kinkuuka, na baleele ti : « Kikyo kinyumbi ! » Bo mu boomo bafula misaakulu. 27Hanaho, Yisu wadzoonso, waleele kuri bo ti : « Lwaatee kibakala, wumawu me, yaa luba na boomo ko ! » 28Peetelo waleele kuri nde ti : « Mfumu, mbuti wunde ye, lo ha lutumu, mpisi me nyiisa kuri ye, ha yulu mukaanda maampa. » 29Yisu waleele : « Wasa ! » Peetelo wasunduka mu bwaatu na wadyaata ha yulu mukaanda maampa, mu kweende kuri Yisu. 30Bu kamono kiteembu kyamakwa, Peetelo wabaka boomo, na wabaandika kudyaama, wafula misaakulu waleele ti : « Mfumu, bvuukisa me ! » 31Hanaho, Yisu walaambula kooko na wamukwaata, wamuleele ti : « Muutu wa kanyi dyantele ! Buri ye bee sa mpaka ? » 32Bu bakoto mu bwaatu, kiteembu kyadzuuna. 33Baba mu bwaatu bamutsukumina na bamuleele ti : « Ngwanwa ye Mwaana Nzaambi ! »
Yisu watsinikisa babeeru mu nkoonsi ya Ngenesareti
(Mal 6.53-56)
34Bamanaa kusabuka mubu, bo batubuka mu nkoonsi ya Ngenesareti. 35Bari kukwo bayaabaa ti wu Yisu, batsamukisa mvuumfu mu nkoonsi yoyinso, na baatu bamutwaalikila bobanso baba na mabeeru. 36Bamuyingukila kuri ti habee nkani, babelemene kwaandi ti yini nto kinkutu kya nde kitsu. Na bobanso babelemini, babvuukiri.
Currently Selected:
Mataayi 14: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024