Mataayi 13
13
Nkuma ya mukuni
(Mal 4.1-9; Luk 8.4-8)
1Mu kiluumbu kikyo, Yisu kapalaa mu nzo, weedzakala ha simu dya mubu. 2Mampuumbu malaka makutukina mu mpele nde, kuri nde nweeti mu bwaatu, dzakiri, na mpuumbu yoyinso yisiiri ha simu. 3Nde wabadzoonsolo kwalaka, mu Mankuma. Nde ti : « Mukuni wayende mu kweenyaka. 4Mu ntaangu yikaba mu kwenyaka, mboongo yamosi yabwa ha luteembu lwa nzila. Banoni bayisa, na bayitootiri. 5Yakaka yabwa ha matari, haho yahele butoto bwalaka. Yo yamene mu mawasu ; ngo mu ntoono butoto bwaba bwahele na musundu, 6ntaangu bu yatoomboko, mitwiikila myababuka, na bu myaba myahele na myaansi, myo myakana. 7Yakaka yabwa ha yulu manseende, na manseende bu matoomboko mayisweteke. 8Yakimi yabwa ha butoto bwabubwete na yabuta. Miti myamosi myaha nkama bimbutu ; myakaka makuumi masaamunu, na myakimi makuumi matatu. 9Wunde wuri na makutu, hemese kayuka ! »
Bukuri nki Yisu kari mu kwesalila mankuma ?
(Mal 4.10-12; Luk 8.9-10)
10Bayiki baandi bu bakokosolo kuri nde, bamufuula ti : « Mu nki ye wuri mu kwebadzoonsolo mu mankuma ? » 11Nde wabvutula kuri bo ti : « Bukuri, kuri beenu baheeri kiteesu kya kuyaaba mpaanu dza Kimfumu kya mayulu ; ngo kuri bo, bahele kuha. 12Mukwongo, kuri wunde wuri na kitotolo, sa bamuha na sa kaba wabuukila mu bitotolo ; ngo kuri wahele na kitotolo, sa bamuyisila na kikari na kyo. » 13Hango nkuumbu, me nyiri mu kwebadzoonsolo mu mankuma, kuri heki baba, bu bari mu kumono bahele kumono, bu bari mu kuyuka, bahele kubakula, 14na mbikululu dza Esayi mu bo dzeensi mu mana ; dzileele bu :
"Beenu sa luyuka, ngo lubakula ko.
Beenu sa lwatala, ngo lumono ko.
15Bukuri mutima kaanda dimadi weki wakuba ;
bo bayeki bakiindisa makutu maaku,
na bayeki bakaanga miisu myaaku,
mu kubata ti bee bamwiini mu miisu,
bee bayukiri mu makutu maaku,
na kubata ti bee babakuri mu mutima,
na kuyiinga madyeele ;
na ti me bee nyibatsinikisi."
16« Kiminu kiri na beenu bukuri miisu myeenu mikwemono, na makutu meenu makweyuka. 17Mukwongo, ngwanwa me nyiluleele ti : Babikiri balaka, na baatu basuunguma se balaka, baba batya kumono ma lukwemono beenu, ngo basii mono ko ; na kuyuka ma lukweyuka beenu, ngo basii yuka ko. »
Yisu wusundula nkuma ya mukuni
(Mal 4.13-20; Luk 8.11-15)
18Beenu, yukee buri nkuma ya mukuni : 19Ntaangu yiyuka muutu maampu ma Kimfumu na wahele kumabakula, lo ngaa-bubi wiisiri kudzika ma bakuninyee mu mutima waandi : Wunde ngo wubakunini mu luteembu lwa nzila. 20Wubakunini mu bibeendu bya matari, wuri bu kayukiri maampu, wumataamburi hanaho mu kiminu, 21ngo wahele na myaansi mu nde-meene, nde muutu wa mwaantaangu yantele ; mpasi bunu pele nkwamusunu bu biisiri mu ntoono ya Maampu, dyeki kuri nde mpwaanyi ya mbwiilu. 22Wubakunini ha kakati dya manseende, wuri kayukaa Maampu, ngo minyoongi mya nsi, na mawunu ma busina biswetikisi Maampu, na mo mahele kubuta bimbutu. 23Wubakunini mu butoto bwabubwete, wuri bu kayukiri Maampu na wumabakuri ; nde wubuta bimbutu : Mosi nkama, wakaka makuumi masaamunu, wakimi makuumi matatu.
Nkuma yalooso na kinkengisi
24Yisu wabweese kubateele nkuma yikimi. Nde ti : « Kimfumu kya mayulu kyafwanikina na muutu, wunyaka nsaangi dzadzibwete mu nseke yaandi. 25Mu ntaangu yiri baatu bari tolo, mutaatu waandi wiisiri, na nyakini nsaangi dza kinkengisi munsa nseke, na weensi. 26Ntaangu yamenini nsaangi dzadzibwete, na dzibutiri bimbutu byabibwete, kinkengisi se kyapala. 27Bangaamba ba muutu ngaa-nzo bu bakokosolo, bamuleele ti : "Mfumu, buri ye kari nsaangi dzadzibwe wanyakini mu nseke yaaku ko ? Hango, kinkengisi kuri kifumini ?" 28Nde wabvutula kuri bo ti : "Mutaatu wayirikiri mya bubwo." Bangaamba baleele kuri nde ti : "Buri ye tiiri ti beetu tutsumuna kinkengisi kiri munsa nseke ?" 29Nde waleele ti : "Pele ! Bee lutsumini kinkengisi na looso ha kimosi. 30Hemese byobyoolo byebuuka natee kubatolo. Tumi mu ntaangu ya kutolo, me mbasi tsuku ndeele kuri babo batolo ti : Tekeselee kuyisila kinkengisi, lukaanga kyo mu biko na kuyoko ; tumi lukutikisa bimbutu byabibwe mu matalaka. »
Nkuma ya lusaangi lwa muti wuri nkuumbu sinapi
(Mal 4.30-32; Luk 13.18-19)
31Yisu wabweese kubateele nkuma yikimi ti : « Kimfumu kya mayulu kyafwanikina, na lusaangi lwa muti wuri nkuumbu sinapi, luri muutu kaholaana, kunini munsa nseke yaandi. 32Lwo lubvuriri buntele mu nsaangi dzodzinso ; ngo habaanaa lumwaabuuka, lo lubvuri kudzaangama mu binkoolo byobinso, lo weki muti, wuri banoni ba yulu bakwiisa, na batuunga madzaansa kunsa bimpaala byaandi. »
Nkuma ya lufunusu
(Luk 13.20-21)
33Yisu wabweese kubateele nkuma yikimi ti : « Kimfumu kya mayulu, kyafwanikina na lufunusu, luri mukyeetu bu kaluhoriri, yitiri biteesu bitatu munsa fufu, natee kuditoomboko dyodinso. »
Bukuri nki Yisu kakwedzoonsolo mu mankuma
(Mal 4.33-34)
34Myominso mimyo, Yisu mu mankuma kabadzoonsaana kuri mampuumbu. Na nde ka kaba badzoonsolaana kwahele kusalila mankuma ko. 35Mpisi heki maleele mubikiri, meende mu mana. Nde waleele ti :
« Me sa nzoonsolo mu Mankuma ;
me sa nyaabisa myasweeke, kuholosono kunu nyirikulu nsi. »
Yisu wasundula nkuma ya nsaangi dzadzibwete bo na kinkengisi
36Yisu wasiisa mampuumbu, wayende ku nzo. Bayiki baandi bakokosolo na bamuleele ti : « Sundukila beetu nkuma ya kinkengisi kya manseke. » 37Yisu wabvutula kuri bo ti : « Wunde wukwenyaka nsaangi dzadzibwete ngo Mwaana muutu, 38nseke ngo nsi, nsaangi dzadzibwete ngo baala ba Kimfumu, kinkengisi ngo baala bangaa-bubi, 39mutaatu wukwenyaka nsaangi dza kinkengisi, ngo dyaabulu ; ntolulu ngo nsukulu ntaangu, batori ngo bambasi. 40Hango, bunu bu bayisila kinkengisi na kukiyoko kyokinso, bunubwo se buba ku nsukulu ntaangu. 41Mwaana muutu sa kaheeke bambasi baandi, na sa bapalisa mu Kimfumu kyaandi, bobanso bakwebwiisa bambaasi mu masumu, na bakwesalila bubayi. 42Sa babalooso ku munyeenge-mbaawu, kukwo kuba bidilu na nkweetulu miinu. 43Haho, basuunguma mbasi tsuku baseme bunu ntaangu, mu Kimfumu kya Taayi dya bo. Wuri na makutu hemese kayuka ! »
Busina bwasweeku na musaanga
44« Kimfumu kya mayulu kyafwanikina, na busina bwasweeku munsa nseke, ngo muutu kamwiini, sweekiri. Mu ntoono kiminu kikari na kyo, nde weensi yarikiri byobinso bikari na byo, na wiisiri kusuumba nseke yiyo. »
45« Kimfumu kya mayulu kyabweese kufwanikina, na muutu ngaa-mumbungu wukwesaka misaanga myamibwete. 46Bu kadzuukiri musaanga mosi wantalu, weensi yarikiri byobinso bikari na byo, na wiisiri kusuumba musaanga wunde. »
Nkuma ya siinga
47« Kimfumu kya mayulu kyabweese kufwanikina, na siinga di batubiri mu mubu, ditolo bya bitsuumbu ngo bitsuumbu. 48Bu diluuriri, baditoombiri ku nkoto. Na baatu bu badzakiri, basooriri byabibwe, basokiri mu mansakasa, byabibi baloosiri. 49Bunubwo se mbasi tsuku, buba ku nsukulu ntaangu. Bambasi sa biisa, sa bayisila bababi ha kakati dya basuuguma, 50sa batuba bababi ku munyeenge-mbaawu. Kukwo mbasi tsuku, kuba bidilu na nkweetulu miinu. »
Bitotolo byamoono na byabikulu
51« Buri beenu lubakula momanso mamo ? » Bo babvutula ti : « Hein-hein ». 52Yisu waleele kuri bo ti : « Hango nkuumbu, mpisi Mutini-mangisi weki muyiki wa Kimfumu kya mayulu, wafwanikina na muutu ngaa-nzo, wupalisa mu kisweekulu kyaandi, bitotolo byamoono na byabikulu. »
Yisu bamubele ku Nadzareti
(Mal 6.1-6; Luk 4.16-30)
53Yisu kamanaa kuta mankuma mamo, ha kayende.
54Bu katubuka ku nkoonsi ya nde-meene, nde wabayikisa mu nzo-nkutukunu ya bo-meene, mu kiteesu kiri bo bakimuka na baleele ti : « Kuri kabakiri madyeele ma, na bimaangu bi ? 55Buri wukari mwaana mutuungi-manzo ko ? Buri nguri yaandi kari Maari ko, na bampaangi baandi, kari Yaakobo, Yoosefi, Simoni na Yuuda ko ? 56Na bibusi byaandi byobinso, buri byahele na beetu ? Kuri, kabakiri momanso ma ? » 57Bo babumina makya mu ntoono ya nde. Yisu waleele kuri bo ti : « Mubikiri, bahelaa kumukiinsa, bani ba ha bula bwaandi, na bari mu kaanda dyaandi. » 58Yisu kasii yirika bimaangu byalaka kukwo ko, bukuri bo baba bahele na kanyi.
Currently Selected:
Mataayi 13: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024