Esayi 2
2
Mansi momanso sa mahoomboko ku Yerusalemi
1Maampu ma Esayi, mwaana Amotsi makamwiini mu ntoono Yuuda na Yerusalemi#2.1 Kit.1 kiri ndaambu nguri ntoono mu Bik 2-4 bunu pele 2-11 ; kufwanikisa na 1.1..
2Mu mantaangu makwiisa,
mulaandu nzo Yaave
sa kaba wasuusa ha nkoto milaandu ;
nde sa kabvula kudzaangama na bikumu byabimosi,
na mansi momanso sa mahoomboko ku mulaandu wunde.
3Baatu balaka sa beende kukwo ; sa baleele ti :
Wasee, mpisi tutoombukee ku mulaandu wa Yaave,
ku Nzo-Nzaambi ya Yakobi !
Nde sa katuyikisa manzila maandi,
na sa twanamee misoki myaandi.
Bukuri mu Syooni sa mwapala Ngisi,
mu Yerusalemi maampu ma Yaave.
4Nde sa kaba mutsuundisi ha kakati dya mansi,
sa kaba munkabi-kati wa fundu-fundu dya baatu.
Mu mambeesi maaku mamala sa batsula minzokolo mya kutsabila,
mu madyoongi maaku, sa bayirika minkwata.
Kuri nsi yibweese kunaanguna mbeesi yayila mu kunwaanisa yakaka ko,
na babweese kuyuka dya mudziingu ko.
5Nzo ya Yakobi,
wasee, tudyaatee mu kusaalila kwa Yaave !
Kiluumbu kya Yaave, kiluumbu kya mutsuundu
6Bukuri ye wayekele kaanda dyaaku, nzo ya Yakobi,
bukuri nde waluula mu nsalulu dza mansi mari kupalilaa ntaangu,
bya baatu bakwesaka kufuula masuku, bunu Bafilisti,
bukuri bayukusina na banzeense ;
7nsi yaandi yaluula mu mboongo na woolo,
bisweekulu byaandi byahele manunu,
nsi yaandi yaluula mu makavaalu,
lutaangu lwa bikokolo byaandi lwahele manunu.
8Nsi yaandi yaluula mu banzaambi bampya,
ba kwetsukuma ha mankula ma kiyiriki kya myooko myaandi,
ha mankula ma byayirikiri mileembu myaandi.
9Muutu wayilima,
muutu wakuluka,
yaa wubahemesene ko#2.9 Mu mbangukulu yakaka yaa wubasiila mpemisi ko. !
10Koto kunsa mantari,
na sweemee kwaaku kunsa fuunda,
la na nsisi dza Yaave,
mu nsyeemunu ya bungisi bwaandi.
11Miisu mya muutu wuri na masiiku sa myakuluka,
kudzaangama kwa baatu sa kwa kooromo :
Wunu Yaave kitsu wuba wadzaangama mu kiluumbu kikyo.
12Bukuri kiri kiluumbu kya Yaave ngaa-mikaangu,
kuri bobanso bari na masiiku na lunaangu,
kuri kikyo kidzaangama na kiyelemini kuba kyakuluka ;
13Kuri mambuyu ma Libano momanso, ma mutele wadzaangama,
na kuri miloongi myominso mya ku Basaani,
14kuri milaandu myominso myadzaangama,
na kuri bikumu byobinso byateleme ;
15kuri manzo momanso mamintutu
na kuri bibaka byobinso byakuma ;
16kuri mabwaatu momanso ma ku Taresi,
na kuri byaami byobinso byabibwe.
17Mutele muutu sa kaba wakooromo,
kudzaangama kwa baatu sa kwaba kwakuluka.
Mu kiluumbu kikyo, wunu Yaave kitsu wuba wadzaangama.
18Banzaambi bobanso bampya sa babakoombolo.
19Sa bakoto munsa mantari ma matari
na kunsa musundu fuundu,
la na nzala-mwooyo Yaave,
mu nsyeemunu ya bungisi bwaandi,
mu ntaangu yi kateleme mu kupamuna butoto.
20Mu kiluumbu kikyo, muutu sa kalooso
kuri bampuku na bangeembu
banzaambi baaku bampya bamboongo
na ba woolo,
bakayirikiri mu kutsukuma ha mankula ma bo ;
21Bo sa badziika mu miduku mya matari
na kunsa minte mya malweende,
la na nzala-mwooyo Yaave,
mu nsyeemunu ya bungisi bwaandi,
mu ntaangu yi kateleme mu kupamuna butoto.
22Hemesee muutu,
wuri wuni muwuumunu kari na nde munsa mamboombo :
Nkya mufunu kari na nde ?
Currently Selected:
Esayi 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024