Ose 2
2
Kiluumbu kyakinene kya Yidzerehele
1Lutaangu lwa baala ba Iselili,
sa lwaba bunu munyeenge wa mubu,
wuri lo bahele kubangisina kuteese na kutaanga.
Ha kibeendu kinikyo
ki babaleeriri ti :
Beenu luri kaanda dya me ko,
sa babaleele ti :
"Baala ba Nzaambi Yamwooyo.
2Baala ba Yuuda na baala ba Iselili,
sa bakutukina ha kimosi,
sa basoolo mfumu mosi,
na sa baluulusa nsi,
bukuri kikyo sa kyaba kiluumbu kyakinene, kya Yidzerehele !
3Leelee kuri bampaangi beenu ti : Ami ! Kaanda dyaami !
Kuri bibusi byeenu : Luhama ! Wakutya !
Iselili, mukasi wahele kukwiikima
4Fuundeenu nguri yeenu, munateenu ku muyalu,
bukuri nde kari mukasi me ko,
na me se nyiri mulumi nde ko.
Kayisila bidiimbu bya kimpala kyaandi ha busu bwaandi,
na bidiimbu bya buyala bwaandi mu mabeene.
5Mu kubata ti me nyimusyoonono mansaanda,
nyimusa kimpene,
bunu ha bamubutiri !
Nyimukitula bunu nsi yankatu,
na bunu nsi ya mungengi,
na kumudzusula mu mpwiisu maampa.
6Me nyiri ntiilu baala ba nde ko,
bukuri babo, baala bangaa-buyala#2.6 Kumono 1.2 na matina..
7Bukuri nguri bo wasiiri buyala,
wunde wababutiri, waluula mu nsoni.
Nde waleeriri ti :
''Me ntiiri kwenama minkuula myaami,
mikoompaanaa byandya, maampa,
mabvuungu, mansaanda, maasi na malu maami.''
8« Hango nkuumbu, me nyeki kaka
nzila ye mu manseende,
me nyitelemese kikaku mu yo ;
mpisi kahele bubweese kudzuukila misoki myaandi.
9Sa kanama minkuula myaandi,
ngo kababakila ko ;
nde sa kabasaka,
ngo kabadzuukula ko.
Nde sa kaleele ti :
“Me nyeensi,
me bvutukiri kuri mulumi waami watete,
bukuri me nyaba mvuri kuba mu kiminu, ti na mu lumalu !” »
10« Nde waba wahele kubakula ti,
me nyabamuhaanaa bele,
malu na maasi mamoono.
Me nyaba kumuluulusaana mu woolo,
dibabasalilaa mu nzaambi Baali.
11Hango nkuumbu, me sa nyaholo
bele dyaami, mu ntaangu ya ntolulu,
na malu maami mamoono, mu ntaangu ya kukamuna.
Sa nyadzika mabvuungu na mansaanda maami,
ma kabee fukaa kimpene kyaandi.
12Na mu lu me mbeeri nyimusiiri kimpene,
ha busu bwa minkuula myaandi.
Ka kuba muutu ko, wumukuula mu myooko mya me.
13Me sa nyasa nsukulu mu kiminu kyaandi kyokinso,
mu minkeembu myaandi
mya ngoondo yamoono,
mya saba yaandi, na mya mpisi mbwanukunu yaandi.
14Me sa nsaamuna bviinya dyaandi,
na mungenge waandi, mu mi kaleele ti : "Wunde mufutu
wumpeeri minkuula myaami."
Me sa nyibikitula musitu,
na bibulu bya kibiti sa babidya.
15Me sa nyafutisa nde,
biluumbu bya Baali biri mu byo nde kaba
yokaana mananaasi.
Nde walwaatiri miluungu na misaangu,
mu kweende ha mambisa ma minkuula myaandi.
Nde mwaa dzimbikina me,
mbikululu dza Yaave.
16Mu didyo, mono, me sa nyamukuunga,
sa nyamusindika ku nsi yankatu,
na sa nyadzoonso kuri mutima waandi.
17Me sa nyaha kuri nde manseke maandi ma bviinya, na duuru dya Akori,
bunu mweelu wansiitu.
Na kukwo, nde sa kayimbila bunu mu biluumbu bya butuuti bwaandi,
bunu mu ntaangu yi babapala mu nsi ya Ngipiti. »
Kiluumbu kya nyukusunu
18« Mu kiluumbu kikyo, sa kwaba, mbikululu dza Yaave,
nde sa kateele me "mulumi waami",
kabweese kuteele me “Baali dyaami” ko. »
19« Me sa nyusula mankuumbu ma Baali mu munwa waandi,
bo babweese kubambukila
mankuumbu ma bo mwooyo ko.
20Mu kiluumbu kikyo,
me sa nyasa lulelusunu mu ntoono bo,
na bibulu bya kibiti,
na banoni ba mayulu,
na bisyekete bya ha butoto.
Me sa nyakosono mansyaari, mambeesi mamala,
na kuwurisa midziingu,
na kulooso byo la na bula.
Me sa nyibaneŋesene kunsa kidzuunu.
21Me sa nyasa kinduku kya makweele
na ye kwakinkulu ;
me sa nyasa kinduku kya makweele na ye mu nsungumunu
na kwahele bubayi,
mu nkwikumunu na mu kutya.
22Me sa nyasa kinduku kya makweele na ye,
mu ngwanwa,
na ye sa yaaba Yaave.
23Mu kiluumbu kikyo,
me sa nyaha mvutu, mbikululu dza Yaave.
Me sa nyaha mvutu kuri mayulu,
na bo sa baha mvutu kuri butoto#2.23 Mu kuheeke mvula ha butoto, yulu diyelemini kuyitaambula kuri Nzaambi..
24Na butoto sa bwaha mvutu kuri bwaangila,
kuri malu mamoono,
kuri maasi mamoono ;
na bo sa baha mvutu kuri Yidzerehele.
25Me sa nyimukuna ha kakati dya bula mu ntoono me,
me sa nyafwiila Lo-Ruhama ngebe,
na sa ndeele kuri Lo-Ami ti : Ye kaanda dyaami. »
Na nde sa kanteele : "Nzaambi yaami".
Currently Selected:
Ose 2: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024