Eseteere 1
1
Mbyaasi Dzerekese wayirika mubuluku wamunene
1Yaba ntaangu ya Dzerekese#1.1Mbyaasi yimayi ngo Dzerekese watete, wabatumaana mansi momanso maba kunsa lutumu lwa Perese mu 486 natee 464 tekesele Yisu Kiristo Mbyaasi yiyo yiri yayabakana se mu nkuumbu ya Asweruse.. Dzerekese waba mbyaasi mu mankoonsi nkama na makuumi moolo na nsaamu, kuholosono ku nsi ya Indya natee ku Etyopi. 2Mu ntaangu yiyo, mbyaasi Dzerekese kaholaana kimfumu ku bvula dya Suse, 3mu mubvu wamitatu wa kimfumu kyaandi, nde wayirika mubuluku wamunene, mu ntoono bakuutu balukiinsu na bisari byaandi, nde watumisa se bakuutu ba mukaangu bayongolo wa ku Perese na wa ku Medese, na batumi na bamfumu ba mankoonsi. 4Nde wabasoongo bunene bwa busina bwaandi, na bubwete bwa kimfumu kyaandi. Munkeembu wadziingila nkama na makuumi mpoomo ma biluumbu. 5Biluumbu bibyo bu byamana kukuka, mbyaasi wabweese kuyirika mubuluku wamunene, mu ntoono baatu bobanso, babisina na babawelu babadzakilaana ku bvula dya Suse. Munkeembu wunde wadziingila biluumbu nsaamu kunsa miti myaba ha mbasi mbyaasi. 6Biteendi bya mansaanda mamabwete, byahembeke na byabeenge, byaba byayende kweleleke mu misiinga myahembeke na myabeenge, mu miluungu myapalata myakolokoso mu makuunsi ma matari mantalu. Mambuka mawoolo na mapalata maba mayende kweyala mu nsi, yatuunga mu matari mantiinta ya musaka na yahembeke, yayandila na yapiinda. 7Malu maba kwenwiina, mu mambasa ma woolo ma bitsuumbu-bitsuumbu. Malu maba mabuukula mu kiteesu kyaba kitiiri mbyaasi. 8Mpisi muutu haba lo nwiini bunu bu katiiriri. Mbyaasi waheeri lutumu kuri bisari byaandi, mu kuyukutisa mampwiisu ma mpisi muutu. 9Mukasi mbyaasi wuri nkuumbu Bvaseti, nde se wayirika mubuluku wamunene, mu ntoono bakyeetu munsa nzo mbyaasi Dzerekese.
Bvaseti mukasi mbyaasi wadziimbisa bweese bwaandi
10Mu kiluumbu kyansaamu kya mubuluku, mbyaasi Dzerekese waba na kiminu mu mutima, mu ntoono malu ma kanwiini. Nde wateele bampokoro nsaamu bakoomusalilaa : Mehumane, Bidzeta, Harebona, Bingeta, Abangata, Dzetare na Karakasa. 11Nde wabaleele ti, batwaala ha busu bwa nde, Bvaseti mukasi mbyaasi, kuri walwaata lukoongolo lwa bumbyaasi. Nde wabatiiri kusoongo bubwete bwa mukasi waandi, kuri bakuutu balukiinsu, na kuri baatu bakaka, bukuri waba nkati wamubwete kwalaka. 12Ngo, bampokoro babo bu bamuyaabisa maleeriri mbyaasi, Bvaseti mukasi mbyaasi wabisa kwiisa. Hanaho, mbyaasi wakoto kunsa kiteesu kya nkesi dzamakwa. 13Nde wafuula mandoongi kuri bangaa-madyeele bayaari mantaangu, bukuri misamu mya mbyaasi myaba kuyirikila, ku mfuundu ya baatu bari na nyaabulu mangisi na mikele. 14Mu bakuutu baba nkati-nsi na nde kwaba Karesena, Setara, Ademata, Taresise, Merese, Maresena, Mamukani. Babo ngo bakuutu nsaamu balukiinsu ba ku Perese na ba ku Medese, baba nkati-nsi na nde, na baba mu bibeendu byatete mu kimfumu. 15Mbyaasi wabafuula ti : « Mu mangisi, nkya manzeengulu mayelimini kubwa mu Bvaseti mukasi mbyaasi, wuri kasiiri kutumuma mu lutumu lwa mbyaasi Dzerekese, lumutubukirye bampokoro ? »
16Ngo Memukani waleele kuri mbyaasi na kuri bakuutu baandi balukiinsu ti : « Bvaseti mukasi mbyaasi, kari kunu kuri mbyaasi kayirikiri mamabi ko, ngo se na kuri bakuutu bobanso balukiinsu, na kuri baatu bobanso, bari mu mankoonsi momanso mari mu lutumu lwa mbyaasi Dzerekese. 17Bakyeetu bobanso sa bayuka musamu wa mukasi mbyaasi, na sa bakoto mu kuhele kubvumina lutumu lwa balumi baaku, sa baleele ti : “Mbyaasi Dzerekese, ha mbeti waheeri lutumu lwa kutwaala Bvaseti, mukasi waandi ha busu bwa nde, ngo mukasi kasiiri kwiisa ko !” 18Mu lumalu bakasi ba bamfumu bari Perese, na bari Medese, bayukaana musamu wa mukasi mbyaasi, bo se sa baha mamvutu ma bubwo, kuri bakuutu balukiinsu ba mbyaasi, na mimyo sa myabaha nkesi. 19Ngo mbuti diri dyadibwete kuri mbyaasi, lo bapalisa mukaanda watina lutumu lwa mbyaasi, munsa mangisi ma bari Perese na bari Medese, luri lo kuyusula pe, luleele kuri ti, Bvaseti kasiiri na miswa ko mya kuteleme ha busu bwa mbyaasi Dzerekese, ngo mbyaasi sa kaha kimfumu kyamukasi mbyaasi, kuri mukyeetu mukimi wubvuri lukiinsu ti na nde. 20Nzeengulu dzidzo, bu dzimeeni kuyabakana mu mansi momanso ma kimfumu kya mbyaasi, lo bakyeetu bobanso sa babvumina balumi baaku, ti baba balukiinsu bunu pele bakuluka. »
21Musamu wunde wamonokono wamubwete ha busu bwa mbyaasi, na ha busu bwa bakuutu balukiinsu, na mbyaasi wayirika bunu bwa baleele Memukani 22Nde waheeke mikaanda, mu mankoonsi momanso mari kunsa lutumu lwaandi ; mpisi baatu, na mukaanda watinu mu ndiinga yi badzoonsaa mu nkoonsi yaaku, kuri heki mpisi wamubakala kaba mfumu mu nzo yaandi, na kwedzoonso ndiinga ya kaanda dyaandi.
Currently Selected:
Eseteere 1: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024