Biyiriki bya Bantumu 24
24
Mfuundulu Poolo kuri Bayudayo
1Ha mambisa ma biluumbu bitaanu, mukuutu bangaanga-nzaambi, Ananyasi wayisa, kintwaari na bakulu bababakala babamosi, na nzoonsi mosi ya nkariri, nkuumbu yaandi Teretulusi, babo bafuundiri Poolo kuri ngoforo. 2Bu bamuteele, Teretulusi wabaandika mu kumufuunda, waleele ti : "Wa lukiinsu, beetu twataambula kiyeengi kyakinene, na mbweeyulu ya nsi yimayi, yiri mu kumonokono mu ntoono bweese bwa ye, 3Wa lukiinsu Felikese, beetu tutoondo kwalaka bu tutaambulaa mamo, mu mpisi ntaangu, na mu bibeendu byobinso. 4Me ntiiri kudya ntaangu ye yalaka ko, me nyikuloombo mu kuba na mpemisi mu kuywiila beetu, mu mwaa myamikufi. 5Beetu tubakuryee ti muutu wu kiyoolo kiri, mukuutu kisaangala kuri Bayudayo bobanso, munu mu bari bayende kwetuunga ; tumi ha yulu haho se, nde mukuutu kabu dya minsaambiri myahaambuka, mya ku Nadzareti. 6Nde watsiitsiri kusumuna Nzo-Nzaambi, mu didyo, beetu twamukaangiri. [7] 8Mbuti ye wumufuuriri, lo ye sa mono ti, mi turi mu kumufuundila miri myangwanwa." 9Bayudayo basika ti mimyo bunubwo miri.
Kinzoonsi kya Poolo mu kukalila nyutu
10Ngoforo bu kamuha miswa mu kunzoonso, Poolo wabvutula waleele ti : "Kuholosono mibvu myalaka, me nyaari ti ye wuri nzoonsi mu kaanda dimadi. Hango nkuumbu, me nyikalila nyutu yaami mu nsiitu. 11Ye wayelemene kuyaaba ti, me nyakiri kukukisa pe biluumbu kuumi na byoolo, kuholosono ku nyatoombikiri me ku Yerusalemi, mu kusaambila. 12Muutu ti mosi wahele kumono me, ti mu Nzo-Nzaambi, kuri nyikalikisa na muutu, bunu pele nyisinda mpuumbu mu kusa kisaangala, ti mu manzo ma nkutukunu, ti kunsa bvula. 13Bo ka babangisina kusoongo kitotolo ti kimosi ko kuri ye, mu mibari mu kufuundila me. 14Me ntaamburi musamu wunde wubari mu kuleele me, mu nzila ya kabu. Mukwongo me nyiri mu kwesaambila Nzaambi yiyo ya bataayi beetu bobanso. Me nyasa kanyi mu matinu, mu Mangisi na Babikiri. 15Nsiitu dzi nyasa mu Nzaambi, dzinidzo se bo bari na dzo, sa kwaba mfulukulu baatu basuunguma na bangaa-bubayi. 16Me-meene nyisalila kwa mu kumonoko kwahele maseembu, mu nsimunu yaami, ha busu bwa Nzaambi, na ha busu bwa baatu mu mantaangu momanso.
17« Ha mambisa ma mibvu myalaka, me nyiisiri kubvutuka ku Yerusalemi, mu kutwaala lubakusu kuri kaanda dyaami, na kuha bikabu. 18Mu ntaangu ya bikabu yiyo, bo bamwiini me nyatsyeemeke mu Nzo-Nzaambi, kari na mpuumbu ko, kari se mu kisaangala ko. 19Ngo Bayudayo babamosi ba ku Adzya, babeeri haho, bo baketyee kufuunda me kuri ye, mbuti bamwii dyadibi mu me. 20Bunu pele, bamaba baleele, bubi bubamwiini mu me, ha nyabee nyateleme ha busu bwa kikuutu kya Bayudayo. 21Bunu pele mu mbeembu yoyimosi yi nyabikisiri me, ha kakati dya bo, "mu ntoono mfulukulu ya bafwa, me bari mu kutsuundisa, lolo di ha busu bwa beenu !" »
22Felikese wayiinga kiluumbu, bu kaba yaari myominso mitariri Nzila ya Mfumu, na waleele ti : "Tumi ha sunduka Lisyasi, Kumanda, me nswiikisa misamu mitariri beenu." 23Nde watuma mukuutu nkama mu kumukebe mu boroko, kuri wuri na mwaa bunsaalisi, na se kuri banduku baandi bamubakisa.
Poolo ha busu bwa Felikese na bwa Durusile
24Ha mambisa ma mwaabiluumbu, Felikese bo na mukasi waandi wa Muyudayo, Durusile, bayisa. Batumisa Poolo, na bamuyuka wudzoonsolo, mu kanyi dya Kiristo Yisu. 25Bo bayolo na nde mu mitariri nsungumunu, mu nkebulu nyutu, na mu mutsuundu wukwiisa. Felikese wabwiikila kinkuuku, waleele ti : "Mu ntaangu yi, yende ; me mbaka mpwaanyi sa nyikuteele lukimi." 26Nde waba nsiitu ti, Poolo sa kamuha mboongo ; mu didyo nde kaba muteelaana kinsosi-kinsosi mu kuyolaa na nde. 27Mibvu myoolo bu myalabuka, Felikese wataambula muyiingisi, nkuumbu yaandi, Porekyusi Fesetusi. Wunde se bu katya kubweeye ha busu bwa Bayudayo, wahemese Poolo mu boroko.
Currently Selected:
Biyiriki bya Bantumu 24: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024