Biyiriki bya Bantumu 23
23
1Poolo katala kikuutu kya Bayudayo kisoosi waleele ti : « Bampaangi baami, mu nsimunu yaami yoyinso, me nyadyeeti ha busu bwa Nzaambi, mu kifwaani kyakibwe, natee kiluumbu ki. » 2Mukuutu ngaanga-Nzaambi, Ananyasi, watuma kuri baba haho, mu kumulata mu munwa. 3Ngo Poolo waleele kuri nde ti : « Ngo Nzaambi ye-meene kalata, kibaki kyakila mpeembe ye wuri ! Ye wadzakala haho mu kutsuundisa bunu buri mangisi, na mu nsaanunu mangisi, ye wutuma balata me ! » 4Baba haho baleele ti : « Ye tukiri mukuutu bangaanga-nzaambi ! » 5Poolo waleele ti : « Bampaangi baami, me mbee nyahele kuyaaba, ti nde mukuutu ngaanga-Nzaambi. Ngo matinu maleele ti : "Yaa dzoonsolo bwabubi mu mfumu kaanda ko !" »
6Poolo bu kaba kayaari, ti kunsa kikuutu, babamosi baba Basaduki, na bakaka Bafarisi, nde wabikisa ha busu bwa bo ti : « Bampaangi baami, me nyiri mu Mufarisi, mwaana Mufarisi, me bari mu kutsuundisa, mu ntoono nsiitu, na mu ntoono mfulukulu ya bafwa. » 7Nde bu kamana kuleele bubwo, yumu dyabwa ha kakati dya Bafarisi na Basaduki ; mpuumbu yakabuka. 8Basaduki bakooleelaa ti, mfulukulu, na bambasi, na mampeeve biri ko ; ngo Bafarisi babitaambulaana. 9Misaakulu myaminene myayukukuna, Batini babamosi bari mu kibari kya Bafarisi, bateleme, basa mpaka baleele ti : "Beetu twahele kumono dyadibi mu muutu wu ; kampe mbasi bunu pele mpeeve yidzoonsiri kuri nde !" 10Yumu dyamonoko dyamakwa, Kumanda wabaka boomo, ti Poolo bee bamusembiri. Nde watuma bayongolo basunduka, beende bamupalisa ha kakati dya bari mu kuyumuna, na bamunata ku lupaangu ludzakalaa bayongolo. 11Mu butsuku bwaba nama, Mfumu wamonoko kuri nde, waleele ti : « Ba na kibakala, bukuri, bunu bu teerye kimbaangi mu mitariri me ku Yerusalemi, bunubwo se ye yelemini, kweeta kimbaangi ku Looma. »
Poolo bamusiila mamfuundu
12Bwiisi bu bwakya, Bayudayo basa mfuundu, balaba maalu bo-meene baleele ti, natee bakiri kudzusa Poolo, tumi bo badya na banwa. 13Badiiri kikaandu kikyo baba baluta makuumi mana ma baatu. 14Bo bakokosolo kuri bangaanga-nzaambi, na kuri bakulu bababakala baleele kuri bo ti : « Beetu tumwaalaba maalu beetu-meene ti, beetu mu kusa kitotolo mu munwa, natee beetu twakiri kudzusa Poolo. 15Hango mu lumalu, yukusunee beenu na mukuutu bayongolo kintwaari na kikuutu kya Bayudayo, batwaala Poolo kuri beenu, luyirika kufyongokono mya nde, na beetu, tekesele katubuka hamaha, twayirima mu kumudzusa. »
16Ngo mwaana kibusi kya Poolo wayuka kele didyo ; wayende ku lupaangu ludzakalaa bayongolo, wayaabisa mamo kuri Poolo. 17Poolo kateelaana mosi mu bakuutu ba nkama bayongolo waleele ti : « Nata munkuula wu, kuri Kumanda, bukuri nde wuri na ma kuyaabisa kuri nde. » 18Wunde kamuholaana, wumuneti kuri Kumanda na wamuleele ti : "Poolo wuri mu boroko, teeriryee me, na ndoombiri, me nyikutwalikila munkuula wu, wuri na dya kuleele kuri ye." 19Kumanda, wamukwaata mu kooko, wayende na nde ha lumperi, wasaka kuyaaba : "Nkya mo wuri na mo ma kuleele kuri me ?" 20Nde waleele ti : "Bayudayo bamwaakaanga kitsimi kya kuloombo kuri ye, mpisi heki bweepari, ye nata Poolo kuri kikuutu, bunu ti ye tiiri kuyaaba na tswitswikii mya mu nde." 21Ye ngo wuri, yaa tambukila mya bo ko ; baatu baluta lutaangu lwa makuumi mana bamwaamulebekele mweete. Bo balabiryee maalu mu bo-meene ti, natee badzusiri Poolo tumi badiiri na banwiini. Mu lumalu bo bayirima, bakiingila lusiilulu lwa ye. 22Hango Kumanda, wabvutula munkuula wunde, na wamudika ti, yaa kuyaabisa ma kamuyaabisiri mamo, kuri muutu ti mosi ko.
Poolo bamunata ku Sedzare
23Kumanda, bu kateele bakuutu boolo ba nkama, waleele ti : "Holee nkama dzoolo dza bayongolo, makuumi nsaamu ma banati ba makavaalu, na nkama dzoolo dza bakebi, bayirima mu kweende ku Sedzare, mu kilookolo kyabitatu kya butsuku. 24Yirikeenu se makavaalu, malunatina Poolo mpeembe-mpolo kuri ngoforo Felikese." 25Nde watina mukaanda, na mi katinini mimami : 26"Kolode Lisyasi, kuri ngoforo ya lukiinsu Felikese, mboto ! 27Muutu wu, Bayudayo bamukaangiri, na bamono dyo ti bayelemene kumudzusa. Me bu nyayukiri ti, muutu bari Looma, ha nyayensi na mpuumbu bayongolo mu kumukuula. 28Bu nyasakiri kuyaaba bubi, bu bari mu kumufuundila, me nyamuneti ha busu bwa kikuutu kya bo. 29Me mwiinyee ti, mibari mu kumufuundila, mitariri mi bakwesa mpaka mu mangisi ma bo. Kuri musamu ti mosi ko, mu mibari mu kumufuundila, wu bayelemini mu kumudzusa bunu pele, mu kumusoko mu boroko. 30Bu banyaabisiri kele dya mu nde, mawasu-mawasu, me nyikuheekiri nde, na me ndoombiri kuri bari mu kumufuunda, biisa baleele ha busu bwa ye, myamibi mi kari kayirika."
31Hango, bayongolo, bunu buri lutumu lubari bataambula, baholo Poolo, bamunata mu butsuku ku bvula dya Antipateri. 32Bukyaanaa, baha miswa kuri banati ba makavaalu mu kweemuholo na kumunata ; tumi bayongolo babvutuka ku badzakalaana. 33Bu bakoto mu Sedzare, bayakisa mukaanda kuri ngoforo na basoongo Poolo kuri nde. 34Bu kataanga mukaanda, wafuula bula bwafumini Poolo, na bamuyaabisa ti ku Silisi. 35Nde waleele ti : "Me kukuywiila mu ntaangu yiri bafuundi ba ye batelemini ha busu bwa me." Nde waha miswa mu kumukebele mu nzo miyalu ya Eroode.
Currently Selected:
Biyiriki bya Bantumu 23: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024