Biyiriki bya Bantumu 22
22
1"Bampaangi na bataata, yukee mi nyileele me mu kukalila nyutu yaami." 2Bo bu bayuka wuri mu kubadzoonsolo mu ndiinga ya kihebereho, bahamisa na kuwura. Nde waleele ti : 3"Me Muyudayo, nyabutuka ku Taresi, mu nkoonsi ya Silisi. Me nyabuukula ha bvula dimadi, nyayika ha miilu mya Ngamalyeele, bunu buyelemini mu kubvumina mangisi ma bakuutu. Me nyaba na kuheme mu Nzaambi, bunu bu luri beenu lolo dimadi. 4Me nyakwaamisa natee mu kiteesu kya kudzusa, babo bakwenama nzila yimayi, na nyasoko bakyeetu na babakala mu boroko. 5Mukuutu bangaanga-nzaambi, na kikuutu kyokinso, kya bakulu bababakala, lo bateeri kimbaangi. Me kuri bo nyataamburi mikaanda, mu ntoono bampaangi bari ku Damasiko, na me nyayende kukwo, mu kwebakaanga na kubatwaala ku Yerusalemi mpisi babaseembe.
Poolo wudzoonsolo mu nyiingulu madyeele maandi
(Biy 9.1-19; 26.12-18)
6« Bu nyaba mu nzila, na nyeki kokosolo na Damasiko mu nkati mwiini, bu nyeki monaa nasisuu, buungi bwansisi bwandyengekele mpele na mpele. 7Me nyabwa ha nsi, na nyayuka mbeembu yaleele kuri me ti : "Sawuli, Sawuli, buri wuri mu kwekwaamisa me ?" 8Me nyafuula ti : "Ye na, Mfumu ?" Nde waleele ti : "Me ngo Yisu wa ku Nadzareti wu wuri mu kwekwaamisa." 9Baba kintwaari na me bamwiini buungi, ngo basii yuka mbeembu yaba dzoonso kuri me ko. 10Me nyafuula ti : "Nki me nyelemini kusa Mfumu ?" Mfumu wandeele ti : "Teleme yende ku Damasiko, tumi bakuleele myominso, mi bakutumini kusa." 11Ngo bukuri nyaba nyahele kumono mu ntoono buungi bwaba semaana, babo baba kintwaari na me, bampolo mu kooko, na banata ku Damasi. 12Kwaba muutu mosi, nkuumbu Ananyasi, wuri na kinzaambi bunu buri mangisi, wuri na kimbaangi kyakibwete, ha kakati dya Bayudayo bobanso, badzakalaa haho. 13Nde wayisa, wamono me, na wandeele ti : "Sawuli, mpaangi yaami, miisu myaaku mibweese kumono !" Na ha nsi na nsi, me nyabweese kumono, na nyatala kuri nde. 14Nde waleele ti : "Nzaambi ya bataayi beetu, wakusoolo mu kuyaaba kutya kwaandi, mu kumono wunde wasuunguma, na mu kuyuka mbeembu ya munwa waandi, 15bukuri ye sa bambaangi yaandi, ha busu bwa baatu bobanso, mu misamu myominso mimwiini, na miyukiri. 16Ngo mu lumalu, nki wubweese kukiinga ? Teleme, taambula mbotokulu, na mpemusunu ya masumu maaku, mu nteelulu nkuumbu yaandi." »
Poolo wayaabisa dyaburi nde bari bamuheeke kuri makaanda
17« Me bu nyabvutuka ku Yerusalemi, na bu nyaba saambilaa mu Nzo-Nzaambi, Mpeeve yambaka, 18na me nyamono Mfumu, na waleele kuri me ti : "Wasula, na pala mu mawasu mu Yerusalemi, bukuri bo bataambula kimbaangi kya ye mu me ko." 19Me nyaleele ti : "Mfumu, bo bayaari ti me nyabeekweyendaana, mu manzo ma nkutukunu, mu kwekotoso mu boroko, na kweseembe mu makwa bobanso basiila kanyi mu ye. 20Na mu ntaangu yi babatsaamuni makila ma Esetefano. mbaangi yaaku, me nyaba hanaho me-meene, nyataamburi mimyo na nyaba nyakwaata binkutu bya babo baba mudzusa." 21Nde wandeele ti : "Yende, bukuri me sa nyakuheeke kuri makaanda mari ku la !" »
Poolo na mukuutu bayongolo
22Baatu baba yukaana Poolo, natee mu ntoono yiyo, tumi bo bafula misaakulu baleele ti : "Yisilee muutu wabumabu ha butoto, nde wahele kuyelemene kuba wamwooyo." 23Bo bafula misaakulu, balooso binkutu bya bo, na batuumbula fuunda ku yulu. 24Kumanda watuma ti bamukotoso kunsa lupaangu, na bamufuulila mu nkwaasulu, mpisi kaleele mu nkya ntoono, baatu bari mu kufula misaakulu mu nde. 25Ngo babaanaa beki mukumukaanga misiinga mu kumulata, Poolo wafuula kuri mukuutu nkama bayongolo waba haho ti : "Buri beenu luri na miswa mya kulata muutu bari Looma, kuri bahele kumukesele mukanu ?" 26Mukuutu nkama bayongolo bu kayuka bubwo, wakokosolo kuri kumanda, wamuyaabisa wamuleele ti : "Nki ye keti kusa ? Muutu bari Looma nde kari. 27Kumanda bu kakokosolo, wamufuula ti : "Leele me, buri ye muutu bari Looma wuri ? Poolo waleele ti : "Hein-hein." 28Kumanda waleele ti : "Me nyaheeri mboongo dzalaka mu kuba muutu bari Looma." Ngo Poolo waleele ti : "Me ngo wuri mu mbutukulu." 29Hanaho, babo baketi kumulata nkwaasulu basasika na nde, na Kumanda wabaka boomo, bu kayaaba ti muutu bari Looma nde kari, na nde bee mwaakumukaanga bikonyi.
Poolo ha busu bwa mfuundu ya kikuutu
30Mu kiluumbu kyanama, Kumanda, bu kaba na nzala kuyaaba mu nkya ntoono Bayudayo baba mufuundila, nde waleele bamunyanguna, na watuma ti bakutikisa bakuutu ba bangaanga-nzaambi, na kikuutu kyokinso. Tumi nde, bu kasundula Poolo, wamusuusa ha busu bwa bo.
Currently Selected:
Biyiriki bya Bantumu 22: ATBABC
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique du Congo 2024