Masmur 81
81
Amisye Po Apa kawasae mansanayao indamu wo araniv
1Masmur Asap po ratoe. Nto irati akari po vatano matayao ukiny maugavo ransyerane rai ai. Mamaisyo ransyeran ‘‘Gitit’’#81:1 Ayao ‘‘Gitit’’ ama ine raene ramu. Kuruno Ayao Amisy inta wo ratantona ware ama ine mare ransyerano munijo Gat, weramu kuruno kaijinta ware omamo ransyerano vatano Israel ukiny dai arono wo anggur ama mane rakugan no mampiriare rai, weye ayao Gat ama ine mare ‘‘mampiriaro anggur.’’ rai.
2Syare wangkinyo ransyeran kangkamane raijo Amisye Ai, Wepirati wama vambunine nsawa Ai.
Wansananibe wanggwain wamo Amisye aijaseo titive, Wepirati aneno Yakop beaje Ai.
3Syare wangkinyo ransyerane raijo wansanamoto manakoe rai, muno wamo airape#81:3 airape ranigwano ‘‘rebana’’ rai. Rebana ranepat maisyare airape ranepat wemaisy. ranepato rai,
muno wamo itari anakoe muno itari mamaun#81:3 itari anakoe muno itari mamaun ranigwano ‘‘gambus’’ muno ‘‘kecapi’’ yai. raeyan dai indamu ama kine marinsawan dave.
4Syare wamo tavuna#81:4 tavuna ranigwano sangkakala Israel wo rave rai, omamo kambino anya apa korodowai. ramawisy arono wama masyoto akokoe rai,
arono embae wanyine mpirak kai,
muno arono embae nsiso ntunai tavon.
5Weye wemamo Amisye Po rapatimu to indamu vatano Israel utavondi rai,
omamo ananyao Amisy aneno Yakop beaje Ai Po rapatimu.
6Amisye Po Apa ananyao umaso raugaje ntami irati vatano Israel#81:6 Israel: ayao Ibrani mo ‘‘Yusup’’ ratoe, ama ine mare vatano Israel. mai,
no arono Opamo be marovave vatano Mesir mai,
no arono we reamo ayao kaijinta reamantatukambe raije inta ranaun.
7Amisye Po raura aje reansai pare: ‘‘Syo mangke nsawa wasaivame rai rapaya to,
muno Syo wasaneme rapaya irati anakero mangke rai to.
8Arono wana irati nsosobe ama uga rai weapo rinawain, weamo Risyo weasapaya rai to.
No katitire kine ama uga rai Rino no we, syayao nande irati wasai,
Risyo wapa anave ratopan no mana ami Meriba.#81:8 Kel. 17:1-7 muno Bil. 20:1-13
9Inya, Sya kawasae weap, Syare Syo wasanayao ti wadaraniv!
Inya Israel, ribeker syare wapo rinaraniv!
10Vemo wasambayambe irati anawayo akoe rui vayave inta ai nora, yara Ribui inai,#81:10 Kel. 20:3
muno vemo weabeaje irati vatano marane awa anawayo kotare mai nora.
11Risyirati AMISY, weapa Amisy wabeaje Ai Wepi Risy,
Risyirati Syo wasaugav uje irati munijo Mesir raora.
Arono rui weamaror, weamo Syo anaisye raunande ti weapo raisya wea man dave.
12Weramu Sya kawasae wonae wo Sya ayao ranauni,
muno kawasae Israel wonae ubeta irati Rinaiji.
13Maisyare omaiti, inaneme mpaya indamu una manuga matu rautan,
muno utavondi taune awa bekere rai kai.
14Syare ranivara Sya kawasae wo rinaraniv,
ranivara Israel utavondi Sya unanuije rai, wea umbaya!
15Arono naije kobeamo, indati Syo awa marova mataruran kobe,
muno rinanemo vambunine mo awa marova mapinde.
16Vatano manuga mamuno Rinai nanawamo indati ujaniv ti ututar no Rinamun,
muno awa mangke mamo indati ntoa nuge nuganui.
17Weramu Sya kawasae weap, Syo anaisyo ngkov dave raunande wasai,
muno Syo weasaveti waman irati anyaune ama mana manavan dave rai.’’
Currently Selected:
Masmur 81: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
