Masmur 79
79
Amisye anajo arono marova mo wansakupi
1Masmur Asap po ratoe.
Sya Amisy, susyo wanave Nai jewene unandesena utantuna Nya kopa no tawan Nyo ratayao reansai so rai to.
Wo Nya Yavaro ndandinite raveti nggwambe,#79:1 Mamaisyo vatano Israel awa ana udatantona rai, ranivara susyo marano wanave Amisye Ai jewen usisa no Yavaro Amisy, weamo wo raveti nggwambe.
muno wo Yerusalem randamisyi ti nsivuve ti ntuna.#79:1 Anakotare so nande arono tumo 586 arono Yesus ano rainy. Ayao so raura kakavimbe no 2Raj. 25:8-10; 2Taw. 36:17-19; Yer. 52:12-14.
2Wo Nya kawasae wo maubaisye awa koke randaraive ti ntuna,
weti insani wo ana mbauge raisye ude wo raisy,
muno make sansinao wo Nya vatano matawandi utavondi Nai umaso awa ine raisy.
3No Yerusalem ama uga raito, wo vatane maubaisy ti awa mavu njam maisyare mana,
muno awa koke mamo inta umamaisyo wo rantuna ramu.
4Susyo una reansakijani so wo reansampami,
wugoeno reansai muno wo reansaura tantunawi.
5Sya AMISY, indati wimpari reansaija ntoa nuge nuganuija e?
Ntoa nanduija umba winanuga mpari ntatupami ti maisyare tanamo mbadurure ma nsopija?
6Syare Nya pari mangke rasuijo susyo wanave Nai jewene mai,
muno munijo ubeaje Winai jewene mai tavon.
7Weye wo Nya kawasae Israel reansaupaeta ti reansakanive to,
muno wo reama munije randamisyi ti ntuna.
8Vemo Nyo reama anene awa ayao kakai raugakaje reandanawan inya.
Syare nyavave ra naemeno reansai,
weye reambambunin akato ramu to.
9Sya Amisy, Winyirati Nyo reansapaya irati kakai rai, syare naemeno reansai,
wirati indamu Nya tame raijaseo titive!
Syare Nyo reansapaya irati marova mai, muno Nyo reama ayao kakai rapaya tavon,
wirati indamu Nya tame raijaseo titive!
10Abo! Mbeanimaibe susyo wanave Amisye Ai jewene wo reansaura ware:
‘‘Wapa Amisye Pi ro, yara Po wasayaranande ramu ge?’’
Koveamo mangke ndasakinavo susye umaso mai mamo reansami ntami rai anawadive,
weye wo Nya kawasae maubaisy weti awa mavu nsopat.
11Syare Nyo vatano makova awa anonae ranaun,
koveamo vatano mapatimu maubaisye so nawamo Nyo mapaya rai indamu ukov,
mamaisyo Nya vambunino manakoe rai.
12Akoe Winy, syare Nyo mangke rasakinavo susyo una reansakijani so mai,
Nyo mangke ratutumbe mai,#79:12 mangke ratutumbe mai: Ayao Ibrani mare mangke raugaje mamo vari kaururum, ama ine mare mangke raugaje mamo ntairi rave. Mamaisyo vatano Israel awa ana wo ratantona rai, kaururum omamo vari mamai dave. weye wo winaura tantunawi.
13Weti reami Nya kawasae maisyare maero domba Nyo reansakum,
indati reamo kove raura seo Nai tutira ntoa nuge nuganui,
muno reama susyo mbakipambe iridito ukangkamambe Nai tutir.
Currently Selected:
Masmur 79: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
