Masmur 66
66
Kinyo ransyerane raijo Amisye Ai Apa ana dave rai
1Ransyeran Masmur. Nto irati akari po vatano matayao ukiny maugavo ransyerane rai ai.
Inya, vatano mine tename weap, wasananibe wagwain wapo Amisye abumbundi!
2Wakiny wapo Apa tame raijaseo titive,
wapo abumbundi ransyeran kangkamane rai!
3Syare wapo raura to Amisye Ai, wapare: ‘‘Tugae, Nya ana ndave mamo mbe anaanibe rave!
Nya vambunine manakoe rave, ti Nya marova ujaniv utarurandi no Namun.
4Vatano mine tename so ude ubeaje Nai,
ukiny ukangkamambe Nai,
ukiny ukangkamambe Nya tame rai.’’
5Wade ra wapo Amisye Apa ana dave raen,
Apa ana dave vatane mansai umaso mamo mbe anaanibe.
6Purarijato mayane rai ti yasyine ngkanen,#66:6 Kel. 14:21-22
muno Po mana raotar#66:6 Yosua 3:14-17 ti reama aneno sinane wanya rainanta.
Maisyare omaiti wansananibe Apa ana dave rai.
7Wepirati bambunin dave, weti be akarive ntoa nuge nuganui,
ami ntetero susyo wanave Ai jewene mai tenambe,
indamu vatano ware umarovave Ai nawamo vemo umararin inya.
8Inya, susyo mine tename weap, wapo reama Amisy ararimbe!
Muno wakiny wapo ararimbe wasanamoto manakoe rai!
9Wepi Po reansayaranande ti reanjayaisy tutir,
muno Po reansapaya vayave ra reantaopone jewen.
10Weye sya Amisy, Winyo reansatopan indamu Nyo reansanuga raveti ngkakavin,
maisyare vatane wo perakije raugasya rauno taname rai indamu wo raveti mpoper ti mbe peraki kakuive.#66:10 Vatane wo peraki raune mamo indamu ama anaingkainyo no rai mangkur ti mewen, weti ama kakui rave obo raen.
11Winyo reansaugavo ana mo reansatopane raronto, maisyare reanta mparono aviri rai wemaisy,
muno Nyo ana mangke raugaje reansai ti reamo ranawan.
12Winyo reama marova mansanyanyut bayave ti wo reansataka doyadi,
reansiuri rave maisyare vatano utatayasyo taname muno manayame rai wemaisy.
Weramu Winyo reansaugavuje raora
weti soamo reana kovo ana mawese rai jakato.
13Indati syo anakotaro ridameseo Winai raugave siso no Nya Yavare ama uga,
syo sya urairijo ridaokae nande Winai raveti mamaisy,
14namirati idaura inawa rai to wem,
syurairive no arono rino irati ana nsosobe raije we.
15Indati anakotaro idameseo Winai mamo maero mani ti ngko dave mainy,
omamo domba anya, sapi anya muno kambino anya mainy,
indamu rameseo ti ama kijao ranavan nsainye nseo Winai.
16Inya, vatano wapo Amisye asyanive weap, wade ra wadanaun,
syare syo Apa ana dave rinai rariri.
17Syo awain to, indamu Po sopambe rinai,
muno soamo syo abumbundi inawa so rai.
18Ranivara syanatantonave kakai rai no inanuga ratire,
indati Akoe Po rinaranive ramu.
19Weramu tugae rave, Amisye Po rinaraniv to,
sya sambaya syo anajo mamo Po raraniv muno Po raveti mamaisyo rinai.
20Syo Amisye ararimbe, weye sya sambaya mamo Po rawatambe ramu,
muno Apa muinyo no tawane mamo mpaya rinai ramu.
Currently Selected:
Masmur 66: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
