Masmur 140
140
Amisye anajo indamu darino wansaora irati vatano mamune mai
1Masmur Daud po ratoe. Nto irati akari po vatano matayao ukiny maugavo ransyerane rai ai.
2Sya AMISY, syare Nyo inapaya irati vatano mamune mai,
no rinaora irati vatano wo ivuinye rave mai.
3Onawamo mansanuga mamo ana ngkakai obo mirati manantonave rai,
muno masyote anteter wo arare raveti ntipu.
4Mansaunane mamo maisyare tawae mamune we,
awa ana udatore mamo mamun dave maisyare tawae wakane ama mamune wemaisy.
5Sya AMISY, syare ndarino rinaora irati vatano mamune awa vambunine rai,
no rinaora irati vatano wo ivuinye rave mai,
nanawirati ubeker ware wo inapinto nao.
6Vatano umararine wo isyeane ratugaro maninimbe ti mo inaman,
muno wo pame rantet ti mo inaman indamu risawa rai,
wo aviri ratugar ti mo inaman tavon no sya unanui idaito rai.
7Syo raura AMISY Winai syare: ‘‘Winyirati sya Amisy,
syare AMISY winamarikoame rasakinavo sya ana danajo so rai!’’
8Sya Akoe AMISY, Winyirati mbambunin ti Nyo inapaya kakai rai,
Winyirati ndarino rinaora no arono risiso marova rai.
9Sya AMISY, syare Nyo vatano mamune awa ubekere ransopi,
anakotaro kakai manatantonave rai mamo Nyo raorai.
10Syare vemo sya marova wo rinawariki so awa popane ranepataje rinai jinya,
koveamo awa ana udator ti ngkakai makare ra mo taune manepat!
11Koveamo Nyo mangke tanamo nene nsundive rasui mai,
muno Nyo mapinto atem mamai raito, indamu wakasen akatoe kakai.
12Vemo Nyo vatano wayarurijabe maen bayave mo una tawan no mine so inya,
vatano wo ivuinye rave nawamo syare anakotaro ngkakai mo mansamayo rijat da mo makep.
13Syo raen tugae, indati AMISY Nyo patimu moyare raugaje vatano matawanto mai,
muno Nyo marimbe vatano awa ananuge jajewembe mai.
14Vatano ubeta Amisye Winai nawamo indati wo Nya tame rararimbe,
muno vatano manuga nsarokire nawamo indati utantuna winatavon.
Currently Selected:
Masmur 140: yva
Highlight
Copy
Compare
Share
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
