Hibru 1
1
Maaron Natu to ipatooŋ ghiit pa Tama Maaron
1Muuŋ, Maaron isavia aliŋa pa propet toni pae katindi ila ataam naol naol. Tauto tigham avo, ve tivotia aliŋa pa nditimbuud. 2Eemoghon aazne, taneep ila sawa paghu to Maaron ighaze ipasob uraat toni. Tovenen sawa tonene, iit talooŋ Maaron aliŋa ila tau Natu avo. Sawa to Maaron ighur sambam ve taan toman mbeb to naol, ye ighur di tivot ila Natu tonowen nima. Ve ye ighaze ighur mbeb naol tonowen tisob tinim Natu le, leso iŋgin di. Mt 11:27; Yo 1:3; Kol 1:16; Hib 12:25
3Ye to inim ghazooŋa pait ve isul ghiit, ve ipatooŋ ghiit pa Tama Maaron tapiri ve poia toni. Ye igham Tama Maaron nagho kat. Maaron tapiri ve ŋgar isob to ineep toni, nene ineep to Natu paam. Natu saveeŋ toni, nene tapiri tiina kat, ve ikis mbeb tisob tineep tuŋia. Ye imaat ve ireu sosor toit, ve igham ghiit taŋgalaaŋ ila Maaron mata. Ghoro imuul iza ila pa sambam, ve mbole izi ila pa Maaron ariaŋa tau nima waan. Yo 1:14; Mk 16:19; Kol 1:15+
Maaron Natu ilib pa yes aŋela
4Tovenen Maaron Natu ilib kat pa yes aŋela. Pasa, iza to Maaron igham pani, nene tiina ve poia kat ilib pa yes aŋela izadi. Pil 2:9+
5Aghita. Maaron isaav pa Natu ighaze:
“Aazne, you nasaav ghazooŋa tovene: You natug yom. Yom tamam to you. Aazne, you naghur ghom pa uraat.” Mbo 2:7; Mt 3:17; Hib 5:5
Ve isaav muul ighaze:
“Ye tama you, ve ye you natug.” 2Sam 7:14
Maaron isavia saveeŋ tovene pa aŋela eta maau. Saveeŋ tonene iŋarua Natu moghon.
6Ve sawa to Maaron ighaze imbaaŋ Natu aidaba izi inim taan, ye isaav tovene:
“Aŋela tisob to Maaron irau tiput aghedi pani, ve tipaiti.” Mbo 97:7
7Ve yes aŋela, Maaron isavia di ighaze:
“Aŋela, yes uraata toni to timbesmbees pani. Ye igham di tinimale yaghur ve yab yama.” Mbo 104:4
8Eemoghon ye isavia Natu ighaze:
“Maaron, pooz tiom irau isob ne maau. Uneep ila inam to ghamuuŋ pooz itaghoni taghoni gha ila.
Ŋgar deŋia to inim ghilalooŋ pa pooz tiom.
9 Yom lolom pa ŋgar deŋia, ve ughur koi pa ŋgar samsamia to tiyel pa tutuuŋ.
Tovenen Maaron tiom ipait ghom le ulib pa nditam pida, ve iliŋ ŋgoreeŋ izala poghom pa ighur ghom unum kinik.
Tauto igham ghom lolom poia le poia kat.” Mbo 45:6+
10Ve saveeŋ waaro ite to iŋarua Maaron Natu, nene isaav tovene:
“Tiina, muuŋ kat yom ughur taan, ve ugharaat pughu le iyaryaaŋ. Ve sambam paroŋania paam, nene nimam muri.
11-12Sambam paroŋania ve taan pale tisami tinimale uli to muŋginaaŋ ve imarepreep.
Tovenen yom pale uloi di inimale nonogiiŋa muŋgina, ve urabolin di pa sambam paroŋania paghu ve taan paghu.
Eemoghon yom, ghoro unepneep moghon tovene. Sawa tiom irau isob maau. Iseŋseeŋga itaghoni taghoni gha ila.” Mbo 102:25+; Hib 13:8; Yems 1:17; 2Pe 3:13
13Ve muuŋ, Maaron isaav pa Natu ighaze:
“Unum mbolem izi ila pa nimag waan, le irau natatan koiamŋa ve tapiridi isob kat, ve uvazag di ila aghem samba.” Mbo 110:1; Mk 12:36
Aghita. Sawa eta ye isaav tovene pa aŋela eta? Maau. Saveeŋ tonene iŋarua Natu moghon. 14Pasa, aŋela, yes mbesooŋa to Maaron. Ye imbaŋbaaŋ di pa tiuul yes to ye ighaze igham mulin di. Mbo 34:7, 91:11, 103:20; Mbaŋ 12:7
Currently Selected:
Hibru 1: tucONT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.